២៩ក្រុមចូលរួមប្រកួតពាន ស្វាយរៀងខាប់ លើកទី២ ឆ្នាំ២០១៦នេះ

2016-04-30 19:12:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ពានរង្វាន់ជើងឯកពានរង្វាន់ ស្វាយរៀងខាប់បានវិលមកដល់ទៀតហើយដោយឆ្នាំ២០១៦នេះជាការប្រកួតលើកទី២។ ការចាប់ពូលកាលពីម្សិលមិញ ថ្ងៃទី២៩ ខែមេសា ឆ្នាំ២០១៦បង្ហាញថា ក្រុមចូលរួមប្រកួតទាំងអស់ចំនួន២៩ក្រុមដែលត្រូវបានបែងចែកជា៨ពូល ប៉ុន្តែ៣ពូលចុងក្រោយមានតែ៣ក្រុមប៉ុណ្ណោះក្នុងមួយពូល។

ពានរង្វាន់បាល់ទាត់ស្វាយរៀង ខាប់លើកទី២ ឆ្នាំ២០១៦ មានការចូលរួមទាំងអស់ចំនួន២៩ក្រុម ទូទាំងខេត្តស្វាយរៀង ដោយក្នុង១ក្រុមមានកីឡាករចំនួន២៣នាក់ ដែលធ្វើការប្រកួតរាល់ថ្ងៃសៅរ៍ អាទិត្យ និងថ្ងៃបុណ្យឈប់សម្រាកផ្សេងៗ ដើម្បីផ្តល់ភាពងាយស្រួលដល់ កីឡាករជាមន្ត្រីរាជការ អង្គការ ស្ថាប័នក្រុមហ៊ុនផ្សេងៗ អាចមានលទ្ធភាពចូលរួមប្រកួតបាន។

គោលបំណងក្នុងការរៀបចំពានរង្វាន់នេះឡើងដើម្បីលើកស្ទួយវិស័យកីឡា ផ្តល់ភាពសប្បាយរីករាយដល់ស្រទាប់មហាជន និងជំរុញឲ្យយុវជន យកពេលវេលា មកចូលរួមលេងកីឡា ជៀសវាងទៅប្រព្រឹត្តអំពើអបាយមុខផ្សេងៗ ដែលសង្គមស្អប់ខ្ពើម។ ពានរង្វាន់នេះ រៀបចំឡើងដោយ សមាគមកីឡាបាល់ទាត់ ខេត្តស្វាយរៀង សហការជាមួយសហភាពសហព័ន្ធយុវជនកម្ពុជា ខេត្តស្វាយរៀង ដែលមានឯកឧត្តម ឌី វិជ្ជា ជាប្រធាន ហើយឯកឧត្តមតែងតែយកចិត្តទុកដាក់ជានិច្ច នូវការលើកស្ទួយវិស័យកីឡាបាល់ទាត់ក្នុងខេត្ត ដោយមានគម្រោងរៀបចំការប្រកួត ឲ្យមានរៀងរាល់ឆ្នាំ ទាំងពានរង្វាន់មហាជន ក្រោមអាយុ១៥ និង១៧ឆ្នាំ ព្រមទាំងពានរង្វាន់នារីផងដែរ។

ពានរង្វាន់ស្វាយរៀងខាប់ ឆ្នាំ២០១៦នេះ ជាលើកទី២ ដែលបានរៀបចំឡើង ដោយលើកទី១ បានរៀបចំនៅឆ្នាំ២០១៥ ដែលមានក្រុមចូលរួមចំនួន៣៣ក្រុម ហើយធ្វើការប្រកួតនៅលើស្មៅសិប្បនិម្មិត ៩នាក់ ក្នុងវគ្គជំរុះក្នុងពូល និងវគ្គខ្វែងទើបមកប្រកួត នៅលើទីលានស្មៅធម្មជាតិ១១នាក់។

ការប្រកួតលើកទី១ បទបញ្ជាបច្ចេកទេស បានកំណត់ថា កីឡាករគ្រប់ខេត្តក្រុង ដ៏ទៃអាចចូលរួមប្រកួតបាន ប៉ុន្តែការប្រកួតលើកទី២ ដោយមានសំណូមពរ ពីក្រុមក្នុងខេត្តច្រើន ទើបចេញបទបញ្ជាថ្មី កំណត់ឲ្យតែកីឡាករ ក្នុងខេត្ត ឬកីឡាករដែលមានការងារនៅក្នុងខេត្តទើបអាចចូលរួមបាន៕