សុវណ្ណ ស៊ុតឲ្យ បឹងកេត ឈ្នះ ភ្នំពេញក្រោន ១-០ ឯណាហ្គាឈ្នះស៊ីម៉ាក់ ៣-១

2016-05-01 02:56:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងឯកចាស់ភ្នំពេញក្រោនបានទទួលរងបរាជ័យដោយក្រុមភ្ញៀវបឹងកេតអង្គរដោយលទ្ធផល ១-០ នៅទឹកដីរបស់ខ្លួនសម្រាប់ការប្រកួតសប្ដាហ៍ទី៦ ពានរង្វាន់បាល់ទាត់ជ្រើសរើសជើងឯកជាតិប្រចាំឆ្នាំ២០១៦។

ក្រុមបឹងកេតអង្គរ

នៅកីឡដ្ឋាន RSN ដែលមានអ្នកគាំទ្រចូលទស្សនាយ៉ាងច្រើនកុះករសម្រាប់តង់ទីមួយមិនមានក្រុមខាងណាមួយក៏ដូចជាអ្នកគាំទ្រមិនសប្បាយចិត្តនោះទេ បន្ទាប់ពីក្រុមទាំងពីរបានបញ្ចប់ទៅដោយគ្មានគ្រាប់បាល់ទម្លាយសំណាញ់ទីគ្នា។ ចូលដល់តង់ទីពីរបឹងកេតអង្គរនៅតែព្យាយាមវាយសម្រុកដូចតង់ទីមួយរហូតអាចបំប៉ោងសំណាញ់ទីបាន១គ្រាប់ដោយខ្សែការពារ សុខ សុវណ្ណ នៅនាទីទី៧១។

បន្ទាប់ពីក្រុមភ្ញៀវនាំមុខ ក្រុមម្ចាស់ផ្ទះភ្នំពេញក្រោនបានព្យាយាមវាយសម្រុក ប៉ុន្តែមិនអាចរកគ្រាប់បាល់ទម្លាយសំណាញ់ទីរបស់បឹងកេតអង្គរឡើយ។ ផ្ទុយទៅវិញ ការប្រកួតបានបង្កើតការតឹងសរសៃកដាក់គ្នាតាមរយៈការប៉ះទង្គិច។ ទីបំផុតលោកអាជ្ញាកណ្តាលបានសម្រេចពិន័យកាតក្រហមមួយម្នាក់សម្រាប់ក្រុមទាំងពីរគឺ ហុង ផេង របស់បឹងកេតអង្គរ និង Jang In Yong របស់ភ្នំពេញក្រោន។ ទោះជាយ៉ាងណាការប្រកួតបានបញ្ចប់ដោយ បឹងកេងយកឈ្នះភ្នំពេញក្រោន ១-០។

ចំណែកនៅពហុកីឡដ្ឋានជាតិម៉ោងដំណាល់គ្នា ក្រុមណាហ្គាវើលបានយកឈ្នះក្រុមមជ្ឈមណ្ឌលកម្ចាត់មីនកម្ពុជា(ស៊ីម៉ាក់)ដោយលទ្ធផល ៣-១ ទោះជាខ្សែបម្រើ គួច សុកុម្ភៈរងរបួសរហូតត្រូវបានបញ្ជូនទៅកាន់មន្ទីរពេទ្យនៅតង់ទីមួយ៕