ពៅ ពេជ្រ តបទៅ អែនឌី រឿងយកបទ "នឹកបង៥០%ផង" មកច្រៀងអត់សុំការអនុញ្ញាត

2016-05-02 17:47:31
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងពន្លកថ្មី ពៅ ពេជ្រ ថ្លែងមកកាន់ Sabay ថាការយកបទលោក អែន ឌី មកផលិតជា MV ព្រោះតែការស្រលាញ់ និងចង់គាស់រំលើងឡើងវិញនូវបទចម្រៀងចាស់ៗហើយមុននឹងចេញ MV បទនេះលោកបានដាក់ថា Cover Song រួចហើយ។

"មុននឹងខ្ញុំច្រៀង ខ្ញុំបានដាក់ពាក្យថា Cover រួចហើយ ចឹងខ្ញុំមិនបានធ្វើ ឬលួចមកទេ" ។ នេះជាការលើកឡើងរបស់ ពៅ ពេជ្រ អ្នក Cover បទ អែន ឌី ក្រោយពីលោក ត្រូវម្ចាស់ទំនុក(អេនឌី)រូបនេះ ប្រតិកម្មថា ហេតុអ្វីយកបទលោកមកច្រៀង និងថត MV គ្មានការអនុញ្ញាត។

បទ"នឹកបង៥០%" របស់ អែនឌី

អេនឌី ខឹងអ្នកជំនាន់ក្រោយ យកបទលោកមកច្រៀងគ្មានសុំការអនុញ្ញាត

ក្នុងនាមជាតារាចម្រៀងជំនាន់ក្រោយម្នាក់ ពិធីករ ទីណា ហៅ ពៅពេជ្រ បញ្ជាក់ថា ទាំងអស់នេះ គឺដោយសារតែស្រលាញ់ ហើយបទនេះមិនទាន់មានវីដេអូ និងមិនមែនជាបទ Original ទើបលោកយកមក Cover ផលិតជា MV ដូច្នេះ។

បទ "នឹកបង៥០%" Cover ដោយលោក ពៅ ពេជ្រ

ពៅពេជ្រ ថ្លែង ៖"មកពីខ្ញុំស្រលាញ់បទនឹង ហើយដោយមិនទាន់មាន MV ម្យ៉ាងក៏មិនមែនជាបទ Original នៅពេលខ្ញុំធ្វើ ខ្ញុំបានដាក់ពាក្យថា Cover រួចហើយ។ សម្រាប់អ្នកសិល្បៈគេយល់គ្រប់តែគ្នាហ្នឹង ចុះបទ អាណែតមាសបង គេក៏យកមកធ្វើជា MV ថ្មី ដូចគ្នាសួរថាតើលោកពូ ហួ ឡាវី គាត់និយាយអត់? នោះគឺមកពីគាត់យល់ពាក្យថា Cover"។

ទន្ទឹមនឹងការស្រលាញ់ និងគាំទ្រអត្ថន័យនៃបទចម្រៀងនេះ ពៅ ពេជ្រ លើកឡើងថា ការ Cover និង ផលិត MV បទនេះ លោកមិនបានយកទៅដាក់លក់នៅលើទីផ្សារឡើយ ទាំងអស់ គឺដោយសារតែការស្រលាញ់ប៉ុណ្ណោះ ទើបលោកធ្វើ។

បន្ថែមលើសនេះ លោក ពៅ នេត្រា អ្នកគ្រប់គ្រងនៅក្នុងផលិតកម្មនេត្រា បានឲ្យដឹងថា ម្ចាស់បទនេះ គួរតែសប្បាយចិត្ត ពេលមានអ្នកជំនាន់ក្រោយបានគាស់កកាយយកមកផលិតសារជាថ្មីដូច្នេះ។

“ខ្ញុំចង់ជម្រាបដែរថា បើសិនករណីខ្ញុំជាគាត់ (អែន ឌី) ខ្ញុំមានតែសប្បាយចិត្ត ដែលមានអ្នកជំនាន់ក្រោយលើកយកបទខ្លួនដែលបានកប់យូរហើយ មកកកាយឡើងវិញ ហើយវារិតតែធ្វើឲ្យម្ចាស់បទ កាន់តែល្បីជាងមុន។ខាងពួកខ្ញុំ ក៏រង់ចាំជួបខាង លោក អែន ឌី ដើម្បីពិភាក្សា និងវែកញែករឿងនេះដែរ"។

ពាក់ព័ន្ធនឹងបញ្ហានេះ លោក អេនឌី ដែលបច្ចុប្បន្នកំពុងលំហែកាយនៅប្រទេសជប៉ុននោះ មិនទាន់អាចសុំការអធិប្បាយបន្ថែមបានទេ៕

អត្ថបទ៖ ថា ម៉ាលីដា