Villarreal ធ្វើឲ្យ Liverpool ចុកឈាមនៅចុងម៉ោងយប់មិញ

2016-04-29 15:03:21
ចំនួនមតិ 0 | ចំនួនចែករំលែក 0

ចន្លោះមិនឃើញ

មហិច្ឆតារបស់ក្រុមហង្សក្រហម Liverpool ដែលចង់ឡើងដល់វគ្គផ្ដាច់ព្រ័ត្រពានរង្វាន់អឺរ៉ុបលើកដំបូងក្នុងរយៈពេលជិត១ទសវត្សរ៍ កំពុងស្ថិតក្នុងភាពស្រពិចស្រពិលហើយ បន្ទាប់ពីភ្លាត់ចាញ់ Villarreal ១-០ នៅចុងម៉ោងនាទីទី៩០+២ នៃពាន UEFA Europa League ជើងទី១ វគ្គ៤ក្រុមចុងក្រោយ នៅអេស្ប៉ាញយប់មិញ។

ក្រុមទាំង២នេះ មានសាច់បាល់លេងប្រហាក់ប្រហែលគ្នា ប៉ុន្តែ Liverpool ហាក់មានឱកាសស៊ុតច្រើនដងជាងបន្តិច។ យ៉ាងណា ម្ចាស់ផ្ទះ Villarreal បានស៊ុត១គ្រាប់ជ័យជម្នះដ៏សំខាន់បំផុតនៅចុងម៉ោង ដោយកីឡាករបម្រុងទើបដូរចូល Adrian Lopez បន្ទាប់ពី Denis Suarez បញ្ជូនឲ្យ។

Liverpool ខកខានឡើងវគ្គផ្ដាច់ព្រ័ត្រពានរង្វាន់អឺរ៉ុប រយៈពេល៩ឆ្នាំមកហើយ គិតចាប់តាំងពីចាញ់ AC Milan នៅ UEFA Champions League កាលឆ្នាំ២០០៧។

ការប្រកួតជើងទី២ នឹងត្រូវធ្វើឡើងនៅថ្ងៃព្រហស្បតិ៍សប្ដាហ៍ក្រោយ នាកីឡដ្ឋាន Anfield ទឹកដីអង់គ្លេសវិញម្ដង ខណៈដែលអ្នកឈ្នះគូនេះ នឹងឡើងទៅប៉ះម្ចាស់ជើងឯក Sevilla ឬ Shakhtar Donetsk ដែលបញ្ចប់លទ្ធផលស្មើគ្នា ២-២ កាលពីយប់មិញដែរ៕