ដឹងទេ កែវ វាសនា ជូនថ្លៃបណ្ណាការភរិយា តាមលេខហុងស៊ុយ?
- 2016-05-19 13:12:47
- ចំនួនមតិ 0 | ចំនួនចែករំលែក 0
ដឹងទេ កែវ វាសនា ជូនថ្លៃបណ្ណាការភរិយា តាមលេខហុងស៊ុយ?
ចន្លោះមិនឃើញ
តារាចម្រៀង កែវ វាសនា ដែលទើបតែរៀបការជាមួយកូនអ្នកជំនួញធំម្នាក់នៅឯស្រុក មង្គលបុរី ខេត្តបន្ទាយមានជ័យ កាលពីពេលថ្មីៗ ព្រឹកនេះ បានទម្លាយថ្លៃបណ្ណាការ ដែលខ្លួនបានជូនទៅក្រុមគ្រួសារភរិយាថា ចំនួនតួលេខមានហុងសុយ។
ថ្លៃបណ្ណាការនោះ ក្រុមគ្រួសារលោក បានជូនទឹកប្រាក់ចំនួន ៤៨១៦៨ ដុល្លារអាមេរិក ទៅក្រមគ្រួសារខាងស្រី ដែលចំនួននេះ ត្រូវបានតារាចម្រៀងរូបនេះ បញ្ជាក់ថា គឺជាលេខហុងស៊ុយមួយដែលមនុស្សភាគច្រើនយកតម្រាប់តាម។ ការជូនខាងលើ ក៏មិនមែនជាការបង្គាប់របស់ក្រុមគ្រួសារភរិយាលោកឡើយ ប៉ុន្តែក្រុមគ្រួសារជូន ដើម្បីឲ្យសាកសមកិត្តិយសទាំងសងខាង។
លោក វាសនា បានរៀបរាប់ពីរឿងរាវស្នេហាឲ្យដឹងថា ខ្លួនបានស្គាល់គ្នា ជាង៨ឆ្នាំមកហើយ ដែលការស្គាល់ដំបូង គឺក្នុងពិធីអាពាហ៍ពិពាហ៍មួយនៅឯស្រុកមង្គលបុរី ខេត្ត បន្ទាយមានជ័យ ដែលជាស្រុកកំណើតភរិយាលោកតែម្ដង គ្រាដែលពួកលោកបានចូលរួមមង្គលការនោះជាមួយគ្នា។
តារាចម្រៀងមានដើមកំណើតមកពីខេត្តកំពង់ឆ្នាំងម្នាក់នេះ បានបន្តឲ្យដឹងទៀតថា ចាប់តាំងពីឈានដល់មានទំនាក់ទំនងស្នេហា រហូតដល់ចាស់ទុំទាំងសងខាងដឹងឮមក ខ្លួនមិនដែលទម្លាយឲ្យមហាជនដឹងឡើយ ក៏ព្រោះតែក្រុមគ្រួសារទាំងសងខាង មិនចង់ឃើញសារព័ត៌មានចុះផ្សាយ ពីជីវិតឯកជនរបស់លោក។
លោកបានប្រាប់ថា ម្ដាយឪពុកក្មេកលោក គឺជាអ្នករកស៊ីចងការប្រាក់មួយនៅឯខេត្តបន្ទាយមានជ័យ។ ក្នុងទំនាក់ទំនងស្នេហ៍ជាង៨ឆ្នាំមកនេះ លោក និងភរិយា ធ្លាប់បានរកស៊ីមុខរបររួមគ្នាមួយ គឺលក់ផលិតផលគ្រឿងសម្អាងនាំចូលពីប្រទេសម៉ាឡេស៊ី ដោយកាលពីប៉ុន្មានខែមុន បានចំណាយដើមទុនរហូតដល់ទៅជិត៣ម៉ឺនដុល្លារ ហើយជំនួញនោះ កំពុងតែដំណើរការរាល់ថ្ងៃ។
ដោយសារតែអាពាហ៍ពិពាហ៍របស់លោក ប្រារព្ធធ្វើនៅខេត្ត បន្ទាយមានជ័យ ឆ្ងាយពីរាជធានីភ្នំពេញ កែវ វាសនា បញ្ជាក់ថា លោក មិនបានអញ្ជើញមិត្តសិល្បៈច្រើនទេ ពោលគឺមានតែអ្នកជិតស្និទ្ធប្រហែលជាង១០នាក់ប៉ុណ្ណោះ។ បន្ទាប់ពីអាពាហ៍ពិពាហ៍ លោកបានបញ្ជាក់ជាចុងក្រោយថា មិនមានគម្រោងកាត់ចំណងដៃ នៅរាជធានីភ្នំពេញឡើយ ព្រោះមិនចង់រំខាន ញាតិមិត្តច្រើនជាងនេះ៕
អត្ថបទ៖ ខុត សីហា រូបថត៖ ផ្ដល់ឲ្យដោយ កែវ វាសនា