ម្ដាយគំរាមកាត់កាលកូនស្រីចោលព្រោះកែមុខ២០ដងឲ្យដូច Fan Bingbing

2016-03-29 15:49:41
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកម្ដាយជនជាតិចិនមួយរូបបានគំរាមកាត់កាល់កូនស្រីចោលក្រោយពេលយំឡើងអស់ទឹកភ្នែកនៅតែមិនអាចបញ្ឈប់នាងពីការញៀនកែសម្ផស្សបាន។

ផ្អែកតាមបណ្ដាញព័ត៌មាន Tencent អ្នកម្ដាយអាយុ៦១ឆ្នាំមួយរូបបានព្រួយបារម្ភពីកូនស្រីដែលវក់នឹងការកែសម្ផស្សខ្លាំងពេកដល់ថ្នាក់បានគំរាមកាត់កាល់នាងចោលនៅចំពោះមុខទស្សនិកជនជាច្រើនក្នុងកម្មវិធីទូរទស្សន៍កាលពីថ្ងៃព្រហស្បតិ៍សប្ដាហ៍មុននេះ។

អ្នកម្ដាយវ័យចំណាស់បាននិយាយទៅកាន់អ្នកមានមុខក្នុងកម្មវិធីថា៖ "រាល់ពេលដែលខ្ញុំមើលមុខកូនស្រី នាងមើលទៅប្លែកជាងមុនរហូត។ ឥលូវនេះ សូម្បីតែខ្ញុំជាម្ដាយនាងទៅហើយ នៅមើលនាងមិនចង់ស្គាល់ផង។ ទម្រង់មុខរបស់កូនស្រីខ្ញុំនៅពេលនេះ គឺខុសពីមុនទាំងស្រុង។ អ៊ំស្រីរបស់នាងទាំងអស់សុទ្ធតែបាននិយាយថានាងមើលទៅដូចបិសាច។ តើមិនឲ្យខ្ញុំបារម្ភយ៉ាងម៉េចទៅ?”

ក្នុងរយៈពេល២ឆ្នាំចុងក្រោយនេះ Yu Ning បានចំណាយលុយជាង១៧ម៉ឺនដុល្លារដើម្បីការវះកាត់តូចធំចំនួន២០ដង។ បំណងប្រាថ្នារបស់នាងនៅពេលឆ្លងកាត់មុខកាំបិតនេះចង់ឲ្យមុខខ្លួនស្អាតដូចតារាសម្ដែងល្បីឈ្មោះ Fan Bingbing ហើយមិត្តភ័ក្ដិរបស់នាងបានប្រាប់ថាឥលូវនេះនាងស្អាតហើយគួរតែបញ្ឈប់ទង្វើនេះទៅ តែនាងនៅតែមិនស្ដាប់។

នារីអាយុ២៩ឆ្នាំរូបនេះ បានប្រាប់ទៅកាន់ទស្សនិកជនថាការកែកុនដែលនាងធ្លាប់ឆ្លងកាត់រួមមានអារថ្គាមឲ្យស្រួចចេញទម្រង់ V line ដាក់ខ្ទង់ច្រមុះ និងកាត់ត្របកភ្នែក២ជាន់។ យ៉ាងណាក៏ដោយ Yu Ning មិនទាន់ពេញចិត្តនឹងសម្រស់ដែលខ្លួនមានសព្វថ្ងៃនោះទេដោយនាងគិតថាភ្នែករបស់ខ្លួននៅតូចពេកនិងថ្គាមរបស់ខ្លួនវែងពេក។

នៅពេលត្រូវសួរថាក្នុងឆ្នាំ ២០១៦នេះ នាងចង់កែអ្វីទៀត Yu Ning បានតបថានាងចង់វះកាត់ឆ្អឹងជើងដើម្បីឲ្យបានខ្ពស់ជាងមុន២ទៅ៣សង់ទីម៉ែត្រទៀត។ គ្រាន់តែឮពាក្យទាំងនេះរបស់កូនស្រីភ្លាម អ្នកម្ដាយវ័យ៦១ឆ្នាំ បានហូរទឹកភ្នែកច្រាវ។ អ្នកស្រីប្រាប់ថាខ្លួនបារម្ភមានថ្ងៃណាមួយកូនស្រីនឹងស្លាប់ក្នុងបន្ទប់វះកាត់ជាក់ជាមិនខាន៕

ចុចអាន៖Fan Bingbing បន្តធ្វើឲ្យគេមើលមិនដាក់ភ្នែកពេលបង្ហាញខ្លួនធ្វើជាគណៈកម្មការ

ប្រែសម្រួល៖ សុវណ្ណផៃ ប្រភព៖shanghaiist