របរលក់ចេក១ម៉ូតូ ស្ត្រីមេម៉ាយ សា វង្ស អាចឱ្យកូនរៀនបរិញ្ញាដល់ទៅ ២ នាក់
- 2016-06-03 14:33:25
- ចំនួនមតិ 0 | ចំនួនចែករំលែក 0
របរលក់ចេក១ម៉ូតូ ស្ត្រីមេម៉ាយ សា វង្ស អាចឱ្យកូនរៀនបរិញ្ញាដល់ទៅ ២ នាក់
ចន្លោះមិនឃើញ
ត្បិតជាស្ត្រីមេម៉ាយ ប៉ុន្តែអ្នកស្រី សា វង្ស មានកម្លាំងដឹកចេកលក់ទម្ងន់រាប់រយគីឡូ តាមម៉ូតូសង់កូរ៉េជំនំមួយគ្រឿងបាន ដូចមនុស្សប្រុសអ៊ីចឹងដែរ។ អ្នកស្រីបានប្រាប់ Sabay នៅម៉ោង ៥ កន្លះព្រឹកថា សព្វថ្ងៃអ្នកស្រីមានកូនក្នុងបន្ទុកបីនាក់ គឺកូនច្បងរៀនឆ្នាំទី ៣ កូនទីពីររៀនឆ្នាំទី ១ និងកូនម្នាក់ទៀតកំពុងរៀនថ្នាក់ទី ១២។
ដៃកំពុងលើកចេកចុះ រីឯមាត់វិញនិយាយថា របបដឹកចេកលក់នេះ អាចធ្វើឱ្យអ្នកស្រីមានលុយកាក់សមរម្យ សម្រាប់ចាយវាយ និងបង់ថ្លៃសាលាសម្រាប់កូន៖ "ខ្ញុំគ្មានរកអីទេ អាហ្នឹង លក់តែចេកហ្នឹង"។
យ៉ាងណាលោកស្រីរៀបរាប់ថា របបនេះមានការលំបាកបន្តិចបន្តួចដែរ ដូចជាត្រូវទៅកាប់នៅចម្ការក្នុងព្រៃ ដឹងតាមផ្លូវជង្ហុក ផ្លូវរទេះគោ និងត្រូវជិះដឹកជាច្រើនគីឡូ ពីកៀនស្វាយមកលក់នៅផ្សារបឹងត្របែកផ្លាហ្សា។
ស្ត្រីវ័យ៤៥ឆ្នាំ ថា៖ “ខ្ញុំឈប់បីដង ទម្រាំមកដល់នេះ។ ទាល់តែខ្លាំងទើបអាចដឹកបាន"។
ទោះលំបាកក្ដីអ្នកស្រីមិនបានរុញរាឡើយ ព្រោះក្ដីសង្ឃឹមរបស់អ្នកស្រី គឺចងឃើញកូនប្រុសស្រី បានរៀនសូត្រខ្ពង់ខ្ពស់ មានការងារល្អក្នុងសង្គម ដោយមិនចង់ឱ្យហត់នឿយដូចខ្លួនឡើយ។
“ខ្ញុំរៀនបានតិច ពិបាក ចឹងបានខ្ញុំឱ្យកូនរៀនបានច្រើន បានការងារល្អធ្វើ"។ អ្នកស្រុកកៀនស្វាយបញ្ជាក់។
ស្ត្រីសម្បុរខ្មៅស្រអែមបន្តថា ចេករាប់ស្ទងនៅលើម៉ូតូនេះ អាចលក់បានខ្ទង់ ៣០ ម៉ឺនរៀល ដោយមិនទាន់គិតថ្លៃដើម។ រីឯតម្លៃវិញ ក្នុងមួយស្និត ៣ ០០០ រៀលទៅ ៤ ០០០ រៀលតាមផ្លែតូចធំ។ អ្នកស្រីលក់ចាប់ពីម៉ោង ៦ ព្រឹកដល់ ៧-៨ យប់៕
អត្ថបទ៖ អ៊ុំ សុភក្តិ
រូបថតទូរសព្ទដៃ