ស្ត្រីខ្មែរម្នាក់ ឈ្នះពានរង្វាន់អន្តរជាតិ ផ្តល់ភាពភ្ញាក់ផ្អើលក្នុងតំបន់អាស៊ី
- 2016-05-04 22:46:33
- ចំនួនមតិ 0 | ចំនួនចែករំលែក 0
ស្ត្រីខ្មែរម្នាក់ ឈ្នះពានរង្វាន់អន្តរជាតិ ផ្តល់ភាពភ្ញាក់ផ្អើលក្នុងតំបន់អាស៊ី
ចន្លោះមិនឃើញ
"នេះជាថ្ងៃមោទនភាពសម្រាប់លោកស្រី នួន ស៊ីថា សម្រាប់ Havas Riverorchid សម្រាប់ស្ត្រី និងប្រទេសកម្ពុជាទាំងមូល"។ នោះជាភាពភ្ញាក់ផ្អើលមួយនៅក្នុងពិធីចែកពានរង្វាន់ទ្វីបអាស៊ី Mumbrella Asia Awards ដែលធ្វើឡើងនៅសិង្ហបុរី កាលពីខែមុននេះ ពេលដែលស្ត្រីវ័យក្មេងកម្ពុជាម្នាក់ បានចាប់អាជីពផ្នែកផ្សព្វផ្សាយពាណិជ្ជកម្មក្នុងតួនាទីជាអ្នកទទួលភ្ញៀវ ឆ្លងកាត់ការប្រកួតប្រជែងកម្រិតអន្តរជាតិ រហូតដល់ក្លាយជាអ្នកដឹកនាំផ្នែកផ្សព្វផ្សាយដែលទទួលបានពានរង្វាន់ប្រចាំឆ្នាំ២០១៦ នេះ។
បេក្ខជនដែលជាប់ក្នុងការជ្រើសរើសផ្សេងទៀតសម្រាប់ពានរង្វាន់នេះ មាននាយកប្រតិបត្តិក្រុមហ៊ុន LoweProfero ដែលជាបណ្តាញផ្សព្វផ្សាយពាណិជ្ជកម្មដ៏ធំ និងមានប្រវត្តិយូរមកហើយក្នុងពិភពលោក នាយក TBWA សិង្ហបុរី និង APD សិង្ហបុរី។
លោកស្រី ស៊ីថា មានស្រុកកំណើតនៅភូមិដាច់ស្រយាលមួយនៃស្រុកក្រោលគោ ដែលគាត់ត្រូវដើរទៅ សាលារៀនរាប់គីឡូម៉ែត្រជារៀងរាល់ថ្ងៃ។ លោកស្រីបានផ្លាស់មករាជធានីភ្នំពេញ មុនពេលគាត់មានអាយុ១៨ឆ្នាំ។ ដោយមិនមានសញ្ញាប័ត្រជាន់ខ្ពស់ គាត់បានធ្វើការនៅក្នុងហាងមួយ ដើម្បីរកប្រាក់បង់ថ្លៃសិក្សាភាសាអង់គ្លេស។ ប៉ុន្មានឆ្នាំក្រោយមក គាត់បានដាក់ពាក្យចូលបម្រើការងារនៅក្រុមហ៊ុនផ្សព្វផ្សាយពាណិជ្ជកម្ម Riverorchid (បច្ចុប្បន្ន Havas Riverorchid) សម្រាប់ការងារជាអ្នកទទួលភ្ញៀវ។ នេះជាឱកាសមួយដែលបានផ្លាស់ប្ដូរជីវិតរបស់គាត់ និង Riverorchid ផងដែរ។ ជាងដប់ឆ្នាំក្រោយមក គាត់បានប្តូរតួនាទីជាបន្តបន្ទាប់ ពីអ្នកទទួលភ្ញៀវឡើងមកជាអ្នកគ្រប់គ្រងផ្នែកផ្សព្វផ្សាយ (Media Monitor) បន្ទាប់មកជាអ្នកទិញ និងរៀបចំគម្រោង (Junior Buyer and Junior Planner) និងបច្ចុប្បន្នជាអ្នកដឹកនាំផ្នែកប្រព័ន្ធផ្សព្វផ្សាយឈានមុខគេនៅកម្ពុជា ដោយមានក្រុមការងារ ២០ នាក់ ក្នុងនោះកម្ពុជា ១៧ នាក់ និងបរទេស ៣ នាក់ ដើម្បីធ្វើរបាយការណ៍ជូនគាត់ និងមានអតិថិជនធំៗជាច្រើនរួមទាំង ក្រុមហ៊ុន យូនីលីវើ និង កូកា កូឡា។
ពេលសួរពីប្រវត្តិពាក់ព័ន្ធនឹងជីវិតពិតរបស់គាត់រហូតបានក្លាយជាអ្នកដឹកនាំផ្នែកផ្សព្វផ្សាយដែលទទួលបានពានរង្វាន់ប្រចាំឆ្នាំ លោកស្រី នួន ស៊ីថា បានឲ្យដឹងថា "នេះជាសុបិន។ ខ្ញុំបានប្រាប់ខ្លួនឯងថា នេះមិនមែនជាការពិតទេ។ ប៉ុន្តែ នេះជាការពិត។ ខ្ញុំមានអារម្មណ៍ថា មានមោទនភាពណាស់ក្នុងនាមជាស្ត្រីខ្មែរដែលអាចនាំយកពានរង្វាន់នេះមកជូនប្រទេសរបស់ខ្ញុំ។ ហើយខ្ញុំមានសេចក្ដីត្រេកអរណាស់ដែល Havas Riverorchid បានផ្តល់ឱកាសនេះឲ្យខ្ញុំ។ ខ្ញុំបានចាប់ផ្តើមការងារដោយគ្មានសញ្ញាប័ត្រ ហើយក្រុមហ៊ុនបានផ្ដល់ការងារឲ្យខ្ញុំជាអ្នកទទួលភ្ញៀវ។ ប៉ុន្តែពួកគេតែងប្រាប់ខ្ញុំថា៖ "«បើអ្នកខិតខំធ្វើការ ស្មោះត្រង់ ហើយផ្ដល់សេវាអតិថិជនបានល្អ អ្នកអាចរីកចម្រើននៅក្នុងក្រុមហ៊ុននេះ»។ ខ្ញុំមិនដែលស្រមៃថា ខ្ញុំអាចឈានមកដល់ចំណុចនេះនោះទេ"។
លោក Pick Pimolsaengsuriya នាយកប្រតិបត្តិ Havas Riverorchid បានមានប្រសាសន៍ថា "អ្វីដែល ស៊ីថា បានធ្វើ បង្ហាញឲ្យឃើញថា នរណាក៏អាចធ្វើការងារអ្វីក៏បាន បើដាក់ចិត្តធ្វើការងារនោះឲ្យពិតប្រាកដ ហើយអ្នកមិនត្រឹមតែអាចក្លាយទៅជាបុគ្គលិកល្អបំផុតនៅកម្ពុជា ឬឥណ្ឌូចិនប៉ុណ្ណោះទេ ប៉ុន្តែអ្នកអាចក្លាយជាបុគ្គលិកល្អបំផុតនៅក្នុងតំបន់អាស៊ី។ យើងមានមោទនភាពចំពោះគាត់ និងគំនិតច្នៃប្រឌិតរបស់គាត់ដែលបានបន្តចែកចាយដល់បុគ្គលិកទាំងអស់នៅក្នុងក្រុមរបស់គាត់"។
ចំណែកលោក Levent Guenes នាយកប្រតិបត្តិក្រុមហ៊ុន Havas Creative Group ប្រចាំនៅតំបន់អាស៊ីអាគ្នេយ៍ បានមានប្រសាសន៍ថា "ខ្ញុំនៅជាមួយ ស៊ីថា នៅពេលដែលដំណឹងបានប្រកាសថា គាត់បានឈ្នះពានរង្វាន់នេះ។ ពេលនោះជាពេលដ៏រីករាយបំផុតក្នុងមួយឆាកជីវិតការងាររបស់ខ្ញុំ។ នៅពេលយើងបានសហការជាដៃគូជាមួយ Riverorchid យើងរំភើប ដោយសារគុណភាព និងភាពស៊ីជម្រៅនៃការគ្រប់គ្រងរបស់ថ្នាក់គ្រប់គ្រងជនជាតិខ្មែរក្នុងស្រុកទៅតាមផ្នែកនីមួយៗរបស់ពួកគេដូចជា ស៊ីថា គឺជាគំរូស្រាប់។ យើងមានកិត្តិយសណាស់ដែលមាន ស៊ីថា និង Havas Riverorchid ជាផ្នែកមួយនៃគ្រួសារជាសកលរបស់យើងឥឡូវនេះ"។
Havas Riverorchid ត្រូវបានបង្កើតឡើងក្នុងឆ្នាំ២០១៥ ក្នុងភាពជាដៃគូរវាង Havas និង Riverorchid ។ Havas ជាបណ្តាញក្រុមហ៊ុនផ្សព្វផ្សាយពាណិជ្ជកម្មដែលរីកចម្រើនលឿនបំផុតក្នុងពិភពលោក ដោយមានបុគ្គលិកជាង ១៨.០០០ នាក់នៅទូទាំងទ្វីបទាំង ៥ ។ Riverorchid ជាក្រុមហ៊ុនផ្សព្វផ្សាយពាណិជ្ជកម្មនៅក្នុងតំបន់ឥណ្ឌូចិន ដែលមានការិយាល័យនៅកម្ពុជា ឡាវ ភូមា ថៃ និងវៀតណាម។ បណ្តាញក្រុមហ៊ុន Havas ដែលធ្វើប្រតិបត្តិការតាមរយៈ Village model ឥឡូវនេះ មានប្រតិបត្តិការនៅបណ្ដាប្រទេសអាស៊ានទាំង ៩ ដែលមានចំនួនច្រើនជាងបណ្តាញផ្សព្វផ្សាយផ្សេងៗទៀត៕
អត្ថបទ៖ ពាណិជ្ជកម្ម