អាល្លឺម៉ង់លត់អ៊ីតាលី ៤-១ ឯព័រទុយហ្គាល់ស៊ីបែលហ្ស៊ិក ២-១ ខណៈអង់គ្លេសចាញ់ហូឡង់
- 2016-03-30 14:25:45
- ចំនួនមតិ 0 | ចំនួនចែករំលែក 0
អាល្លឺម៉ង់លត់អ៊ីតាលី ៤-១ ឯព័រទុយហ្គាល់ស៊ីបែលហ្ស៊ិក ២-១ ខណៈអង់គ្លេសចាញ់ហូឡង់
ចន្លោះមិនឃើញ
ក្រុមឥន្ទ្រីដែកអាល្លឺម៉ង់ ព័រទុយហ្គាល់និងហូឡង់សុទ្ធតែអាចរកជ័យជំនះជូនជាតិ ក្រោយបំបាក់ក្រុមខ្លាំងៗក្នុងតំបន់អឺរ៉ុបដូចគ្នាដូចជា អ៊ីតាលី បែលហ្ស៊ិក និងអង់គ្លេសក្នុងការប្រកួតមិត្តភាពនៅយប់មិញ។
ក្រុមម្ចាស់ជើងឯក World Cup ២០១៤ អាល្លឺម៉ង់បានបើកការនាំមុខមុនដោយកីឡាករ Toni Kroos នៅនាទី២៤ មុនពេល Mario Goetze ជាអ្នករកគ្រាប់ទី២នៅនាទី៤៥ដោយការបញ្ជូនយ៉ាងល្អពីមិត្តរួមក្រុម FC Bayern Munich គឺ Thomas Müller។ ដល់តង់ទី២ អាល្លឺម៉ង់បានបន្ថែម២គ្រាប់ទៀតដោយខ្សែការពារឆ្វេង Jonas Hector នាទី៥៩និងការស៊ុតប៉េណាល់ទីរបស់ Mesut Oezil ប៉ុន្តែ អ៊ីតាលីក៏មិនឲ្យអ្នកគាំទ្រអន់ចិត្តពេកដែរ ដោយអាចបំបែកពងមាន់១គ្រាប់វិញនៅនាទី៨៣ ដោយ Stephan El Shaarawy ។
ងាកទៅមើលព័រទុយហ្គាល់វិញ អតីតកីឡាករ Manchester United ទាំងពីរគឺ Nani និងCristiano Ronaldo ជាអ្នកជួយក្រុមទទួលបានជោគជ័យ។ Nani រកគ្រាប់បាល់បាននៅនាទី២០ ឯ Ronaldoបានតែតបញ្ចូលទីល្អឥតខ្ចោះនៅនាទី៤០។ លុះដល់នាទី៦២ កីឡាករ Romelu Lukaku បានរកមួយគ្រាប់ជូនបែលហ្ស៊ិកវិញផងដែរ។
ចំណែកមួយគូទៀតតោកំណាចអង់គ្លេសបានចាញ់ស្ពឹកមុខលើដីខ្លួនឯងនៅកីឡាដ្ឋាន Wembley ក្រោមស្នាដៃក្រុមហូឡង់។ បើកការប្រកួតតង់ដំបូង អង់គ្លេសជាអ្នករកគ្រាប់បាល់បានមុនដោយកីឡាករកំពុងឡើងជើង Jamie Vardy នាទី៤១ ធ្វើឲ្យអ្នកហ៊ោៗស្ទើរផ្ទុះកីឡាដ្ឋាន។ លុះដល់តង់ទី២ ហូឡង់បានវាយបកបានដល់ទៅ២គ្រាប់ដោយកីឡាករ Vincent Janssen ស៊ុតប៉េណាល់ទីនាទី៥០និង Luciano Narsingh នាទី៧៧។
គូសំខាន់១ទៀតបារាំងលត់រុស្សី ៤-២។ ៤គ្រាប់របស់បារាំងរកបានដោយកីឡាករ Ngolo Kante , Andre-Pierre Gignac ,Dimitri Payet និងKingsley Coman (នាទី ៩, ៣៨,៦៤និង៧៦) ឯរុស្សីធ្វើបានដោយកីឡាករAlexander Kokorin នាទី៥៦និងYuri Zhirkov នាទី៦៨៕
ប្រែសម្រួល៖ ហេង សុធារិទ្ធិ ប្រភព៖ BBC