បុរសប្លន់យន្តហោះអេហ្ស៊ីប ត្រូវឃាត់ខ្លួនក្រោយប្រើគ្រាប់បែកអត្តឃាតក្លែងក្លាយ
- 2016-03-30 14:35:36
- ចំនួនមតិ 0 | ចំនួនចែករំលែក 0
បុរសប្លន់យន្តហោះអេហ្ស៊ីប ត្រូវឃាត់ខ្លួនក្រោយប្រើគ្រាប់បែកអត្តឃាតក្លែងក្លាយ
ចន្លោះមិនឃើញ
បុរសជនប្រដាប់អាវុធជនជាតិអេហ្ស៊ីបម្នាក់ដែលបានបង្ខំឲ្យជើងហោះហើរមួយគ្រឿង របស់ក្រុមហ៊ុនអាកាសចរណ៍អេហ្ស៊ីប EgyptAirដែលធ្វើដំណើរពីទីក្រុង Alexandria ទៅកាន់ទីក្រុង Cairo ប្រទេសអេហ្ស៊ីប ទៅចុះចតនៅសាធារណៈរដ្ឋ Cyprus ភាគខាងជើងប្រទេសអេហ្ស៊ីប ក្នុងសមុទ្រមេឌីទែរ៉ាណេ នារសៀលថ្ងៃអង្គារម្សិលមិញ បានប្រើប្រាស់ខ្សែក្រវាត់គ្រាប់បែកអត្តឃាតក្លែងក្លាយ។ នេះបើតាមការឲ្យដឹងពីមន្ត្រីអាជ្ញាធរ Cyprus។
តាមសារព័ត៌មាន BBC គេមិនទាន់ដឹងច្បាស់ពីគោលបំណងចង់បានរបស់បុរសខាងលើនោះនៅឡើយទេប៉ុន្តែលោកប្រធានាធិបតី ប្រទេស Cyprus បានឲ្យដឹងថា ហេតុការណ៍កើតមានឡើងខាងលើនោះគឺមិនមានពាក់ព័ន្ធនឹងអំពើភេរវកម្មទេ។
រឿងហេតុខាងលើបានបញ្ចប់នៅពេលរាល់អ្នកដំណើរជើងហោះហើរEgyptAir ទាំងអស់ត្រូវបានដោះលែងនៅឯព្រលានយន្តហោះ Larnaca ប្រទេស Cyprus ដោយពុំមាននរណាម្នាក់រងរបួសអ្វីឡើយ ចំណែកឯបុរសខាងលើបានប្រគល់ខ្លួនឲ្យមន្ត្រីអាជ្ញាធរ។
មន្ត្រីអាជ្ញាធរ Cyprus បានដាក់ឈ្មោះឲ្យបុរសប្លន់យន្តហោះខាងលើថា Seif Eldin Mustafa ហើយបានឲ្យដឹងថាបុរសនោះមាន "សតិមិននឹងន"។
រដ្ឋមន្ត្រីការបរទេស Cyprus លោក Ioannis Kasoulides បាននិយាយថា Seif Eldin Mustafa ដំបូងឡើងបានស្នើសុំនិយាយជាមួយប្រពន្ធដើមជនជាតិ Cyprus របស់លោក ដែលប៉ូលិសបានជូននាងទៅព្រលានយន្តហោះ មុនពេលការចរចាគ្នាបានចាប់ផ្ដើម។
គួរបញ្ជាក់ថាក្រោយមកយន្តហោះជើងហោះហើរ Egyptair បានចេញដំណើរពីក្រុងLarnaca ប្រទេស Cyprus នាម៉ោង ១០:០៥នាទីយប់(ម៉ោងក្នុងស្រុក) ទៅដល់ទីក្រុង Cairo ប្រទេសអេហ្ស៊ីបដែលជាគោលដៅដើមរបស់ខ្លួនវិញហើយ៕
ប្រែសម្រួល៖ មាន រតនា ប្រភព៖ BBC