Zidane ចង់ឲ្យ Real រកគ្រាប់ឲ្យបានលឿន ដើម្បីបំភ័យ Barca យប់នេះ
- 2016-05-14 18:08:56
- ចំនួនមតិ 0 | ចំនួនចែករំលែក 0
Zidane ចង់ឲ្យ Real រកគ្រាប់ឲ្យបានលឿន ដើម្បីបំភ័យ Barca យប់នេះ
ចន្លោះមិនឃើញ
Zinedine Zidane អ្នកចាត់ការក្រុម Real Madrid ចង់ឲ្យក្រុមស្ដេចសរបស់លោក ប្រញាប់រកបាល់បញ្ចូលទីឲ្យបានលឿនបំផុត ដើម្បីធ្វើឲ្យក្រុម Barcelona អាចមានសម្ពាធក្នុងការប្រកួត Li Liga សប្ដាហ៍ទី៣៨ បញ្ចប់រដូវកាលយប់នេះ។
Zinedine Zidane (ស្តាំ) ដឹកនាំកូនក្រុមហ្វឹកហាត់ម្សិលមិញ
Real នឹងប៉ះ Deportivo La Coruna ខណៈដែល Barca នឹងប៉ះ Granada ក្រៅដីដូចគ្នា នៅវេលាម៉ោង១០:០០នាទីយប់នេះ។ ក្រុមរបស់ Zidane ដាច់ខាតត្រូវតែឈ្នះប្រកួតនេះ ហើយលុះត្រាតែ Barca ភ្លាត់ចាញ់ ឬស្មើ ទើប Real អាចលើកពានលីគកំពូលអេស្ប៉ាញ។
ដោយសារក្រុមប្រជែងយកពានទាំង២ លេងម៉ោងដំណាលគ្នា ហើយអ្នកគាំទ្រក្រុមទាំងសងខាង នឹងតាមដានលទ្ធផលរបស់គូប្រជែងរៀងៗខ្លួនផងនោះ ដូច្នេះសំឡេងអ្នកគាំទ្របន្លឺឡើង អាចនឹងធ្វើឲ្យកីឡាករក្នុងទីលានទទួលបានអារម្មណ៍ខុសប្លែក។
យ៉ាងណាមិញ អ្នកចាត់ការសញ្ជាតិបារាំង Zidane ជឿថា បើក្រុមរបស់លោក អាចស៊ុតបញ្ចូលទីក្រុម Deportivo បានលឿន នោះក្រុម Barca របស់លោក Luis Enrique ដែលលេងនៅកីឡដ្ឋាន Estadio Nuevo Los Cármenes អាចនឹងមានសម្ពាធ និងធ្វើឲ្យពួកគេលេងមិនបានល្អក្នុងប្រកួតនោះ ពេលឮដំណឹងថា Real ស៊ុតចូល៕
ចុះប្រិយមិត្តជឿថា Real អាចមានឱកាសលើកពានទេយប់នេះ?
ប្រែសម្រួល៖ វិន ជីវ័ន្ត ប្រភព៖ marca