រឿងពិតសម្លាញ់ពីរនាក់ ម្នាក់ពិការដៃម្នាក់ពិការភ្នែក សហការគ្នាជួយបរិស្ថាន

2016-05-09 17:21:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែវីដេអូរឿងពិតស្ដីពីជីវិតបុរសពិការដៃសងខាងម្នាក់ និងបុរសពិការភ្នែកម្នាក់ យកគ្នាជាសម្លាញ់ រួមសហការគ្នាធ្វើការងារបរិស្ថានកំពុងទាក់ទាញការចាប់អារម្មណ៍ខ្លាំងលើបណ្ដាញអ៊ីនធឺណិតចិន។

ការចុះផ្សាយពីសារព័ត៌មាន Shanghaiist តាមរយៈវីដេអូរឿង "Great Big Story" ជាងពីរនាទីបានរៀបរាប់ពីកិច្ចការប្រចាំថ្ងៃរបស់ លោក Jia Haixia និង លោក Jia Wenqi។ បុរសពិការទាំងពីរៀងរាល់ថ្ងៃ មានកិច្ចការការងារត្រូវធ្វើគឺដាំនិងមើលថែកូនឈើជាង១ម៉ឺនដើមលើផ្ទៃដីប្រមាណ ៨ហិចតា ប្រែក្លាយដីស្ងួតសោះកក្រោះទៅជាព្រៃឈើ។

ដោយសារតែប្រភពទឹកនៅឆ្ងាយពីទីតាំងធ្វើការ និងពុំទាន់មានលទ្ធភាពជីកអណ្ដូងបាន បុរសទាំងពីរត្រូវធ្វើដំណើរប្រហែលពីរគីឡូម៉ែត្រដើម្បីយកទឹកស្រោចកូនឈើ។

ដើម្បីទៅដល់កន្លែងធ្វើការនោះ លោក Wenqi ដែលពិការដៃទាំងសងខាង បាននាំផ្លូវលោក Haixia ដែលពិការភ្នែកកាត់ព្រៃព្រឹក្សា តាមរយៈការកាន់ដៃអាវ។ នៅពេលដល់ទន្លេ បុរសពិការភ្នែកនោះ ត្រូវជិះលើខ្នងបុរសពិការដៃ ដើម្បីឆ្លងទឹក។

បុរសពិការទាំងពីរបានចាប់ផ្ដើមដាំដើមឈើចាប់ពីឆ្នាំ២០០២មក។ បុរសពិការភ្នែក លោកHaixia វិញបាននិយាយថា “ខ្ញុំជាដៃរបស់គាត់ ហើយគាត់ជាភ្នែករបស់ខ្ញុំ… យើងជាដៃគូដ៏ល្អ” ។

បុរសអភ័ព្វទាំងពីរនាក់នេះ បានចូលរៀននៅសាលាជាមួយគ្នា តាំងពីវ័យកុមារក្នុងភូមិ Yeli ភាគឦសានប្រទេសចិន។ លោក Wenqi បាននិយាយថា ពូកគេទាំងពីរនាក់ប្រៀបដូចជាបងប្អូន ហើយមានអាយុចន្លោះគ្នាត្រឹមតែមួយឆ្នាំប៉ុណ្ណោះ។ លោក Jia Haixia បានកើតមកដោយពិការភ្នែកខាងឆ្វេង ហើយនៅឆ្នាំ២០០០ អំឡុងពេលធ្វើការក្នុងរោងចក្រភ្នែកខាងស្ដាំរបស់លោក ត្រូវដុំថ្មខ្ទាតចូល បណ្ដាលឲ្យខ្វាក់ទាំងស្រុងតែម្ដង។ ចំណែកលោក Jia Wenqi បានពិការដៃទាំងគូ តាំងពីអាយុ ៣ឆ្នាំ ដោយសារឆក់ខ្សែភ្លើង៕