ទីបំផុតសម្រេចក្ដីប្រាថ្នា ទៅរៀនអនុបណ្ឌិតក្រៅប្រទេស ដោយសារចង់ជិះយន្តហោះ

2016-03-23 17:29:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពន្លឺភ្លឺភ្លែតៗ របស់យន្តហោះបោះពួយកាត់វេហា បន្លំជាមួយវ៉ូងតារានិករ រាប់ពាន់ដួងនាពេលរាត្រី បានថ្ពក់ចិត្តឲ្យយុវជនម្នាក់នឹកមមៃថា ថ្ងៃណាមួយខ្លួននឹងបង្កើតឱកាសដើម្បីបានជិះលើបក្សីស្លាបដែកនេះ។

តែសំបុត្រយន្តហោះមិនមែនដូចសំបុត្រឡានត្រូវចំណាយប្រាក់តិចតួចនោះឡើយ វាហាក់ដូចជានៅឆ្ងាយពីក្ដីសុបិនសម្រាប់យុវជន សុខ លាងហ៊ត ដែលរស់នៅក្នុងគ្រួសារកសិករ។ លាងហ៊តគិតថា បើជីវភាពគ្រួសារមិនអាចផ្ដល់លទ្ធភាពបំពេញក្ដីស្រមៃនេះបាន ដូច្នេះ ខ្លួនគេផ្ទាល់ត្រូវចេះបង្កើតវាដោយខ្លួនឯង។ ម្ល៉ោះហើយមានតែការប្រឹងរៀនឲ្យពូកែដើម្បីបានអាហារូបករណ៍ទៅបរទេសទេ ទើបក្តីសុបិនមួយនេះ អាចក្លាយជាការពិត។ លើសពីនេះ លាងហ៊ត យល់ថា ការទទួលបានអាហារូបករណ៍ជារឿងល្អ មិនត្រឹមជួយឲ្យការស្រមៃរបស់ខ្លួនក្លាយជាការពិតប៉ុណ្ណោះទេ ថែមទាំងជួយឲ្យគ្រួសារខ្លួនអាចរួចផុតពីភាពក្រីក្របានដែរ។ ចាប់ពីពេលនោះមក លាងហ៊តប្រឹងប្រែងរៀនសូត្រ និងស្រាវជ្រាវជារៀងរាល់ថ្ងៃ។ គាប់ជួនពេលមួយ រូបគេបានឃើញសេចក្ដីប្រកាសពីដំណឹងអាហារូបករណ៍ឈ្មោះ Hinrich Foundation ក្នុង Facebook រូបគេក៏ប្រញាប់ត្រៀមរៀបចំឯកសារពាក់ព័ន្ធដើម្បីដាក់ពាក្យសុំអាហារូបករណ៍នេះ។ វាពិតជាមិនគួរឲ្យនឹកស្មានសម្រាប់យុវជនមានស្រុកកំណើតនៅខេត្តកណ្ដាលរូបនេះ ព្រោះអាហារូបករណ៍លើកទី១នេះបានជាប់ជាស្ថាពរ ហើយក្ដីស្រមៃកាលពីតូចក៏ក្លាយជាការពិតដែរ។

លាងហ៊ត បានទៅសិក្សានៅទីក្រុងហុងកុង ក្នុងសាកលវិទ្យាល័យ Hong kong Baptist ជំនាញប្រព័ន្ធផ្សព្វផ្សាយ និងគមនាគមន៍ ជាមួយប្រាក់ឧបត្ថម្ភ ៣ម៉ឺនដុល្លារ។ ការសិក្សានៅក្នុងទីក្រុងស៊ីវីល័យ បើទោះជួបការលំបាកខ្លះៗ តែលាងហ៊តមិនមានបញ្ហាចោទខ្លាំងនោះទេព្រោះការរៀននៅទីនោះធ្វើឲ្យចំណេះដឹងកាន់តែទូលំទូលាយ និងទទួលបានបទពិសោធន៍យ៉ាងច្រើន។

នាថ្ងៃអនាគត លោក សុខ លាងហ៊ត ចង់ប្រើប្រាស់មុខវិជ្ជាដែលខ្លួនរៀននេះ ទៅបំពេញជាអ្នក សារព័ត៌មានប្រកបដោយវិជ្ជាជីវៈមួយរូប៕

សូមទស្សនាវីដេអូ៖