FlyDubai នឹងបង់ឲ្យគ្រួសារជនរងគ្រោះធ្លាក់យន្តហោះនៅរុស្ស៊ី ក្នុងមួយគ្រួសារ២ម៉ឺនដុល្លារ
- 2016-03-21 20:44:48
- ចំនួនមតិ 0 | ចំនួនចែករំលែក 0
FlyDubai នឹងបង់ឲ្យគ្រួសារជនរងគ្រោះធ្លាក់យន្តហោះនៅរុស្ស៊ី ក្នុងមួយគ្រួសារ២ម៉ឺនដុល្លារ
ចន្លោះមិនឃើញ
បន្ទាប់ពីឧបទ្ទវហេតុធ្លាក់ផ្ទុះឆេះ យន្តហោះ Boeing 737-800 របស់ជើងហោះហើរ Flydubai FZ981 ពេលត្រៀមចុះចតនៅភាគខាងត្បូងទីក្រុង Rostov-on-Donប្រទេសរុស្ស៊ីបានកើតឡើង។ Flydubai ដែលជាជើងហោះហើរគ្រប់គ្រងដោយរដ្ឋាភិបាលប្រទេសអារ៉ាប់រួមបានប្រកាសក្នុងសេចក្ដីថ្លែងការណ៍ចុងក្រោយរបស់ខ្លួនថានឹងបង់ឲ្យ ក្រុមគ្រួសារជនរងគ្រោះ ក្នុងមួយគ្រួសារជាទឹកប្រាក់ចំនួន២ម៉ឺនដុល្លារ។
តាមសារព័ត៌មាន Khaleetimes “ មកទល់ពេលនេះ អ្វីដែលពួកយើងអាចធ្វើបានគឺរកអត្តសញ្ញាណនិងទំនាក់ទំនងទៅគ្រួសារជនរងគ្រោះដែលបានបាត់បង់ជីវិតក្នុងហេតុការណ៍នោះ និងផ្ដល់ជំនួយដល់ពួកគេដែលរងផលប៉ះពាល់ពីគ្រោះថ្នាក់។ Flydubai នឹងរៀបចំបន្ថែមកម្មវិធីជូនប្រាក់ទៅគ្រួសារពួកគេ ក្នុងមួយគ្រួសារ ២ម៉ឺនដុល្លារអាមេរិក ដោយយោងតាមគិតតាមស្ថានភាពជាក់ស្ដែង និងតម្រូវការផ្នែកហិរញ្ញវត្ថុជាបន្ទាន់"។ នេះដោយយោងតាមសេចក្ដីរាយការណ៍ចុងក្រោយរបស់ Flydubai កាលពីថ្ងៃអាទិត្យម្សិលមិញ។
ចំពោះស្ថានភាពពីការស៊ើបអង្កេតលើយន្តហោះ Boeing 737-800 ឯណោះវិញ បើតាមលោក Vladimir Markinអ្នកនាំពាក្យនៃគណៈកម្មាធិការស៊ើបអង្កេតប្រទេសរុស្ស៊ី បានឲ្យដឹងថា មកទល់នេះអ្នកជំនាញបានរកឃើញឧបករណ៍ថតសំឡេងសន្ទនានិងទិន្នន័យក្នុងបន្ទប់អ្នកបើកយន្តហោះ ព្រមទាំងប្រអប់ខ្មៅ ដែលមានសភាពខូចខាតច្រើន ប៉ុន្តែជាទិន្នន័យដ៏សំខាន់ និងកំពុងស្វែងរក ឧបករណ៍ថតទិន្នន័យមួយផ្សេងទៀត។
តាមក្រុមស៊ើបអង្កេតកំពុងពិចារណាលើករណីយន្តហោះធ្លាក់ខាងលើ ថាអាចកើតឡើងដោយសារបញ្ហាបច្ចេកទេសរបស់ភីឡុតពេលជួបនឹងបញ្ហាអាកាសធាតុមិនអំណោយផលក្នុងការចុះចត ឬមកពីបញ្ហាម៉ាស៊ីនយន្តហោះ។
គួររំលឹកផងដែរថា យន្តហោះ Boeing 737-800 បានធ្វើដំណើរពីទីក្រុង Dubai ឆ្ពោះទៅព្រលានយន្តហោះ Rostov-on-Don ភាគខាងត្បូងប្រទេសរុស្ស៊ី ប៉ុន្តែបែរជាជួបឧបទ្ទវហេតុធ្លាក់យន្តហោះនៅពេលចុះចតវេលាម៉ោង៣:៥០ព្រឹក កាលពីថ្ងៃសៅរ៍ (ម៉ោងនៅរុស្ស៊ី) ធ្វើឲ្យស្លាប់មនុស្សសរុប៦២នាក់ ។ ក្នុងចំណោមជនរងគ្រោះអ្នកស្លាប់៦២នាក់ ត្រូវបានគេដឹងថា មានអ្នកដំណើរសរុប៥៥នាក់ ភាគច្រើនជាជនជាតិរុស្ស៊ី ជនជាតិអ៊ុយក្រែន៨នាក់ ឥណ្ឌា២នាក់ អ៊ូបេគីស្ថាន១នាក់ ក្នុងនោះមានក្មេង៤នាក់ រួមទាំងអាកាសយានិក៧នាក់ផងដែរ បានបាត់បង់ជីវិតទាំងអស់៕
ភីឡុតAristos Sokratous (ឆ្វេង)និង ជំនួយការ Alejandro Álava Cruz
ចុចអាន៖ ពាក្យចុងក្រោយរបស់ភីឡុត ដែលបញ្ជាយន្តហោះធ្លាក់នៅរុស្ស៊ី ប្រែសម្រួល៖ មាន រតនា ប្រភព៖ khaleejtimes, dailymail