នាយកដ្ឋានសិល្បៈភាពយន្ត ហៅផលិតកម្មប្រជុំ ក្រោយមានការរិះគន់លើបទចម្រៀង

2016-03-24 22:43:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នឹងហៅអ្នកនិពន្ធ ក៏ដូចជាអ្នកដឹកនាំសម្ដែងតាមផលិតកម្មចម្រៀងនានា ដើម្បីចូលរួមប្រជុំនៅថ្ងៃស្អែកនេះ ក្រោយវីដេអូចម្រៀងខារ៉ាអូខេកន្លងមករងការរិះគន់។

លោក ស៊ិន ច័ន្ទសាយ៉ា ប្រធាននាយកដ្ឋានខាងលើបានលើកឡើងថា ខ្លឹមសារ និងរូបភាពចម្រៀងខារ៉ាអូខេសុទ្ធសឹងតែធ្លាប់រងការរិះគន់ ព្រោះការតែងនិពន្ធរបស់អ្នកជំនាន់ក្រោយមានបញ្ហាច្រើន។

“អ្វីដែលជាការរិះគន់ខ្លាំង បទយើងឥឡូវខ្វះការអប់រំច្រើន មិនសូវបានបញ្ចូលគំនិតអប់រំ គាត់គិតធ្វើម៉េចទាក់ទាញ ប៉ុន្តែខ្លឹមសារអត់សូវបានយកចិត្តទុកដាក់ទេ"។ លោក ស៊ិន ច័ន្ទសាយ៉ា ថ្លែងមកកាន់ Sabay។ លោកបន្តថា បញ្ហាសំខាន់នាំឱ្យមានការរិះគន់កាន់ម្ដងហើយម្ដងទៀតនោះ គឺការចម្លងបទចម្រៀងរបស់គេមកផលិតបន្ត ហើយដល់ពេលត្រូវនិយាយគ្នាពីបញ្ហានេះហើយ។

ប្រធាននាយកដ្ឋានរូបនេះបន្តថា លោកក៏នឹងជំរុញដល់ផលិតករទាំងអស់ ដើម្បីយកស្នាដៃរបស់ពួកគេទៅដាក់ការពារនៅក្នុងផ្លូវច្បាប់ ព្រោះកន្លងមកមានផលិតករមួយចំនួនមិនបានធ្វើរឿងនេះទេ នាំឱ្យមានការលួចចម្លងតៗគ្នា។ លោកបន្តថា ក្នុងនាមក្រសួងវប្បធម៌ និងនាយកដ្ឋានមិនអាចការពារផលិតផលចម្រៀងទាំងអស់នោះបានទេ បើសូម្បីតែសាមីខ្លួនម្ចាស់ស្នាដៃមិនការពារផង។

“ខ្លួនគាត់អត់ការពារផងហ្នឹង! ចេះតែនាំគ្នានិយាយថា ច្បាប់មិនការពារឱ្យ ជួនកាលគាត់អត់ហ៊ានទេ ព្រោះចម្លងតៗគ្នាដែរ"។ លោក ស៊ិន ច័ន្ទសាយ៉ា បន្ថែមយ៉ាងដូច្នេះ។ លោកបន្តថា បើចង់ការពារបទចម្រៀងទាំងនោះជារឿងលំបាក ហើយត្រូវការពេលវេលាច្រើន ដើម្បីជជែករកដំណោះស្រាយ ធ្វើយ៉ាងណាឱ្យផលិតកម្មហ៊ានចេញមុខការពារផលិតផលរបស់ខ្លួនតាមផ្លូវច្បាប់៕

អត្ថបទ៖ សំ ជំនាញ