អេនឌី ខឹងអ្នកជំនាន់ក្រោយ យកបទលោកមកច្រៀងគ្មានសុំការអនុញ្ញាត

2016-04-30 17:36:17
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកនេះ តារាចម្រៀង និងសម្ដែង អេនឌី បានប្រាប់ Sabay ថា លោកមានការអន់ចិត្តខ្លាំង ក្រោយពីបទចម្រៀងរបស់លោកមួយបទមានចំណងជើងថា "នឹកបង៥០%ផង" ត្រូវផលិតកម្មក្នុងស្រុកមួយយកមកច្រៀង និងថតជាវីដេអូចម្រៀងដោយមិនសុំការអនុញ្ញាតពីលោក។

បទ "នឹកបង៥០%ផង" លោក អេនឌី ប្រាប់ថាលោកបាននិពន្ធ និងច្រៀងដោយខ្លួនឯង កាលពីប្រមាណ១០ឆ្នាំមុន។ ឥឡូវបទនេះ ត្រូវបានផលិតកម្ម នេត្រា យកមកថតជាវីដេអូចម្រៀង ដែលច្រៀងដោយលោក ពៅ ពេជ្រ។ បញ្ហានេះសាមីខ្លួន អេនឌី បានបញ្ជាក់ថា លោក អន់ចិត្តយ៉ាងខ្លាំងលើរឿងនេះ។

បទ "នឹកបង ៥៦០% ផង" របស់ អេនឌី

"បទនេះ គឺជាបទរបស់ខ្ញុំផ្ទាល់ និងតែងទំនុកច្រៀងដោយខ្ញុំបាទផ្ទាល់ លំនាំបទបរទេស តែបែរជាត្រូវប្អូន ពៅ ពេជ្រ ជាតារាចម្រៀងថ្មីគាត់យកច្រៀងបទរបស់ខ្ញុំមកច្រៀងហើយថត MV ធ្វើព្រងើយ ដោយគ្មានសុំការអនុញ្ញាតពីខ្ញុំមួយម៉ាត់សោះ តើសមរម្យរឺអត់? “។

តារាប្រុសរូបនេះ បន្តថា បើទោះជាយកទៅច្រៀងក៏ដោយ ប៉ុន្តែបើត្រឹមតែច្រៀងលើឆាកតន្ត្រីអីនោះ លោកមិនប្រកាន់ទេ។ "បើគាត់យកមកថតច្រៀងធម្មតា រឺច្រៀងតាមស្ថានីយទូរទស្សន៍ផ្សេងៗ នោះខ្ញុំមិនថាអីទេ តែនេះគាត់ចំលងទាំងទំនុកហើយថតជា MV ទៀត ដូចវាហួសហេតុពេកហើយ...!។

លោក អេនឌី ដែលបច្ចុប្បន្នកំពុងដើរកម្សាន្តនៅប្រទេសជប៉ុននោះ បានបញ្ជាក់ទៀតថា លោកក៏មិនថាអីដែរ ប្រសិនផលិតកម្មខាងលើ ចង់ធ្វើបទនេះសារជាថ្មីឡើងវិញ ដោយគ្រាន់តែនិពន្ធទំនុកច្រៀងថ្មីដោយខ្លួនឯងទៅបានហើយ ព្រោះបទភ្លេងមិនមែនជារបស់លោកនិពន្ធទេ ឬហោចណាស់ ក៏គួរសុំសិទ្ធិពីលោកមួយម៉ាត់ក៏បាន ប្រសិនមិនចង់ចំណាយពេលនិពន្ធទំនុកថ្មី។

"វាមិនត្រឹមត្រូវ ព្រោះវាជាគំនិតរបស់ខ្ញុំទាំង ខ្ញុំមិនសប្បាយចិត្តនឹងទង្វើខុសឆ្គងរបស់ប្អូនទេ គួរពិចារណាឡើងវិញផង តើសាកសមរឺអត់ ដែលប្អូនធ្វើរបៀបនេះ? ហើយលោកដែលជាម្ចាស់ផលិតកម្ម ហេតុអីគាត់អាចធ្វើទៅរួច ខ្ញុំដូចជាឆ្ងល់ដល់ហើយ គាត់មានគិតខ្លះដែរអត់ ថាខុសរឺត្រូវនោះ? ( គំនិតគួរពិចារណា)។ អេនឌី បន្ថែម។

បទ "នឹកបង៥០%ផង" ថតជាវីដេអូចម្រៀងថ្មីដោយផលិតកម្ម នេត្រា

យ៉ាងណាបញ្ហានេះដដែល អេនឌី បញ្ជាក់ទៀតថា លោកមិនសប្បាយចិត្តខ្លាំង ព្រោះថា បញ្ហាខាងលើ បានធ្វើឲ្យប៉ះពាល់ដល់ផែនការធំរបស់លោក ចំពោះបទចម្រៀងតែមួយគត់ដែលលោកនិពន្ធដោយខ្លួនឯង កាលគ្រាដែលលោកបានជួបប្រទះស្នេហាគ្រាដំបូង។ "ខ្ញុំកំពុងនិយាយជាមួយផលិតកម្មមួយ ដើម្បីចេញMVហើយគេកំពុងរកនឹកសាច់រឿង ព្រោះខ្ញុំចង់ធ្វើអោយវាល្អបំផុត ទាំងតួសំដែងស្រីផងដែរ កំពុងរកនឹកតែឥឡូវមកលួចយើងស្រស់ៗ អញ្ចឹងមិនដឹងនិយាយយ៉ាងម៉េច"។

ពាក់ព័ន្ធនឹងបញ្ហានេះ ភាគីខាងផលិតកម្ម នេត្រា មិនទាន់អាចទំនាក់ទំនងសុំការអធិប្បាយបានទេនៅព្រឹកនេះ៕