មុនថ្ងៃចូលឆ្នាំខ្មែរ ភ្នំពេញស្ងាត់បណ្ដើរៗហើយ

2016-04-12 16:17:15
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតត្រឹមព្រឹកថ្ងៃទី ១២ ខែ មេសា នេះ ស្ថានភាពនៅតាមដងផ្លូវមួយចំនួននៅក្នុងរាជធានីភ្នំពេញ គឺចាប់ផ្ដើមស្ងាត់បណ្ដើរហើយ ដោយសារប្រជាពលរដ្ឋមួយចំនួនបានឈប់សម្រាក ដើម្បីធ្វើដំណើរទៅស្រុកកំណើត ដើម្បីចូលរួមអបអរពិធីចូលឆ្នាំខ្មែរ។

សោភ័ណ្ឌ ដែលជា កម្មការិនីរោងចក្រមួយកន្លែង នៅចាក់អង្រែក្រោម បានប្រាប់ Sabay ថា ដោយសារតែស្រុកកំណើតនៅឆ្ងាយរហូតដល់បន្ទាយមានជ័យ ដូច្នេះ នាងបានសម្រេចឈប់សម្រាកមុនមួយថ្ងៃ ដើម្បីធ្វើដំណើរទៅជួបជុំបងប្អូន ដើម្បីអបអរឆ្នាំថ្មី។

ក្រលេកមកមើលស្ថានភាពក្រុមហ៊ុនមួយចំនួននៅក្នុងរាជធានីភ្នំពេញ គេក៏សង្កេតឃើញមានការបិទទ្វារបណ្ដើរៗដែរ ដើម្បីទុកឱកាសឲ្យបុគ្គលិកដែលមានស្រុកកំណើតនៅខេត្តឆ្ងាយៗ បានចូលរួមពិធីបុណ្យដ៏ធំរបស់ប្រទេសកម្ពុជា។ ប៉ុន្ដែ ស្ថានភាពនៅតាមបេនឡានវិញ គេសង្កេតឃើញមានមនុស្សច្រើន ដោយប្រជាពលរដ្ឋមួយចំនួនបានសម្រុកចេញពីក្រុង ដើម្បីទៅតាមបណ្ដាខេត្តនៃស្រុកកំណើតរៀងៗខ្លួន។

លំហូរនៃប្រជាជន ដែលបានចេញពីក្រុង តាំងពីម្សិលមិញ រហូតមកដល់ថ្ងៃនេះ គេសង្កេតឃើញថា នៅតាមបណ្ដាផ្លូវមួយចំនួន គឺមិនសូវមានការកកស្ទះចរាចរខ្លាំងនោះទេ។ កាន់តែលែងស្ទះ នៅព្រឹកថ្ងៃទី ១២ នេះ គឺផ្លូវមួយចំនួនស្ងាត់បណ្ដើរៗហើយ ខណៈពិធីបុណ្យចូលឆ្នាំខ្មែរ ដែលនឹងប្រព្រឹត្តិទៅគិតចាប់ពីថ្ងៃទី ១៣-១៦ ខែ មេសា៕

សូមទស្សនា រូបភាពនៅផ្លូវមុន្នីវង្ស នាព្រឹកនេះ តើស្ថានភាពដូចម្ដេចដែរ?