ថ្នាក់ដឹកនាំ នៃក្រុមហ៊ុនល្បីឈ្មោះ២រូប ក្លាយជាអ្នកបម្រើ ក្នុងទិវាពលកម្មអន្តរជាតិ
- 2016-05-02 15:55:28
- ចំនួនមតិ 0 | ចំនួនចែករំលែក 0
ថ្នាក់ដឹកនាំ នៃក្រុមហ៊ុនល្បីឈ្មោះ២រូប ក្លាយជាអ្នកបម្រើ ក្នុងទិវាពលកម្មអន្តរជាតិ
ចន្លោះមិនឃើញ
អគ្គនាយក និងគណៈគ្រប់គ្រងរបស់ក្រុមហ៊ុន RMA Cambodia ចំនួន២រូប ត្រូវបានគេប្រទះមកធ្វើជាអ្នករត់តុ ដោយលើកអាហារបម្រើភ្ញៀវនៅហាង BBQ និងមួយកន្លែងទៀតនៅ The Pizza Company កាលពីម្សិលមិញ។
បុរសស្លៀកឯកសណ្ឋានពណ៌ទឹកក្រូច ត្រូវបានគេស្គាល់ថា ជាលោក ងន សាំង អគ្គនាយកក្រុមហ៊ុន RMA Cambodia កំពុងកត់អាហារដែលភ្ញៀវកុម្មង់ ព្រមទាំងលើកភេសជ្ជៈជូនភ្ញៀវពិសាយ៉ាងញញឹមរស់រាយ ដោយខុសពីសកម្មភាពការងារប្រចាំថ្ងៃរបស់លោក ពាក់ក្រវាត់កអាវធំក្នុងម៉ាស៊ីនត្រជាក់ធ្វើការយ៉ាងម៉ឺងម៉ាត់។
លោក បានបញ្ជាក់ថា នេះមិនមែនជាលើកទី១ទេសម្រាប់លោក ក្នុងការមកបំពេញការងារតាមអាហារដ្ឋានផ្សេងៗបែបនេះ។ កន្លងមកលោកធ្លាប់ស្ម័គ្រចិត្តធ្វើជាចម្អិនភីហ្សា ជាអ្នកឆុងកាហ្វេទៀតផង។
លោកបានប្រាប់ពីមូលហេតុដែលមកធ្វើជាអ្នកបម្រើថា ៖ “ខ្ញុំបានផ្ដួចផ្ដើមធ្វើបែបនេះឡើងដើម្បីសិក្សាពីស្ថានភាពជាក់ស្ដែងរបស់បុគ្គលិក ដែលបម្រើការតាមហាង។ វាអាចឲ្យយើងដឹងពីតម្រូវការរបស់ពួកគាត់ហើយអាចស្វែងយល់ពីកង្វះខាតដែលយើងមាន ដើម្បីធ្វើការកែតម្រូវ ព្រមទាំងបង្កើនភាពស្និទ្ធស្នាលរវាងថ្នាក់ដឹកនាំ និងបុគ្គលិកនៅតាមហាងផងដែរ ”។
មិនខុសគ្នាប៉ុន្មាន គណៈគ្រប់គ្រងទូទៅនៃក្រុមហ៊ុន EFG លោក ទេព វិរៈ កំពុងបម្រើនិងលើកអាហារជូនភ្ញៀវក្នុងទិវាពលកម្មអន្តរជាតិ ក៏ចង់បញ្ជាក់ពីឆន្ទៈរបស់ថ្នាក់ដឹកនាំរបស់ខ្លួនថាតែងតែផ្ដល់ឱកាសនិងត្រូវបានយកចិត្តទុកដាក់ស្មើៗគ្នា ព្រមទាំងស្ដែងពីសកម្មភាពរៀនសូត្រពីគ្នាទៅវិញទៅមក ដើម្បីបង្កើនទំនាក់ទំនងជាមួយបុគ្គលិក និងមើលឃើញពីផលលំបាករបស់ពួកគាត់។
ការបង្ហាញខ្លួនជាអ្នកបម្រើរបស់ថ្នាក់ដឹកនាំទាំងពីរូបនេះ ធ្វើឲ្យអតិថិជនម្នាក់ភ្ញាក់ផ្អើលក្រោយកញ្ញាមិនបានដឹងជាមុនថា CEO ក៏ដូចជា Manager នៃក្រុមហ៊ុនធំមួយមកបម្រើអាហារដល់ភ្ញៀវដូច្នេះ។ កញ្ញា លីនដា កំពុងទទួលទានភីហ្សាយល់ថា នេះជាសកម្មភាពល្អដែលថ្នាក់ដឹកនាំសុខចិត្តដាក់ខ្លួនមកបំពេញនាទីបែបនេះ ដែលជារឿងកម្រមួយ ហើយវាក៏ជាសារដល់អ្នកគ្រប់គ្រងដទៃទៀតឲ្យចេះយល់ទុក្ខលំបាករបស់អ្នកក្រោមបង្គាប់ផងដែរ៕
អត្ថបទ៖ លឹម សុនា