ភ្នំពេញក្រោនអាចសងសឹកក្រុមបឹងកេតអង្គរបានអត់ល្ងាចនេះ?
- 2016-04-30 17:25:52
- ចំនួនមតិ 0 | ចំនួនចែករំលែក 0
ភ្នំពេញក្រោនអាចសងសឹកក្រុមបឹងកេតអង្គរបានអត់ល្ងាចនេះ?
ចន្លោះមិនឃើញ
ល្ងាចម៉ោង៦នេះ ក្រុមភ្នំពេញក្រោននឹងបើកទ្វារកីឡដ្ឋាន RSN របស់ខ្លួនស្វាគមន៍ក្រុមភ្ញៀវជើងខ្លាំង បឹងកេតអង្គរ ក្នុងសប្ដាហ៍ទី៦ ពានរង្វាន់លីគកំពូលកម្ពុជា Metfone Cambodian League ។ កាលពីចុងរដូវកាលមុន បឹងកេតធ្លាប់បំបាក់ក្រោន ៤-២ ម្ដងមកហើយនៅស្ដាតចាស់ ដូច្នេះចាំមើលនៅល្ងាចនេះ ថាតើក្រុមរបស់ Sam អាចសងសឹកវិញបានដែរឬអត់?
លោក ប្រាក់ សុវណ្ណារ៉ា ដែលជាគ្រូបង្វឹកក្រុមបឹងកេតអង្គរបាននិយាយថា ប៉ះក្រោនគឺជាប្រកួតសំខាន់ខ្លាំង។ ដូច្នេះកូនក្រុមរបស់លោកត្រូវរៀបចំខ្លួនឱ្យល្អ ដើម្បីត្រៀមប្រកួតមួយនេះ។ ក្រោននៅរដូវកាលនេះក្រោមការដឹកនាំរបស់ Sam គឺលោកប្រាក់ សុវណ្ណារ៉ា មើលឃើញថា មិនសូវជាមានការខុសប្លែកអ្វីទេ ដូច្នេះលោករំពឹងថា បឹងកេតនឹងធ្វើបានល្អ។
ដូចគ្នានេះដែរ លោក Sam Schweingruber គ្រូបង្វឹកក្រុមភ្នំពេញក្រោនបានបញ្ជាក់ដែរថា បឹងកេតជាក្រុមខ្លាំង ព្រោះមានកីឡាករល្អៗច្រើន ជាពិសេសកីឡាករបរទេស។ ទោះយ៉ាងនេះក្ដី ប្រសិនបើកូនក្រុមរបស់លោកប្រឹងប្រែងឱ្យអស់សមត្ថភាព នោះសង្ឃឹមភាគរយឈ្នះគឺនៅតែមានដដែល។
ចំពោះជើងកីឡាកររបស់ក្រុមទាំងពីរវិញគឺក្រុមភ្នំពេញក្រោនត្រូវអវត្តមានកីឡាករសំខាន់ Booyen Shane ដែលកំពុងសម្រាកព្យាបាលរបួសនៅអាហ្វ្រិក ខណៈដែលកែវ សុខផេង និងធារី ចន្ថាប៊ីន សុទ្ធតែអាចចូលលេងបានវិញអស់ហើយ។ ចំណែកឯក្រុមបឹងកេតវិញ លោក ប្រាក់ សុវណ្ណារ៉ា បានបញ្ជាក់ថា កូនក្រុមទាំងអស់មិនមានបញ្ហាអ្វីនោះទេ។
ប្រវត្តិជួបគ្នារបស់ក្រុមទាំងពីរបើគិតត្រួសៗទៅ គឺ១១ប្រកួតកន្លងមកនេះ ភ្នំពេញក្រោនឈ្នះបានតែ៤ដងប៉ុណ្ណោះ ដោយក្រៅពីនោះចាញ់៦ដង និងស្មើ១ដង។ នៅរដូវកាលមុន ក្រុមទាំងពីរនេះប៉ះគ្នាគឺជើងទីមួយក្រោនស្មើ ០-០ នៅទឹកដីខ្លួនឯង ហើយជើងទីពីរនៅដីបឹងកេតវិញ ចាញ់ដោយលទ្ធផល ៤-២ ។
ខាងក្រោមនេះជាវីដេអូសម្ដីផ្ទាល់របស់ក្រុមទាំងពីរ៖
វេលាម៉ោង៦ល្ងាចនៅថ្ងៃនេះដែរ ក៏មានមួយប្រកួតទៀតដែរនៅពហុកីឡដ្ឋានជាតិ ដោយក្រុមស៊ីម៉ាក់នឹងត្រូវប្រកួតជាមួយក្រុមណាហ្គាវើល៕
អត្ថបទ៖ មុន្នី រម្យ