ធនាគារជាតិតម្រូវឲ្យគ្រឹះស្ថានធនាគារ និងហិរញ្ញវត្ថុចូលសមាជិកប្រព័ន្ធ២ ដើម្បីជំរុញការទូទាត់រាយ
- 2016-05-23 22:15:52
- ចំនួនមតិ 0 | ចំនួនចែករំលែក 0
ធនាគារជាតិតម្រូវឲ្យគ្រឹះស្ថានធនាគារ និងហិរញ្ញវត្ថុចូលសមាជិកប្រព័ន្ធ២ ដើម្បីជំរុញការទូទាត់រាយ
ចន្លោះមិនឃើញ
ដើម្បីលើកកម្ពស់ការអភិវឌ្ឍន៍វិស័យធនាគារនិងហិរញ្ញវត្ថុរួមទាំងសេដ្ឋកិច្ចជាតិ ធនាគារជាតិនៃកម្ពុជាតម្រូវឲ្យគ្រឹះស្ថានធនាគារនិងហិរញ្ញវត្ថុចូលជាសមាជិកប្រព័ន្ធ FAST និងប្រព័ន្ធ Central Shared Switch ជាកាតព្វកិច្ច។
ការចូលរួមនេះក្នុងគោលដៅជំរុញការទូទាត់រាយឲ្យកាន់តែងាយស្រួល រហ័ស ប្រសិទ្ធភាព សុវត្ថិភាព និងជឿទុកចិត្តបាន។ នេះបើតាមប្រកាសស្ដីពីសមាជិកភាពប្រព័ន្ធ FAST និងប្រព័ន្ធ Central Shared Switch ដែលចេញដោយធនាគារជាតិនៃកម្ពុជា។
ប្រកាសនេះមានវិសាលភាពអនុវត្តចំពោះធនាគារពាណិជ្ជ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ តទៅនេះ ហៅថា "គ្រឹះស្ថាន"។
ក្នុងសេចក្ដីប្រកាសដដែលបានបញ្ជាក់ថា គ្រឹះស្ថានមានកាតព្វកិច្ចចូលរួមជាសមាជិកក្នុងប្រព័ន្ធ FAST ឲ្យបានមុនថ្ងៃ១ មករា ២០១៧ និងសមាជិកនៅក្នុងប្រព័ន្ធ Central Shared Switch មុនថ្ងៃ១ មករា២០១៨ជាកំហិត។
គួររំលឹកថា ធនាគារជាតិនៃកម្ពុជាបានអភិវឌ្ឍប្រព័ន្ធទូទាត់រាយភ្លាមៗ (FAST System) ជាប្រព័ន្ធទូទាត់ទំនើបថ្មីមួយ សម្រាប់ប្រតិបត្តិការផ្ទេរមូលនិធិអន្តរគ្រឹះស្ថានធនាគារនិងគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើជាប្រាក់រៀល ដែលនឹងអាចឲ្យអតិថិជនទទួលបានមូលនិធិភ្លាមៗ (Real Time) ដោយបានដាក់ដំណើរការជាបឋមនៅថ្ងៃទី២២ ខែមេសា ឆ្នាំ២០១៦ ៕
អត្ថបទ៖ លឹម សុនា