ម្ដាយ ខេម យកប្លង់ផ្ទះទៅបញ្ចាំយកលុយបង់ឱ្យគ្រួសារអ្នកស្លាប់ ប៉ុន្តែ...
- 2016-05-27 18:46:04
- ចំនួនមតិ 0 | ចំនួនចែករំលែក 0
ម្ដាយ ខេម យកប្លង់ផ្ទះទៅបញ្ចាំយកលុយបង់ឱ្យគ្រួសារអ្នកស្លាប់ ប៉ុន្តែ...
ចន្លោះមិនឃើញ
ម្ដាយរបស់តារាចម្រៀង ខេម បាននិយាយថា អ្នកស្រីបានយកប្លង់ផ្ទះទៅបញ្ចាំ ដើម្បីយកប្រាក់ផ្ដល់សំណងដល់គ្រួសារអ្នកស្លាប់ក្នុងហេតុការណ៍គ្រោះថ្នាក់ចរាចរណ៍កន្លងមកនេះ ទោះមិនទាន់ដឹងខុសត្រូវយ៉ាងណាក្ដី។
ប៉ុន្តែអ្នកស្រី ឡាច ម៉ាលី និយាយបន្តថា ភាគីគ្រួសារអ្នកស្លាប់មិនព្រមទទួលយកសំណងចំនួន ៤ ០០០ ដុល្លារអាមេរិកបានពីការបញ្ចាំប្លង់ផ្ទះនោះទេ ដោយទាមទារឱ្យកូនប្រុសផ្ដល់សំណង ២៥ ០០០ ដុល្លារអាមេរិកជាដាច់ខាត។ " ខ្ញុំសុំជូន ៤ ០០០ ដុល្លារក្នុងក្ដីស្រឡាញ់ហ្នឹង គេអត់ទទួលយកទេ ហើយលុយហ្នឹងខ្ញុំយកប្លង់ផ្ទះទៅបញ្ចាំគេទេ ខ្ញុំស្ទើរតែគ្មានផ្ទះនៅហើយប្អូន តែគេអត់យកទេ"។
ស្ត្រីវ័យ៥៦ឆ្នាំរូបនេះបន្តថា បច្ចុប្បន្នមិនបានដឹងថា កូនប្រុសរបស់ខ្លួននៅទីណានោះទេ ព្រោះបន្ទាប់ពីជួបរឿងរ៉ាវគ្រោះថ្នាក់ចរាចរណ៍ ខេម មិនបានទាក់ទងមកម្ដាយឡើយ។ ហើយបងស្រីរបស់ ខេម ជាអ្នកចេញមុខដោះស្រាយជំនួសជាមួយនឹងគ្រួសារជនរងគ្រោះ។
ប្រភពដដែលបង្ហើបថា ដោយសារតែភាគីម្ខាងទៀត នៅតែមិនព្រមទទួលយកសំណង ៤ ០០០ ដុល្លារ មានតែទុកឱ្យតុលាការជាអ្នកវិនិច្ឆ័យ។ អ្នកស្រីបន្តថា៖"ឱ្យសំពះក៏ខ្ញុំសំពះដែរ ដើម្បីកុំឱ្យមានបញ្ហាថ្ងៃក្រោយ តែគេអត់ព្រមទទួលយក បើគេរឹងប៉ុណ្ណឹងហើយ យើងទៅចរចាក៏អត់ប្រយោជន៍ដែរ"។
ទោះបីជាយ៉ាងណា ម្ដាយរូបនេះបន្តថា អ្នកស្រីចង់ដោះស្រាយបញ្ហារបស់កូនប្រុសឱ្យបានឆាប់ ព្រោះអ្នកស្រីក៏កំពុងមានជំងឺបេះដូងធ្ងន់ធ្ងរ ដែលធ្វើទុក្ខជារឿយៗ និងសន្លប់ជារៀងរាល់ថ្ងៃ ។ អ្នកស្រីបន្តថា បានអ្នកជិតខាងជួយយកអាសាពេលជំងឺធ្វើទុក្ខម្ដង ព្រោះកូនស្រីជាប់រវល់ដោះស្រាយបញ្ហារបស់ ខេម៕
អត្ថបទ៖ សំ ជំនាញ