វិធីសាស្ត្រលុបដានស្នេហ៍ចាស់ចេញពីបេះដូង
- 2016-05-09 17:24:31
- ចំនួនមតិ 0 | ចំនួនចែករំលែក 0
វិធីសាស្ត្រលុបដានស្នេហ៍ចាស់ចេញពីបេះដូង
ចន្លោះមិនឃើញ
ស្នេហាតែងបន្សល់ទុកអនុស្សាវរីយ៍រាប់មិនអស់ រហូតពេលខ្លះដិតដាមក្នុងអារម្មណ៍បំភ្លេចមិនបាន និងធ្វើឲ្យគេចោទសួរថា ហេតុអ្វីចាំបាច់មានអតីតកាល? ទោះបីពិបាកបន្តិច ប៉ុន្តែវិធីសាស្ត្របំភ្លេចនៅតែមាន បើអ្នកសាកល្បងតាមចំណុចដូចការលើកឡើងខាងក្រោម។
គិតថាគ្មាននិស្ស័យ បើកចិត្តទទួលស្នេហ៍ថ្មីជំនួស៖ អ៊ុង បញ្ញា ជានិស្សិតឆ្នាំទី៤ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានលើកឡើងថា បើបែកគ្នាហើយ ទោះនៅឈឺចាប់ស្ដាយក្រោយក៏មិនអាចដូចដើមវិញដែរ មានតែគិតថាគ្មាននិស្ស័យ ហើយបើកចិត្តទទួលអ្នកថ្មី បើមានគេស្រលាញ់ស្មោះ។
និស្សិតផ្នែកសេដ្ឋកិច្ចរូបនេះ បាននិយាយទាំងទឹកមុខញញឹមសោះកក្រោះថា៖ "ខ្ញុំបែកអស់ ២នាក់ហើយបង... កំហុសគឺមកពីខ្ញុំ តែមិនមែនខ្ញុំមានថ្មីអីទេ គឺខុសត្រង់ថាអត់លុយ... មិនហ៊ានសន្យាជាមួយគេ ទើបគេត្រូវបង្ខំចិត្តតាមម៉ាក់ប៉ា ការចោលបាត់អស់"។ បញ្ញា បញ្ជាក់ថា ពេលនេះអាចកាត់ចិត្តបានច្រើនហើយ ព្រោះកំពុងសម្លឹងឃើញនារីម្នាក់។
ចំពោះនិស្សិតផ្នែកអក្សរសាស្ត្រអង់គ្លេសនៅសាលាឯកជនមួយឈ្មោះ ឌី សុភ័ក្រ្ត បានលើកឡើង ២ចំណុចដែលអាចកាត់ចិត្តបានលឿន@
លុបចោលទាំងអស់៖ សុភ័ក្ត្រ បានបញ្ជាក់ថា បើចង់បំភ្លេចសង្សារចាស់លឿនបំផុត គឺត្រូវលុបចោលទាំងអស់ លេខទូរសព្ទ, រូបថត, SMS, Chat និង Block គេចោលនៅលើបណ្ដាញសង្គមនានា នោះយូរទៅអាចបំភ្លេចបានហើយ។ មួយវិញទៀត គឺប្រាប់មិត្តភក្តិឲ្យឈប់រំលឹកពីឈ្មោះសង្សារចាស់។
ធ្វើខ្លួនឲ្យរវល់ និងសប្បាយជានិច្ច៖ សុភក្ដិ ក៏បានអះអាងដែរថា បែកគ្នាហើយ ប្រាកដជាខូចចិត្តខ្លាំង និងគ្មានកម្លាំងជាប់ខ្លួនឡើយ ប៉ុន្តែត្រូវរឹងមាំ និងធ្វើខ្លួនឲ្យរវល់ ហើយស្រស់ស្រាយជានិច្ច។ ក្រៅពីការងារមានស្រាប់ គួររកពេលលេងបាល់ ជួបជុំមិត្តភក្តិ ញាំអាហារឆ្ងាញ់ៗឲ្យបានច្រើន។
គិតគ្រួសារជាធំ៖ ងាកមកនារីម្នាក់ ដែលបង្ហាញត្រឹមឈ្មោះកាត់ ស្រីល័ក្ខ បាននិយាយថា នាងមិនធ្លាប់មានសង្សារទេ ប៉ុន្តែគិតថាស្នេហាមិនសំខាន់ជាងគ្រួសារឡើយ។ ចង់បំភ្លេចស្នេហ៍ចាស់ ត្រូវគិតពីក្ដីស្រលាញ់របស់ឪពុកម្ដាយ បងប្អូនជុំវិញខ្លួន ព្រោះសង្សារគ្រាន់តែជាអ្នកដទៃប៉ុណ្ណោះ។
ចុះមិត្តអ្នកអាន មានចំណុចណាបន្ថែមពីលើនេះទេ?
អត្ថបទ៖ គង់ វិសាល