យោធារុស្ស៊ីបង្កាត់ពូជឆ្កែចចក សាហាវ និងខ្លាំងរហូតដល់អាចការពារព្រំដែនបាន

2016-04-09 21:45:57
ចំនួនមតិ 0 | ចំនួនចែករំលែក 0

ចន្លោះមិនឃើញ

យោធារុស្ស៊ី ទទួលបានជោគជ័យក្នុងការបង្កាត់ពូជឆ្កែចចកជាមួយឆ្កែស្រុក ឈ្មោះថា Volkosobs (wolf-dog) ដែលមានសមត្ថភាពខ្លាំងរហូតដល់អាចការពារព្រំដែនបាន។

ពូជឆ្កែប្រភេទនេះ ត្រូវអ្នកវិទ្យាសាស្ត្រស្រាវជ្រាវ និងចង់បានយូរមកហើយ ព្រោះសមត្ថភាពវាខ្លាំងគ្មានគូប្រៀប។ ពូជឆ្កែចចកកាត់ឆ្កែស្រុកជាង២០០ក្បាល ត្រូវគេបង្កាត់នៅសាកលវិទ្យាល័យ Cologne ប្រទេសអាល្លឺម៉ង់ ប៉ុន្តែត្រូវបរាជ័យ ដោយសារអត្តចរិតរបស់ឆ្កែប្រភេទនេះ គឺដូចឆ្កែចចក ដែលសាហាវ និងគំរាមកំហែងដល់មនុស្ស។

ឆ្នាំ២០០០ អ្នកវិទ្យាសាស្ត្រ និងអ្នកជំនាញសត្វនៅវិទ្យាស្ថាន Prem Institute of Internal Troops របស់រុស្ស៊ី សម្រេចបានជោគជ័យក្នុងការបង្កាត់ពូជឆ្កែចចកជាមួយឆ្កែស្រុក។ ក្នុងរយៈពេលជាង១០ឆ្នាំមកនេះ volkosob ជាង៤០ក្បាលត្រូវគេបង្កាត់។

Volkosob មានភិនភាគដូចឆ្កែចចក សមត្ថភាពខ្លាំង តែអត្តចរិតកាត់មកឆ្កែស្រុក ពោលគឺរួសរាយ មិនសាហាវចង់ស៊ីសាច់មនុស្សដូចពូជឆ្កែចចកសុទ្ធនោះទេ។ ពូជឆ្កែនេះ មានតម្លៃ ២០០០ដុល្លារ និង៣០០០ដុល្លារ ប៉ុន្តែយោធារុស្ស៊ីមិនលក់ឆ្កែពូជនេះឡើយ។ យ៉ាងណាក៏ដោយ រុស្ស៊ីសុខចិត្តជួលឲ្យអង្គការសន្តិសុខក្នុងស្រុក ក្រោមលក្ខខណ្ឌដ៏តឹងរ៉ឹង។

Volkosob មានសមត្ថភាពហិតក្លិនតាមរកគ្រឿងផ្ទុះ ទំនិញរត់ពន្ធបានយ៉ាងងាយស្រួល។ "ពួកគេចូលចិត្តធ្វើការងារ។ ពេលចូលដល់កន្លែងហ្វឹកហ្វាត់ភ្លាម ពួកគេចាប់ផ្ដើមគ្រហឹមសង្ក្រឺតញេញធ្មេញអន្ទះសាចង់ហាត់តែម្ដង"។ នេះយោងតាមអ្នកបង្ហាត់ Olga Galperina ប្រាប់ឲ្យដឹង។

អ្វីដែលធ្វើពូជឆ្កែប្រភេទនេះមានតម្លៃសម្រាប់យោធារុស្ស៊ី គឺសមត្ថភាពវាពូកែជាងពូជណាៗទាំងអស់។ ពូជ Shepherds របស់អាល្លឺម៉ង់ ប្រើពេល៤នាទី ដើម្បីទិញដឹងពីកន្លែងលាក់ខ្លួនរបស់ឧក្រិដ្ឋជន តែពូជឆ្កែចចកកាត់ឆ្កែស្រុកនេះវិញ ប្រើពេលតែ១៥ ទៅ ២០វិនាទីប៉ុណ្ណោះ។ បើកន្លែងថ្មីវិញ វាគ្រាន់តែមួយរត់ជុំបរិវេណប៉ុណ្ណោះ វានឹងចាប់ផ្ដើមហិតក្លិនតាមដានដឹងភ្លាមទាក់ទងនឹងគ្រឿងញៀន ជនល្មើស ឬគ្រឿងផ្ទុះ។ Volkosob ពូកែហិតក្លិនជាងពូជធម្មតាដល់ទៅ ៦ ដងឯណោះ។

ក្នុងការវាយប្រហារវិញ ពូជឆ្កែនេះវាយប្រហារតែកន្លែងសំខាន់របស់មនុស្សប៉ុណ្ណោះ ពោលគឺផ្នែកត្រង់ក និងសន្លាក់ឆ្អឹង។ ក្នុងពេលវាយប្រហារវិញ វាមិនខ្វល់នឹងសំឡេងកាំភ្លើង ឬគ្រឿងផ្ទុះទេ តែវាផ្តោតលើការងាររបស់វាប៉ុណ្ណោះ។