បើកក្រុមហ៊ុនអស់ ១០ ម៉ឺនដុល្លារ វិរៈ សង្ឃឹមមានចំណូលរាប់លាន នៅអាយុក្រោម ៣០ ឆ្នាំ

2016-03-24 17:22:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយមើលឃើញថា យុវជនតាមបណ្ដាប្រទេសនានា លើពិភពលោកមានសមត្ថភាព និងក្លាយជាមហាសេដ្ឋីទាំងវ័យក្មេង លោក សៀង វិរៈ បានឱ្យ Sabay ដឹងថា លោកនឹងអាចរកចំណូលរាប់លានដុល្លារ ឱ្យក្រុមហ៊ុន នៅអាយុក្រោម ៣០ ឆ្នាំ។

Sabay៖ តើលោកជឿជាក់ថា អាចធ្វើបានដូចការរំពឹងទុកទេ? ហេតុអ្វី?

សៀង វិរៈ៖ យើងជឿជាក់ យើងនឹងទទួលជោគជ័យ។ ឥលូវខ្ញុំអាយុ ២៤ឆ្នាំ អ៊ីចឹងអាយុក្រោម ៣០ឆ្នាំ ខ្ញុំរំពឹងនឹងរកប្រាក់រាប់លានដុល្លារឱ្យក្រុមហ៊ុនរបស់ខ្ញុំ។ ខ្ញុំជឿជាក់ថា ខ្ញុំនិងក្រុមការងារអាចរកបាន ព្រោះវិស័យភាពយន្ត កំពុងអភិវឌ្ឍទៅមុខ។ យើងនឹងប្រឹងប្រែងជាមួយពួកគាត់ទាំងអស់គ្នា។

Sabay៖ ខ្ញុំមើលឃើញថា ក្រុមការងារសុទ្ធតែក្មេងៗ តើអតិថិជននឹងមានទំនុកចិត្តប៉ុណ្ណា មកលើកក្រុមហ៊ុនរបស់លោក?

សៀង វិរៈ៖ ខ្ញុំចង់ប្រាប់ថា អាយុក្មេងគ្រាន់តែជាតួលេខទេ។ យើងក្រឡេកមើលប្រទេសដទៃទៀត គេ [ប្រជាជន] ក្លាយជាមហាសេដ្ឋី គេក្លាយជាអ្នកមានធំៗ នៅអាយុក្រោយ ៣០ ឆ្នាំ។ ក្រឡេកមើលប្រទេសយើងមានច្រើនហើយឬនៅ? មិនទាន់មានច្រើនទេ ម៉េចក៏ ៣០ ជាងឡើងទៅដែរ។ នៅក្មេងគ្រាន់ជាតួលេខទេ តែគាត់មានសមត្ថភាពដូចមនុស្សចាស់។ បើយើងមិនចាប់ពីក្មេងទេ យើងចាប់ពីពេលចាស់ ការគិតរបស់យើងមិនលឿនទេ។ យើងអត់បញ្ជាក់អ្វីច្រើនទេ គឺបញ្ជាក់តាមតែស្នាដៃ។ ម្យ៉ាងយើងមានដៃគូចាស់ៗ ដែលធ្លាប់ធ្វើការជាមួយគ្នា មិនមែនថាយើងបើកថ្មី អតិថិជនសុទ្ធតែថ្មីទេ។ យើងត្រូវតែខ្លាំងខាងបច្ចេកវិទ្យា និងគុណភាពឱ្យបានល្អ។ ពេលរឿងយើងល្អហើយ យើងមិនចាំបាច់ផ្សព្វផ្សាយខ្លួនឯងទេ អតិថិជននឹងផ្សព្វផ្សាយឱ្យយើង។

បច្ចុប្បន្នយុវជន ២៤ ឆ្នាំរូបនេះ ជាផលិតករ ជាអ្នកដឹកនាំរឿង និងជាម្ចាស់ភាគហ៊ុន នៃក្រុមហ៊ុន Romdoul Media co,.Ltd។ ថ្វីត្បិតក្រុមហ៊ុនដែលប្រើដើមទុនប្រមាណ ១០ ម៉ឺនដុល្លារនេះ ទើបបើកដំណើរការក្ដី តែលោកជឿជាក់ថា លោកនិងក្រុមការងារ អាចរកចំណូលបានរាប់លានដុល្លារ នៅអាយុក្រោម ៣០ ឆ្នាំ៕

ចុចអាន៖ ជី សិលា៖ “ដឹងពីទំនោរអនាគត ដើម្បីក្លាយជាអ្នកជំនួញជោគជ័យ”

ចុចអាន៖ “បើគ្មានដើមទុន ធ្វើអ្វីដែលខ្លួនពូកែ បើកអ្វីដែលខ្លួនស្រលាញ់”

អត្ថបទ៖ អ៊ុំ សុភក្តិ