៩កន្លែង គេមិនសូវស្គាល់តែទាក់ទាញបំផុតនៅអាស៊ី

2016-05-10 13:10:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការចុះផ្សាយរបស់ CNN តំបន់រមណីយដ្ឋានប្រវត្តិសាស្ត្រ រមណីយដ្ឋានធម្មជាតិជាច្រើននៅអាស៊ីដែលមានឈ្មោះល្បីលើពិភពលោកតួយ៉ាង ប្រាសាទអង្គរវត្តនៅកម្ពុជា មហាកំពែងនៅចិន និងតំបន់ទេសចរជាច្រើនទៀត ដែលមិនដែលរំលងពីការទៅទស្សនារបស់អ្នកទេសចរ។ ដោយឡែកតំបន់មួយចំនួន ដែលអ្នកទេសចរពុំសូវដឹងឮពីតំបន់ទាំងនោះ ប៉ុន្តែជាកន្លែងទាក់ទាញខ្លាំងបំផុតនៅអាស៊ី៖

១. កោះរ៉ុង កម្ពុជា

ជាកោះទំហំធំជាងគេលំដាប់ទីពីរនៅប្រទេសកម្ពុជា ទឹកដីដ៏ស្រស់ស្អាតនេះជាកន្លែងមនោរម្យទាក់ទាញអ្នកទេសចរចង់ទៅទស្សនាម្ដងហើយម្ដងទៀតមិនចេះជិនណាយ។ អ្នកទេសចរអាចលំហែអារម្មណ៍ មើលថ្ងៃរៀបលិចក្នុងបរិយាកាសរ៉ូម៉ែនទិក មុជទឹកមើលក្នុងបាតសមុទ្រដ៏ស្រស់ស្អាត និងដើរកម្សាន្តលេងក្នុងព្រៃផងដែរ។

២. ទីវាលក្រឡ ឡាវ

ជាទីអាថ៌កំបាំងមួយនៅភាគកណ្ដាលនៃប្រទេសឡាវ ជាទីវាលដែលមានក្រឡថ្មធំអាយុកាលជាង២ពាន់ឆ្នាំ។ មនុស្សជាច្រើនជឿថានៅទីនោះជាទីតាំងបញ្ចុះសាកសពក្នុងសម័យបុរេប្រវត្តិ។ ចំណែកការអះអាងផ្សេងទៀតថា ទីនោះជាកន្លែងស្តុកទឹកភ្លៀងសម្រាប់អ្នកទេសចរនាសម័យបុរាណប្រើប្រាស់ពេលធ្វើដំណើរឆ្លងកាត់។ ជំនឿអ្នកស្រុកថាជាក្រឡស្រារបស់ពួកយក្ស។

៣. កោះ Majuli ឥណ្ឌា

ជាដីកោះនៃទន្លេ Brahmaputra ក្នុងរដ្ឋ Assam ប្រទេសឥណ្ឌា។ នៅទីនោះមានជីវិតសត្វព្រៃច្រើនប្រភេទដែលជាទីទាក់ទាញចំណាប់អារម្មណ៍អ្នកទេសចរ។

៤. កោះYakushima ជប៉ុន

ស្ថិតក្នុងប្រជុំកោះ Ōsumi ក្នុងខេត្ត Kagoshima កោះ Yakushima ជាដែនដីអភិរក្សជីវចម្រុះនៃអង្គការ UNESCO ។ អ្វីដែលជាការទាក់ទាញនៅទីនោះគឺការទស្សនា រុក្ខជាតិប្លែកៗ ដូចជារុក្ខជាតិ Cedarជប៉ុន អណ្ដើកកម្រ និងត្រីផ្សោតដូហ្វីនជាដើម។

៥. កោះ Sharp ហុងកុង

ជាតំបន់ដីកោះដែលមានឆ្នេរខ្សាច់ស្អាត និងទឹកសមុទ្រថ្លាក្នុងទីក្រុងហុងកុង ជាទីពេញនិយមនៃអ្នកទេសចរជាច្រើនចង់ទៅទស្សនា។

៦. កោះ Ko Adang ថៃ

ជាដែនកោះទំហំ៣០គីឡូម៉ែត្រការ៉េ នៃឧទ្យានជាតិថៃ Tarutao ក្បែរព្រំប្រទល់ថៃ-ម៉ាឡេស៊ី មានឆ្នេរខ្សាច់សស្អាត ទឹកសមុទ្រខៀវស្រងាត់ ការរៀបចំឡើងកម្សាន្តលើព្រៃភ្នំដែលជាទីទាក់ទាញអ្នកទេសចរ។

៧. ទីក្រុង Dalat វៀតណាម

ជាអតីតកន្លែងលំហែពេញនិយមក្នុងសម័យអាណានិគមបារាំងក្នុងប្រទេសវៀតណាម ដែលជាតំបន់ធាតុអាកាសត្រជាក់ អាចឡើងភ្នំប៉ះចំហាយពពកបាន។ នៅទីនោះអ្នកទេសចរនឹងរីករាយជាមួយការលេងវាយកូនហ្គោលផងដែរ។

៨. ភូមិ Taipa ម៉ាកាវ

ក្រៅពីកន្លែងកម្សាន្តលេងល្បែងស៊ីសង នៅទីក្រុងម៉ាកាវក៏មានតំបន់ទេសចរជាច្រើនទាក់ទងប្រវត្តិសាស្ត្រនិងវប្បធម៌ប្រពៃណីផងដែរ។ ភូមិ Taipa ជាអតីតភូមិអ្នកនេសាទ ជាកន្លែងទាក់ទាញទេសចរបង្ហាញពីសំណង់អគារចាស់ៗ សារមន្ទីរ វិហារសាសនា ប្រាសាទ ផ្ទះវីឡា ជាច្រើនជាលក្ខណៈស្ថាបត្យកម្មរបស់ប្រទេសព័រទុយហ្គាល់។

៩. កោះPulau Ubin សិង្ហបុរី

ផ្ទៃកោះទំហំ១០គីឡូម៉ែត្រការ៉េ តែអ្នកទេសចរនឹងអាចទស្សនាជីវិតសត្វសមុទ្រជាច្រើនប្រភេទជុំវិញកោះសំបូរ ប្រភេទសត្វបក្សីកម្រ។ នៅទីនោះអ្នកទេសចរជាច្រើនពេញនិយមការជិះកង់ឡើងភ្នំកម្សាន្តផងដែរ៕