វត្តថៃល្បីចិញ្ចឹមខ្លា១៤៧ក្បាល ទទួលសិទ្ធិសង់សួនសត្វជាផ្លូវការ

2016-04-28 18:37:02
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយកដ្ឋានអភិរក្សព្រៃឈើ សត្វព្រៃ និងសួនសត្វ បានយល់ព្រមប្រគល់អាជ្ញាប័ណ្ណសង់សួនសត្វជាផ្លូវការទៅឲ្យវត្តចិញ្ចឹមខ្លា Pa Luangta Bua Yannasampanno ក្នុងខេត្តកានចាណាបុរី ក្រោយពីរងការរិះគន់ពីក្រុមសកម្មជនសិទ្ធិសត្វ។

វត្តពេញនិយមសម្រាប់អ្នកទេសចរនេះ បានរកចំណូលប្រមាណ ៣លានដុល្លារក្នុងមួយឆ្នាំពីភ្ញៀវទេសចរ ចង់លេង ចង់មើល និង Selfie ជាមួយសត្វខ្លាទាំង ១៤៧ក្បាល។ មុនទទួលបានសិទ្ធិ វត្តនេះបានរងការចោទប្រកាន់អស់រយៈពេលជាយូរឆ្នាំថា ជាកន្លែងចិញ្ចឹមខ្លាសម្រាប់លក់ដូរ និងធ្លាប់មានមន្ត្រីចុះធ្វើអធិការកិច្ចផងដែរ តែរកមិនឃើញដូចការចោទ។

កាលពីឆ្នាំ ២០១៥ នាយកដ្ឋានខាងលើធ្លាប់ទាមទារ វត្តនេះឲ្យប្រគល់សត្វខ្លាទាំងអស់ឲ្យអាជ្ញាធរគ្រប់គ្រង ពីព្រោះវត្តមិនបានទទួលការអនុញ្ញាតឲ្យចិញ្ចឹម។ អាជ្ញាប័ណ្ណរក្សាទុកខ្លាលើកដំបូងត្រូវបានផុតកំណត់ក្នុងឆ្នាំ ២០១៣ តែអាជ្ញាធរមិនព្រមពង្រីកសុពលភាពបន្ថែមរហូតដល់ពេលនេះ។ អាជ្ញាប័ណ្ណថ្មីនឹងផុតកំណត់ត្រឹមថ្ងៃទី ១៨មេសា ឆ្នាំ ២០២១។ ទោះជាយ៉ាងណា នាយកដ្ឋានបាននាំខ្លាចេញពីវត្តអស់ចំនួន ១០ក្បាលរួចទៅហើយ។

បើតាមប្រភពក្រុមហ៊ុនទទួលសាងសង់សួនក្នុងវត្តឈ្មោះ Pol. Col.Supitpong និយាយថា "យើងនឹងសាងសង់សួនសត្វលើដីចំនួន ៤ហិចតា ហើយគម្រោងបញ្ចប់នៅ៦ខែក្រោយ"។ សូមបញ្ជាក់ថា វត្តខាងលើបានចិញ្ចឹមខ្លាលើកដំបូងក្នុងឆ្នាំ ១៩៩៩ ក្រោយអ្នកភូមិចាប់បានកូនខ្លា រួចប្រគល់ឲ្យវត្តជួយចិញ្ចឹម។ ប៉ុន្មានថ្ងៃក្រោយមក អ្នកភូមិរកបាន និងប្រគល់កូនខ្លាឲ្យ ៦ ឬ៧ក្បាលបន្ថែមទៀត រហូតកើតកូនពូនជាចៅដល់បច្ចុប្បន្នតែម្ដង៕