នាយ ស្មាញ បង្ខំចិត្តចេញពីពេទ្យព្រោះអស់លទ្ធភាពព្យាបាល
- 2016-05-25 22:11:04
- ចំនួនមតិ 0 | ចំនួនចែករំលែក 0
នាយ ស្មាញ បង្ខំចិត្តចេញពីពេទ្យព្រោះអស់លទ្ធភាពព្យាបាល
ចន្លោះមិនឃើញ
ដោយសារតែអស់លទ្ធភាព តារាកំប្លែងនាយ ស្មាញ ត្រូវបានគ្រួសារបញ្ជូនទៅសម្រាកព្យាបាលនៅផ្ទះវិញម្ដងកាលពីព្រឹកមិញនេះ បន្ទាប់ពីសម្រាកព្យាបាលនៅមន្ទីរពេទ្យ ១៧៩ រយៈពេល១ខែកន្លងមក។
អ្នកស្រី ហ៊ឹម រដ្ឋា ត្រូវជាភរិយារបស់តារាកំប្លែងរូបនេះបាននិយាយថា ស្ថានភាពជំងឺរបស់ប្ដីទើបបានធូរស្រាលប្រមាណ ៣០%ប៉ុណ្ណោះ។ លោកស្រីបន្តថា បើទោះរួចបន្ទុកមួយដោយសារមន្ទីរពេទ្យមិនយកថ្លៃព្យាបាល ប៉ុន្តែនៅតែមិនមានលទ្ធភាពចំណាយលើការហូបចុកផ្ទាល់ខ្លួន ទើបអ្នកស្រីសម្រេចចិត្តសុំការអនុញ្ញាតពីគ្រូពេទ្យ នាំយកអ្នកជំងឺទៅបន្ទាយទូលក្រសាំងវិញ ដែលជាកន្លែងស្នាក់នៅរបស់អ្នកទាំងពីរ។
“ពួកខ្ញុំមិនដែលមានផ្ទះហ្នឹងគេទេ នៅតែក្នុងបន្ទាយតើ! នៅពេទ្យយើងចំណាយលើការហូបចុកច្រើន ឥឡូវអស់លុយ ទើបទៅបន្ទាយទាហានវិញ"។ អ្នកស្រី ហ៊ឹម រដ្ឋា ថ្លែងមកកាន់ Sabay។ ភរិយាតារាកំប្លែងដដែលបន្តថា ការពិតទៅជំងឺប្ដីរបស់អ្នកស្រី ពេទ្យតម្រូវឱ្យសម្រាកព្យាបាលចំនួន ៦ខែឯណោះ។ ហើយប្រសិនបើរយៈពេលនេះមិនជាសះស្បើយ ពេទ្យតម្រូវឱ្យព្យាបាលរយៈពេល៦ខែបន្ថែមទៀត ដើម្បីព្យាបាលបន្ត។
ទោះបីជាប្ដីប្រឡូកក្នុងវិស័យសិល្បៈយ៉ាងណាក្ដី ប៉ុន្តែអ្នកស្រីបង្ហើបថា ក្នុងរយៈពេលសម្រាកនៅក្នុងមន្ទីរពេទ្យ ហាក់ដូចជាគ្មានអ្នករួមអាជីពណាទៅសួរសុខទុក្ខនោះទេ គឺមានតែប្រធានសមាគមសិល្បករខ្មែរលោក សុះ ម៉ាច និងតារាកំប្លែង ខាត់ ចំរើន ប៉ុណ្ណោះ។ អ្នកទាំងពីរបាននាំយកថវិកាមួយចំនួនជួយឧបត្ថម្ភដល់តារាកំប្លែងរូបនេះផងដែរ។
ទោះបីជាយ៉ាងណា អ្នកស្រីអះអាងថា បច្ចុប្បន្នគ្រួសារកំពុងជួបបញ្ហាជីវភាព បន្ទាប់ពីនាយ ស្មាញ ធ្លាក់ខ្លួនឈឺមិនអាចរកចំណូលបានដូចពីមុន។ ចំណែកអ្នកស្រីត្រូវចំណាយពេលទាំងស្រុង ដើម្បីថែទាំប្ដីដូចគ្នាដែរ។៕
ប្រសិនបើសប្បុរសជនចង់ឧបត្ថម្ភដល់តារាកំប្លែងនាយ ស្មាញ សូមទាក់ទងទៅកាន់លេខ ០១២ ៩៣២ ៦៧២៕