ភាពកក់ក្ដៅនារី ពេលឮពាក្យមួយឃ្លា "នាងជាមិត្តស្រីខ្ញុំ"
- 2016-03-31 17:35:10
- ចំនួនមតិ 0 | ចំនួនចែករំលែក 0
ភាពកក់ក្ដៅនារី ពេលឮពាក្យមួយឃ្លា "នាងជាមិត្តស្រីខ្ញុំ"
ចន្លោះមិនឃើញ
នារីម្នាក់បានមកចែករំលែកបទពិសោធន៍ស្នេហាជាមួយ Sabay ដោយនាងបានប្រាប់ថា នៅពេលផ្ដើមស្រឡាញ់គ្នាហើយ គឺនារីចង់ឮពាក្យមួយឃ្លា ក្រៅពីពាក្យស្រឡាញ់នោះ គឺ "នាងជាមិត្តស្រីខ្ញុំ"។
ក្រោយពីបុរស សំណាង (ឈ្មោះដាក់ឲ្យ) បានសារភាពស្នេហ៍ជាមួយ កញ្ញា វណ្ណី គឺអ្នកទាំងពីរបានចាប់ផ្ដើមមានទំនាក់ទំនងស្នេហាទៅវិញទៅមកអស់រយៈពេល ៣ ឆ្នាំ។
វណ្ណី បាននិយាយថា ការសុំស្នេហ៍ពីដៃគូ គឺជា រឿងដ៏រំភើបមួយរបស់នារីហើយ ហើយកាន់តែរំភើបថែមទៀតនោះ គឺបុរសហ៊ានណែនាំដៃគូឲ្យមនុស្សគ្រប់គ្នាស្គាល់ ជាពិសេស ក្រុមគ្រួសារ។
ទាក់ទងនឹងបញ្ហានេះ វណ្ណី វ័យ ២២ ឆ្នាំ រស់នៅភ្នំពេញ បាននិយាយថា នៅអំឡុងពេលទំនាក់ទំនងបុរសជាដៃគូ មិនដែលប្រាប់មិត្តណាម្នាក់ថា នាងជាមិត្តស្រី ឬ ជាសង្សារឡើយ ដូច្នេះ នាងតែងតែមានអារម្មណ៍ថា មិត្តប្រុសមិនស្រឡាញ់។
"ខ្ញុំចេះតែគិតមិនដឹងគាត់ស្រឡាញ់ខ្ញុំមែន ឬមិនមែន ព្រោះទៅណាមកណាគេមិនដែលប្រាប់មិត្តភ័ក្ដិថា ខ្ញុំត្រូវជាម៉េចជាមួយគាត់ទេ គឺគ្រប់គ្នាដឹងត្រឹមជាមិត្តធម្មតា"។ វណ្ណី និយាយ។
ប៉ុន្តែ ប្រមាណជា ៥ ខែមុន សំណាង បាននាំ វណ្ណី ទៅជួបក្រុមគ្រួសារ និង មិត្តភ័ក្ដិស្និទ្ធដទៃទៀត ហើយនៅពេលគេសួរថា នាងជានរណា សំណាងថា "នាងជាមិត្តស្រីខ្ញុំ"។ ពាក្យមួយឃ្លានេះ វណ្ណី និយាយថា "វាខ្លី ប៉ុន្តែ វាបានផ្ដល់ភាពកក់ក្ដៅដល់រូបខ្ញុំ ខ្ញុំមានអារម្មណ៍ថា គាត់បានចាប់ផ្ដើមផ្ដល់កិត្តិយស និង បើកចំហអំពីទំនាក់ទំនងស្នេហា ហើយមួយជំហានទៀតខ្ញុំរំពឹងថា គេនឹងសុំខ្ញុំរៀបការ ក្នុងពេលឆាប់ៗ"។ វណ្ណី និយាយ។
ចុះប្រិយមិត្តនារីៗផ្សេងទៀតមានយោបល់ដូចម្ដេចដែរ?
អត្ថបទ៖ បុត្រ