អគ្គមេបញ្ជាការយោធាកូរ៉េខាងជើងដែលត្រូវប្រហារជីវិត ការពិតនៅរស់នៅឡើយ

2016-05-11 22:15:58
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតអគ្គមេបញ្ជាការយោធាកូរ៉េខាងជើងលោក Ri Yong-gil ដែលកាសែតល្បីៗនៅជុំវិញពិភពលោក ធ្លាប់រាយការណ៍ថា ត្រូវបានគេកាត់ប្រហារជីវិតកាលពីខែកុម្ភៈកន្លងទៅ តាមពិតនៅរស់នៅឡើយ។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើងទើបប្រកាសឲ្យដឹង។

លោក Ri Yong-gil មិនត្រឹមតែនៅរស់ប៉ុណ្ណោះទេ ថែមទាំងកំពុងកាន់កិច្ចការជាន់ខ្ពស់ថ្មីៗជាច្រើនទៀត ដែលផ្ទុយពីព័ត៌មានប្រមូលបានរបស់រដ្ឋាភិបាលកូរ៉េខាងត្បូងធ្លាប់អះអាង។

លោក Ri ត្រូវគេស្គាល់ថាជាមនុស្សដែលមេដឹកនាំគីម ជុងអ៊ុន ទុកចិត្តបំផុត តែបានខកខានពុំបានចូលរួមព្រឹត្តិការណ៍ធំៗរបស់ជាតិកាលពីខែកុម្ភៈ។ អវត្តមានបែបនេះហើយ ទើបមន្ត្រីស៊ើបការណ៍សម្ងាត់ក្រុងសេអ៊ូល សន្និដ្ឋានថាលោកត្រូវបាន គីម ជុងអ៊ុន កាត់ទោសប្រហារជីវិតពីបទពុករលួយ និងបទចោទជាច្រើនទៀត។

កាលពីដើមខែកុម្ភៈ មន្ត្រីកូរ៉េខាងត្បូង ធ្លាប់ថ្លែងថាការប្រហារជីវិតរបស់លោក Ri គឺជាផ្នែកមួយនៃកិច្ចខិតខំប្រឹងប្រែងរបស់មេដឹកនាំវ័យក្មេងខាងលើ ដើម្បីបន្តរក្សាអំណាច។ ក្រុងសេអ៊ូល បានអះអាងថាមនុស្សប្រមាណ ៧០នាក់ ត្រូវបានប្រហារជីវិតចាប់តាំងពី គីម ជុងអ៊ុន ឡើងកាន់អំណាចនៅចុងឆ្នាំ ២០១១មក៕