បាក់ស្រុតស្ពានអាកាសនៅឥណ្ឌាម្សិលមិញ ២១នាក់បានស្លាប់ និង៨៥រងរបួស
- 2016-04-01 13:59:31
- ចំនួនមតិ 0 | ចំនួនចែករំលែក 0
បាក់ស្រុតស្ពានអាកាសនៅឥណ្ឌាម្សិលមិញ ២១នាក់បានស្លាប់ និង៨៥រងរបួស
ចន្លោះមិនឃើញ
ហេតុការណ៍បាក់ស្រុតសំណង់ស្ពានអាកាសមួយកន្លែង នៅទីក្រុងកុលកាតា រដ្ឋ West Bengal ប្រទេសឥណ្ឌា នារសៀលថ្ងៃទី៣១ ខែមិនាម្សិលមិញ បានធ្វើឲ្យមនុស្សចំនួន២១នាក់បានស្លាប់ និង៨៥នាក់រងរបួស។ នេះបើយោងតាមការចុះផ្សាយរបស់ India Today។
មនុស្សជាច្រើនទៀតត្រូវគេជឿថានៅជាប់ក្រោមគំនរបេតុងបាក់បែក និងបន្ទះដែក ចំណែកក្រុមជួយសង្គ្រោះនៅតែបន្តធ្វើទាំងយប់ ដោយមានការចូលរួមពីប្រជាជនរស់នៅតំបន់នោះផងដែរ។
គួរបញ្ជាក់ដែរថា ឧប្បត្តិហេតុខាងលើបានកើតឡើងក្នុងតំបន់ក្បែរសួន Girish Park ជាសង្កាត់មួយដែលមានមនុស្សរស់នៅច្រើន មានច្រកផ្លូវតូចចង្អៀត មានហាងលក់ទំនិញនិងផ្ទះសង់ជាប់ៗគ្នា។
ចំពោះស្ពានអាកាសបាក់ស្រុតខាងលើមានប្រវែង ១,២ម៉ាយ (២គីឡូម៉ែត្រ) និងស្ថិតក្រោមការសាងសង់ចាប់តាំងពីឆ្នាំ២០០៩ និងមិនទាន់សង់រួចរាល់ជាស្ថាពរនៅឡើយទេរហូតមកដល់បច្ចុប្បន្ន។
មកទល់ពេលនេះ មូលហេតុដែលបណ្ដាលឲ្យមានហេតុការណ៍គ្រោះថ្នាក់ខាងលើភ្លាមៗមិនទាន់មានការបញ្ជាក់ច្បាស់លាស់នៅឡើយទេ ប៉ុន្តែក្រុមហ៊ុនIVRCL ដែលទទួលបន្ទុកម៉ៅការសាងសង់ស្ពានខាងលើ បានឲ្យដឹងថាពួកគេនឹងសហការជាមួយក្រុមស៊ើបអង្កេតដើម្បីរកមូលហេតុឲ្យឃើញ៕
ចុចអាន៖ បាក់ស្រុតស្ពានអាកាសនៅឥណ្ឌាសម្លាប់មនុស្សយ៉ាងតិច១០នាក់ និង១៥០នាក់ជាប់ខាងក្រោម
ប្រែសម្រួល៖ មាន រតនា ប្រភព៖ indiatoday, BBC