មនុស្សរាប់ពាន់នាក់ជិះកង់ដើម្បីអ្នកម្តាយនៅភ្នំពេញព្រឹកនេះ

2016-05-07 15:27:13
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សរាប់ពាន់នាក់បានចូលរួមជិះកង់ដើម្បីទិវាអ្នកម្តាយ និងមានការចូលរួមពីសហភាពអឺរ៉ុបដើម្បីអបអរសាទរទិវាអឺរ៉ុបរបស់ខ្លួននាពេលថ្ងៃសៅរ៍ទី៧ ខែឧសភានេះដែលចាប់ចេញដំណើរពីពហុកីឡដ្ឋានជាតិ។

តំណាងសហភាពអឺរ៉ុបបានឲ្យដឹងថា កម្មវិធីជិះកង់នេះមានគោលបំណងសំខាន់ៗមួយចំនួនគឺទី១ដើម្បីអបអរសាទរទិវាអឺរ៉ុបដែលបណ្តាលប្រទេសជាសមាជិកមានចំណងការទូតយ៉ាងសំខាន់នឹងប្រទេសកម្ពុជា។ ទី២គឺដើម្បីបង្ហាញឲ្យប្រជាជនចេះស្រលាញ់ការពារបរិស្ថានដែលព្រឹត្តិការណ៍នេះរំលេចនូវពាក្យស្លោកថា «កម្ពុជា-សហភាពអឺរ៉ុបរួមគ្នាដើម្បីភពផែនដី» ពីព្រោះការជិះកង់នេះជាការធ្វើដំណើរបៃតង ឬការធ្វើដំណើរដោយគ្មានផ្សែង។ គោលបំណងទី៣បង្ហាញឲ្យប្រជាពលរដ្ឋយល់ដឹងពីការប្រែប្រួលអាកាសធាតុដើម្បីរួមគ្នាការពារបរិស្ថាន។

ដើម្បីអបអរសាទរ និងរំលឹកដល់អ្នកម្តាយ គណៈកម្មការស្ត្រី និងកីឡាកម្ពុជានៃគណៈកម្មាធិការជាតិអូឡាំពិកកម្ពុជាបានលើកឡើងចំណុចសំខាន់៥យ៉ាងគឺ ស្ត្រីជាមាតានៃពិភពលោក, ជិះកង់ដើម្បីព្រះគុណម្តាយ, កីឡា និងស្ត្រីទទួលបានជោគជ័យក៏ព្រោះម្តាយ, ទិវាម្តាយជាទិវាស្ត្រី និងកីឡា, កូនភ្លេចគុណម្តាយត្រូវអន្តរជាតិមួយជីវិត និងគុណធម៌របស់ម្តាយជាពន្លឺនៃជីវិតកូនៗ។

នេះជាលើកទីមួយហើយដែលសហភាពអឺរ៉ុបបានសហការជាមួយគណៈកម្មាធិការជាតិអូឡាំពិកកម្ពុជារៀបចំព្រឹត្តិការណ៍ប្រណាំងកង់នេះឡើងដើម្បីអបអរទិវាអឺរ៉ុប និងអ្នកម្តាយ។ កម្មវិធីនេះមានការចូលរួមដោយប្រធានសហភាពអឺរ៉ុបប្រចាំនៅកម្ពុជា តំណាងស្ថានទូតអឺរ៉ុបទាំងអស់ប្រចាំនៅកម្ពុជា ឯកឧត្តមរដ្ឋមន្ត្រីក្រសួងអប់រំ ហង់ ជួនណារ៉ុន លោកជំទាវ ម៉ក់ វណ្ណស៊ីថា អភិបាលរងរាជធានីភ្នំពេញ មន្ត្រីគណៈកម្មាធិការជាតិអូឡាំពិកកម្ពុជា និងប្រជាពលរដ្ឋយ៉ាងច្រើនកុះករ៕