តារាចម្រៀងម្នាក់ស្លាប់ភ្លាមៗក្រោយ "ពស់វែក" ចឹកលើឆាក

2016-04-07 15:40:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសឥណ្ឌូណេស៊ីកំពុងព្រួយបារម្ភយ៉ាងខ្លាំងចំពោះការសម្ដែងជាមួយសត្វដ៏មានគ្រោះថ្នាក់របស់តារាចម្រៀងនានានៅក្នុងប្រទេសនេះ។

បណ្ដាញព័ត៌មាន Rappler បានរាយការណ៍ថា តារាចម្រៀង Irma Bule បានទទួលមរណភាពកាលពីថ្ងៃទី៣ខែមេសាមុននេះ ក្រោយពេលត្រូវពស់វែកចឹកនៅលើឆាក។ មុនពេលស្លាប់ នាងនៅតែប្រឹងសម្ដែងឲ្យចប់ការសម្ដែងរបស់ខ្លួន។

Irma Bule ត្រូវពស់ចឹកក្រោយពេលជ្រុលជាន់លើកន្ទុយវា

តាមប្រភពដដែល តារាចម្រៀងជនជាតិឥណ្ឌូណេស៊ីខាងលើបានទៅសម្ដែងនៅភូមិ Karawang ភាគខាងលិចកោះ Java ប្រទេសឥណ្ឌូណេស៊ី។ តាមទម្លាប់ដូចសព្វមួយដង នាងបានឡើងសម្ដែងជាមួយសត្វពស់វែកមួយក្បាល។ ក្រោយពេលសម្ដែងបទទី១ចប់នាងបានអចេតនាជាន់លើកន្ទុយពស់ដែលបានធ្វើឲ្យវាចឹកត្រូវភ្លៅរបស់នាង។

ទស្សនិកជនដែលបានមើលផ្ទាល់នៅទីនោះបានឲ្យដឹងថា៖ "នៅពេលដែលនាងត្រូវពស់ចឹក ពួកយើងសុទ្ធតែឃើញទាំងអស់គ្នា។ ផ្ទៃមុខរបស់នាងចាប់ផ្ដើមប្រែជាស្លេកស្លាំងនិងច្រៀងខ្សោយជាងមុន។ ប៉ុន្តែនាងមិនបានចុះពីឆាកនោះទេ គឺនៅបន្តសម្ដែងរហូតដល់ចប់"។

តារាចម្រៀង Irma Bule

ក្រោយពេលសម្ដែងបាន ៤៥នាទី តារាចម្រៀងអាយុ ២៩ឆ្នាំរូបនេះចាប់ផ្ដើមមានអាការៈវិលមុខ ចង់ក្អួតនិងប្រកាច់ ហើយបានស្លាប់នៅលើផ្លូវទៅមន្ទីរពេទ្យក្រោយពេលបដិសេធមិនព្រមទទួលយកថ្នាំបន្សាបពិសពស់ពីអ្នកស្រុក។

អ្នកជំនាញនៅមន្ទីរពិសោធន៍ Tulala លោកស្រី Lydia Apririasari បានឲ្យដឹងថាការសម្ដែងជាមួយពស់នៅឥណ្ឌូណេស៊ីគឺពេញនិយមខ្លាំងណាស់ ជាពិសេសនៅតំបន់ជនបទ។ "នេះគឺជាទម្លាប់ដ៏គ្រោះថ្នាក់បំផុត។ យើងឃើញថាការស្លាប់របស់ Irma គឺជាការតឿនរំឭកដល់អ្នកគ្រប់គ្នាដែលហ៊ានប្រថុយជីវិតខ្លួនឯងដើម្បីការសម្ដែងដូចនេះ"៕

ចុចអាន៖ល្បីខ្លាំងពេក រូប Song Joong Ki ត្រូវគេយកមកបោះពុម្ពលើលុយខ្មោច

ប្រែសម្រួល៖ សុវណ្ណផៃ ប្រភព៖mirror