បីក្រុម ឈ្នះទឹកប្រាក់ពាន់ដុល្លារពីកម្មវិធី "ប្រកួតប្រជែងគម្រោងអាជីវកម្ម Phillip Bank"
- 2016-05-02 18:53:15
- ចំនួនមតិ 0 | ចំនួនចែករំលែក 0
បីក្រុម ឈ្នះទឹកប្រាក់ពាន់ដុល្លារពីកម្មវិធី "ប្រកួតប្រជែងគម្រោងអាជីវកម្ម Phillip Bank"
ចន្លោះមិនឃើញ
កម្មវិធីប្រកួតប្រជែងគម្រោងអាជីវកម្ម ផ្ដួចផ្ដើមដោយ Philip Bank ក្រោមការសហការរៀបចំដោយ Kairos បានរកឃើញជយលាភីបីក្រុម ដែលបានបង្ហាញគម្រោងអាជីវកម្មលេចធ្លោជាងគេ អមដោយទឹកប្រាក់ខ្ពស់បំផុត ៣ ០០០ ដុល្លារសម្រាប់ក្រុមជយលាភីលេខ ១ ។
លោក ហាន់ ប៉េងគាន់ នាយកគ្រប់គ្រងទូទៅធនាគារ Phillip Plc (រាប់ពីស្តាំ រូបទី២)
លោក ហាន់ ប៉េងគាន់ ជានាយកគ្រប់គ្រងទូទៅរបស់ធនាគារ Phillip Plc ឲ្យដឹងថា ក្រុមដែលឈ្នះបីក្រុមក្នុងចំណោម ១១ក្រុមដែលបានចូលរួមប្រកួតក្នុងកម្មវិធី Phillip Bank Business Plan Competition លើកទីពីរនេះ បានបង្ហាញពីផែនការអាជីវកម្មថ្មីប្លែកនិងមានសក្ដានុពលសម្រាប់ពេលអនាគត។
លោកថា ការកាត់សេចក្តីរបស់គណៈកម្មការទាំង ៤ រូបរយៈពេលប្រមាណ ១៥នាទី គឺផ្តោតទៅលើ លទ្ធភាពជំនួញ ទស្សនៈ ការធ្វើបទបង្ហាញ និងភាពអាចទៅរួចសម្រាប់គម្រោងអាជីវកម្មរបស់ក្រុមទាំង ១១។ ផ្អែកលើប៉ុន្មានចំណុចនេះ ក្រុមចំនួន ៣ ទទួលបានពិន្ទុច្រើនជាងគេក្រោមផែនការអាជីវកម្ម៖
១. ជយលាភីលេខ១ ទឹកប្រាក់ ៣ ០០០ដុល្លារ៖ គម្រោងអាជីវកម្ម CamxTravel ដែលផ្តោតលើការនាំភ្ញៀវទេសចរណ៍ពីអាមេរិកនិងប៉ែកអឺរ៉ុប មកទស្សនាតំបន់និងទីកន្លែងបែបផ្សងព្រេងនៅកម្ពុជា។
២. ជយលាភីលេខ២ ទឹកប្រាក់ ២ ០០០ដុល្លារ៖ គម្រោងអាជីវកម្ម CamboTrip។ CamboTrip ជាកម្មវិធីទូរសព្ទ ណែនាំទីកន្លែងកម្សាន្តស្រដៀងគ្នានឹង TripAdviser។ ជំហានដំបូង CamboTrip បង្ហាញតែកន្លែងកម្សាន្តនៅកម្ពុជាសិនប៉ុណ្ណោះ ហើយពេលក្រោយនឹងបង្ហាញទីតាំងផ្សេងៗជុំវិញពិភពលោកបន្ថែមទៀត។
៣. ជយលាភីលេខ ៣ ទឹកប្រាក់ ១ ០០០ដុល្លារ៖ គម្រោងអាជីវកម្ម Sky Park ដែលសំដៅលើការសាងសង់ចំណតរថយន្តលើអាកាសនិងស្របច្បាប់ ដើម្បីចូលរួមកាត់បន្ថយការចតយានយន្តលើដងផ្លូវសាធារណៈអនាធិបតេយ្យក្នុងទីក្រុងភ្នំពេញ។
អ្នកនាំពាក្យមួយរូបរបស់ Kairos បញ្ជាក់ថា គោលបំណងនៃការរៀបចំការប្រកួតគម្រោងអាជីវកម្មនេះឡើង គឺចង់ផ្ដល់ចំណេះលើផ្នែកជំនួញដល់យុវជនកម្ពុជាវ័យក្មេង។ មុនពេលប្រកួត Kairos បានបង្ហាត់បង្រៀនពីយុទ្ធសាស្រ្តនិងគំនិតខ្លះៗសម្រាប់ធ្វើអាជីវកម្មដល់បេក្ខជនចម្រុះដែលបានចុះឈ្មោះប្រកួតក្នុងកម្មវិធីនេះ។ សម្រាប់ក្រុមមានគំនិតអាជីវកម្មលេចធ្លោ នឹងឈ្នះការប្រកួតរួមជាមួយប្រាក់រង្វាន់ដែលអាចឲ្យពួកគេចាប់ផ្តើមគម្រោងអាជីវកម្មខ្នាតតូចបាន។
Phillip Bank Business Plan Competition រៀបចំឡើងដោយ Philip Bank សហការរៀបចំដោយ Kairos រួមនឹងគ្រឹះស្ថានមីក្រូហិរញ្ញវត្ថុក្រេឌីត, Joma Bakery Cafe និង NEW UNION។ ខាង Phillip Bank រំពឹងថានឹងបន្តសហការ បង្កើតឲ្យមានការប្រកួតប្រជែងគំនិតអាជីវកម្មថ្មីៗនាឆ្នាំក្រោយៗទៀត៕
អត្ថបទ៖ ប៉ែត ផាន់និត