ចេញព័ត៌មាន ចន្ធី វល័ក្ខ សាងស្នេហ៍ក្លែងក្លាយជាមួយបុរសនាយសមុទ្រ
- 2014-10-25 17:03:08
- ចំនួនមតិ 0 | ចំនួនចែករំលែក 0
ចេញព័ត៌មាន ចន្ធី វល័ក្ខ សាងស្នេហ៍ក្លែងក្លាយជាមួយបុរសនាយសមុទ្រ
ចន្លោះមិនឃើញ
ស្រីស្អាតកម្មវិធីអង្គរសង្ក្រាន្ត ២០១៤ កញ្ញា ចន្ធី វល័ក្ខ បានធ្វើឲ្យមានការភ្ជាក់ផ្អើលខ្លាំងចំពោះអ្នកគាំទ្រ និង មិត្តភ័ក្ដិរបស់នាង អំពីមានទំនាក់ទំនងស្អិតល្មួតជាមួយបុរសម្នាក់រស់នៅសហរដ្ឋអាមេរិក តាមរយៈការបញ្ចេញរូបភាព (Chat Message)ផ្ដោះផ្ដងវាចាផ្អែមល្ហែមជាមួយគ្នាស្ទើររាល់ថ្ងៃ។ សាមីខ្លួនអះអាងថា នោះគ្រាន់តែឆាកល្ខោនស្នេហ៍របស់នាងប៉ុណ្ណោះ។
"ឲ្យខ្ញុំសុំទោសអ្នករាល់គ្នា ដែលធ្វើឲ្យមានការយល់ច្រលំ និង ភ្ញាក់ចំពោះការដាក់ In Relationship ក្នុង Facebook ជាមួយគេ (បុរសនាយសមុទ្រ) នោះ ប៉ុន្តែខ្ញុំមានហេតុផលរបស់ខ្ញុំ គឺខ្ញុំគ្រាន់តែចង់ការពារខ្លួនឯងប៉ុណ្ណោះ!"។
វល័ក្ខ អះអាងថា កន្លងមក មានមនុស្សមកពីមជ្ឈដ្ឋានផ្សេងៗជាច្រើន បានបង្កការរំខានដល់នាងរាល់ថ្ងៃ។ ពួកគេតែងទូរសព្ទ និយាយលែបខាយឌឺដងបំណងសុំស្នេហ៍ សូម្បីតែនាងទៅថត ឬទៅទីកន្លែងណា ក៏មានអ្នកតាមរំខានដែរ។ កញ្ញា ប្រាប់ថា នាងចង់បានជីវិតស្ងប់ស្ងាត់ មិនមានការរំខានបែបនោះ ទើបសម្រេចថា បង្កើតឆាកល្ខោននេះឡើង។
“បន្ទាប់ពីខ្ញុំដាក់ In Relationship មក មែនស្ងប់ស្ងាត់មែនបង ពួកគាត់ឈប់មករំខានទៀតហើយ ព្រោះគាត់យល់ថា យើងមិនមែននៅទំនេរ"។ វល័ក្ខ ថ្លែង។
ចន្ធី វល័ក្ខ បានបង្កើតទំនាក់ទំនងក្លែងក្លាយជាមួយបុរសនាយសមុទ្រជិត ១ ឆ្នាំហើយ តាំងពីបញ្ចប់កម្មវិធីអង្គរសង្ក្រាន្ត២០១៤មក។ យ៉ាងណា បើទោះជីវិតនាងបានសុខដុមមួយផ្នែក ប៉ុន្តែថ្មីៗនេះ នាងស្រាប់តែគិតឃើញថា ខ្លួនឯងដូចជាមានកំហុសមួយដែរក្នុងល្ខោនស្នេហ៍នេះ។ ដូច្នេះហើយ នាងសម្រេចថា បញ្ឈប់ទើបចេញមកទម្លាយការពិតនៅពេលនេះ។
“ខ្ញុំគិតៗទៅធ្វើអីចឹងដូចអាត្មានិយមណាស់ មែនហើយ ខ្ញុំលែងមានអ្នកមករំខាន លែងមានអ្នកហ៊ានស្រឡាញ់ អីចឹងគេ (បុរសនាយសមុទ្រ) ក៏លែងមាននារីមកស្រឡាញ់គេដែរ អីចឹងហើយការណ៍ដែលខ្ញុំចេញមុខពេលនេះ ក៏ដើម្បីឲ្យគេអាចមាននារីចូលមកក្បែរគេដែរបង!”។
ក្រោយការចេញមុខទម្លាយការពិតពីចំណងស្នេហ៍ជាមួយបុរសក្រៅស្រុកនាពេលនេះ តារាស្រីវ័យ ១៩ ឆ្នាំ រូបនេះ មានជំនឿថា ការរំខាននានាដែលធ្លាប់មានពីមុននឹងវិលមករកនាងវិញ។ យ៉ាងណា វល័ក្ខ ថ្លែងថា នាងសុំការយោគយល់លើចំណុចនេះ បើពុំនោះទេ នាងនឹងប្ដូរលេខទូរសព្ទដែលនាងប្រើសព្វថ្ងៃចោលតែម្ដង៕
(រូបថតផ្ដល់ដោយ វល័ក្ខ)
អត្ថបទពាក់ព័ន្ធនឹងជុំវិញសិល្បៈជាតិ សូមចុចទីនេះ…!!!
អត្ថបទពាក់ព័ន្ធនឹងបញ្ហាតារាជាតិ សូមចុចទីនេះ…!!!
អត្ថបទ៖ ទារិកា