ឲ្យសង្សារខ្ចីម៉ូតូ យកទៅបញ្ចាំបាត់

2016-05-24 17:27:47
ចំនួនមតិ 0 | ចំនួនចែករំលែក 0

ចន្លោះមិនឃើញ

“សង្សារខ្ញុំខ្ចីម៉ូតូបាត់ពេញមួយថ្ងៃ ស្រាប់តែឭថា យកម៉ូតូទៅបញ្ចាំបាត់”។ នេះជាការលើកឡើងរបស់កញ្ញាណារ៉ា ដែលជាឈ្មោះហៅក្រៅ។ អ្នកទាំងពីរមានទំនាក់ទំនងស្នេហារយៈពេល ៣ឆ្នាំហើយ ហើយជិតដល់ថ្ងៃចូលរោងទៀតផង ប៉ុន្តែនៅពេលកើតហេតុបែបនេះ ណារ៉ា ក៏បានផ្ដាច់ទំនាក់ទំនងតែម្ដងទៅ។

“បងអើយ ខ្ញុំសំណាងណាស់ដែលមិនទាន់បានរៀបការ បើសិនជារៀបការវិញមិនដឹងថា ខ្ញុំបែកទ្រូងយ៉ាងណាទេ?”។ ទាំងនេះជាពាក្យសម្ដី ដែលលើកឡើងដោយ កញ្ញា ណារ៉ា ប្រាប់អ្នកយកព័ត៌មាន Sabay។

"ក្នុងអំឡុងពេលទំនាក់ទំនង ៣ឆ្នាំ ខ្ញុំស្មានចិត្តគាត់មិនត្រូវទាល់តែសោះ។ គាត់ជាមនុស្សម្នាក់ដែលមិនសូវនិយាយស្ដី ហើយក៏មិននិយមចូលចិត្តផឹកស៊ីទៀត។ ដូច្នេះហើយគ្រប់សកម្មភាព ខ្ញុំបានទុកចិត្តគាត់។ ប៉ុន្តែថ្ងៃមួយសង្សារខ្ញុំបានមកកន្លែងខ្ញុំធ្វើការដោយប្រាប់ថា ម៉ូតូរបស់គាត់ត្រូវគេខ្ចី ហើយមកខ្ចីម៉ូតូខ្ញុំម៉ាក Wave ពណ៌ក្រហម ដើម្បីទៅចូលរួមជប់លៀងជាមួយមិត្តភ័ក្ដិនៅតាខ្មៅ ខេត្តកណ្ដាល។ ខ្ញុំក៏បានហុចសោម៉ូតូឲ្យគាត់ ហើយគាត់ក៏បានទៅបាត់ទៅ"។ ណារ៉ានិយាយ។

រូបតំណាង (សម្ដែង)

រហូតដល់ម៉ោង ៦ល្ងាចទៅហើយ គាត់ក៏មិនឃើញត្រឡប់មកយកខ្ញុំចេញពីកន្លែងធ្វើការតាមការសន្យារបស់គាត់ឡើយ។ ណារ៉ា បានរៀបរាប់ទៀតថា ដោយទ្រាំមិនបានក៏ទូរសព្ទទៅសង្សារ ហើយគាត់ក៏បានលើកទូរសព្ទ ដោយបាននិយាយថា ៖ "បងសុំទោស ម៉ូតូអូនបញ្ចាំបាត់ហើយ ព្រោះបងចាញ់បាល់ ហើយជំពាក់លុយគេ ក៏ដាក់បញ្ចាំម៉ូតូសងគេទៅ"។ គ្រាន់តែឭដូច្នេះខ្ញុំធ្លាក់ថ្លើមក្ដុក ដោយមិននឹកស្មានថា គាត់ហានធ្វើដល់ថ្នាក់នេះ។

មួយអាទិត្យក្រោយមកគាត់ក៏បានលោះម៉ូតូមកឲ្យខ្ញុំវិញ នៅពេលនោះក៏ជាពេលដែលខ្ញុំសម្រេចចិត្តផ្ដាច់ទំនាក់ទំនងជាមួយគាត់ បើទោះបីជាគាត់បានសុំទោស រួមទាំងអង្វរករ ជាច្រើនលើកច្រើនសារក៏ដោយ។ គាត់និយាយថា ៖ "បងសុំទោស បងទើបតែលង់ម្ដងប៉ុណ្ណោះ ហើយសន្យាថា មិនមានជាលើកទី២ នោះទេ ហើយបងសន្យាថា នឹងចូលស្ដីដណ្ដឹងអូនរៀបការតាមប្រពៃណី"។

ទោះបីជាយ៉ាងណាក៏ដោយខ្ញុំមិនអាចជឿលើការអង្វរករនោះបានទៀតទេ ព្រោះទង្វើរបស់សង្សារខ្ញុំបានធ្វើឲ្យខ្ញុំខ្មាសគេផង បាត់បង់ជំនឿចិត្តលើគាត់ផង និងខ្លាចគាត់ធ្វើបាបខ្ញុំលើសនេះនៅពេលរៀបការហើយ។ ណារ៉ានិយាយ។

តើការសម្រេចចិត្តរបស់ខ្ញុំនេះត្រូវទេ? តើជឿថា គាត់នឹងកែខ្លួនទេ ព្រោះគាត់ទើបមានកំហុសលើកទី១?។ ទាំងនេះជាសំណួររបស់ណារ៉ា៕

អត្ថបទ៖ វិបុត្រ