មិត្តភ័ក្ដិស្រឡាញ់គ្នាយល់ចិត្តថ្លើម គួរធ្វើជំនួញរួមគ្នាដែរឬអត់?
- 2016-03-21 16:45:29
- ចំនួនមតិ 0 | ចំនួនចែករំលែក 0
មិត្តភ័ក្ដិស្រឡាញ់គ្នាយល់ចិត្តថ្លើម គួរធ្វើជំនួញរួមគ្នាដែរឬអត់?
ចន្លោះមិនឃើញ
គាត់ជាមិត្តល្អបំផុតរបស់អ្នក ដែលធ្លាប់តែដើរផ្សារជាមួយគ្នា ធ្វើការឬរៀនជាមួយគ្នា រស់នៅផ្ទះជាមួយគ្នា និងមានចំណង់ចំណូលចិត្តដូចគ្នា ប៉ុន្តែតើគួរចាប់ផ្ដើមមុខជំនួញជាមួយគាត់ទេ? គួរឬមិនគួរ អ្នកអាចសម្រេចចិត្តបាន ក្រោយពីឆ្លើយសំនួរសំខាន់ៗចំនួន ៤ខាងក្រោមនេះ៖
១. តើអ្នកនិងគាត់ឲ្យនិយមន័យ "ជោគជ័យ" ដូចគ្នាដែរឬទេ?
អ្នកអាចនឹងមានគំនិតខុសគ្នាស្រឡះអំពីអ្វីដែលអ្នកចង់បានក្នុងមុខជំនួញ ប្រសិនបើគោលដៅរយៈពេលវែងរបស់អ្នកទាំងពីរខុសគ្នា ហើយវានឹងពិបាកបំផុតក្នុងការផ្លាស់ប្ដូរការគិតរបស់អ្នកនិងគាត់ឲ្យត្រូវគ្នាវិញ។ អ្នកនិងគាត់ត្រូវពិភាក្សាគ្នាឲ្យច្បាស់សិនថាតើអ្នកកំណត់គោលដៅបែបណាសម្រាប់មុខជំនួញនោះ ហើយអ្នកចង់បានអ្វីខ្លះពីវា ក៏ដូចជាថាតើអ្នកទាំងពីរមានឆន្ទៈកម្រិតណាក្នុងការសម្រេចគោលដៅនោះ។
២. ទុកចិត្តគ្នាទេ?
ទំនុកចិត្តគឺជារឿងសំខាន់មិនអាចខ្វះបាន មិនថាសម្រាប់មិត្តភាព ឬការធ្វើជំនួញ។ ការជឿទុកចិត្តលើដៃគូជំនួញគឺជារឿងចាំបាច់ ជាពិសេសដោយការចាប់ផ្ដើមជំនួញជាការប្រថុយប្រថានរឿងលុយកាក់ ហើយអ្នកត្រូវដឹងថាដៃគូរបស់អ្នកនឹងមានភាពស្មោះត្រង់យ៉ាងណាសម្រាប់ការបែងចែកផលប្រយោជន៍ទទួលបានពីមុខជំនួញទាំងនោះ។
៣. ទទួលបានទេបើមិត្តភាពរបស់អ្នកត្រូវបាត់បង់ដោយសារមុខជំនួញ?
ពេលជាមិត្តភ័ក្ដិ តើអ្នកអាចដោះស្រាយជម្លោះតូចៗជាមួយគ្នាដោយរហ័សនិងងាយស្រួលបានទេ? ប្រសិនបើអត់ទេ អ្នកប្រហែលជាមិនគួរចាប់ផ្ដើមមុខជំនួញជាមួយគ្នាឡើយ។ អ្នកនឹងជួបប្រទះផលពិបាកជាច្រើនចៀសមិនផុតនៅពេលចាប់ផ្ដើមមុខជំនួញថ្មី ហើយនឹងអាចប្រឈមមុខនឹងបញ្ហាឈ្លោះគ្នាដោយសាររឿងតូចៗជាច្រើន។ ជារឿងសំខាន់ អ្នកត្រូវដឹងថាចំណងមិត្តភាពរបស់អ្នកអាចនឹងរង្គោះរង្គើ ប្រសិនបើមានអ្វីមួយដំណើរការមិនល្អក្នុងមុខជំនួញ។ ដូច្នេះអ្នកទាំងពីរត្រូវសួរខ្លួនឯងឲ្យច្បាស់សិន ថានេះជាអ្វីដែលអ្នកពិតជាចង់ប្រថុយដែរឬទេ?
៤. តើអ្នកទាំងពីរនឹងអាចជួយអ្វីខ្លះក្នុងមុខជំនួញនោះ?
កុំចាប់ផ្ដើមមុខជំនួញជាមួយមិត្តរបស់អ្នកដោយសារអ្នកចូលចិត្តដើរលេងជាមួយគ្នា ធ្វើការជាមួយគ្នារាល់ថ្ងៃ ឬនៅជាមួយគ្នារាល់ថ្ងៃ។ អ្នកគួរចាប់ផ្ដើមមុខជំនួញមួយជាមួយមិត្តភ័ក្ដិ នៅពេលអ្នកទាំងពីរមានអ្វីមួយអស្ចារ្យសម្រាប់មុខជំនួញនោះ គឺថាជំនាញរបស់អ្នកគួរតែអាចបំពេញឲ្យគ្នាទៅវិញទៅមក ហើយចំណុចខ្សោយរបស់អ្នកគួរតែជាចំណុចខ្លាំងរបស់គាត់ ៕
ចុចអាន៖គន្លឹះ៧យ៉ាង ដើម្បីបង្កើតអាជីវកម្មមួយ ខណៈកំពុងធ្វើការឲ្យគេ
ចុចអាន៖ហេតុផល១០យ៉ាង ធ្វើឲ្យអ្នកមិនអាចក្លាយជាអ្នកមាន
ប្រែសម្រួល៖ វ៉ាន់ថន ប្រភព៖ careergirldaily