តារាសម្ដែង ណូ ជ័យរិទ្ធី ស្រងាកចិត្តថ្ងៃបុណ្យគម្រប់ ១០០ថ្ងៃម្ដាយ

2016-05-26 00:14:51
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង ណូ ជ័យរិទ្ធី បានសម្ដែងភាពខកបំណងនៅក្នុងពិធីបុណ្យគម្រប់ ១០០ថ្ងៃឧទ្ទិសកុសលជួនម្ដាយកាលពីល្ងាចម្សិលមិញនេះ ព្រោះមានអ្នកសិល្បៈតិចតួចប៉ុណ្ណោះចូលរួម។

“ចប់ហ្មងអ្នកសិល្បៈយើង! ខ្ញុំខំត្រៀមម្ហូបអាហារច្រើនណាស់សម្រាប់ទុកផ្គត់ផ្គង់បងប្អូនអ្នកសិល្បៈយើង តែអត់មានអ្នកមកចូលរួមសោះ"។ ណូ ជ័យរិទ្ធី ថ្លែងមកកាន់ Sabay មុននេះ។ លោកបន្តថា បន្ទាប់ពីដំណឹងតាមបណ្ដាញសង្គមកន្លងមក ហាក់ដូចជាមានអ្នកសិល្បៈរួមអាជីពជាច្រើន បង្ហាញឆន្ទៈចូលរួម ទើបលោកឱ្យចុងភៅត្រៀមម្ហូបអាហារជាច្រើនដូច្នេះ។

ទោះបីជាយ៉ាងណា តារាសម្ដែងរូបនេះបន្ថែមថា សូម្បីអ្នករួមអាជីពមួយចំនួន ដែលលោកធ្លាប់ទៅចូលរួមកម្មវិធីរបស់ពួកគេមិនដែលខាននោះ ក៏មិនបានបង្ហាញមុខមកចូលរួមដែរ។ លោកបន្តថា៖" សូម្បីកាលបូជាសពម្ដាយរបស់ខ្ញុំ ក៏មានតែពីរនាក់បងស្រីខ្ញុំដែរ គ្មាននរណាគេមកចូលរួមដែរហ្នឹង"។

ណូ ជ័យរិទ្ធី បានរំលឹកថា ការម្ដាយរបស់លោកឈ្មោះ ឡាយ ស៊ីវណ្ណា ក៏ជាអតីតអ្នករាំរបាំមួយរូបនៅក្នុងព្រះបរមរាជវាំងដែរ ហើយបានទទួលអនិច្ចកម្មដោយជរាពាធនាពេលកន្លងមក។ ដោយឡែកចំពោះឪពុករបស់លោកវិញ ក៏ធ្លាប់មានប្រវត្តិជាអតីតផលិតករភាពយន្តមួយរូបដែរក្នុងទសវត្សឆ្នាំ ១៩៦០ និង១៩៧០។ ហើយនិស្ស័យសិល្បៈបានបន្តមកដល់រូបលោកនាពេលបច្ចុប្បន្ន៕