Messi ឆ្លើយតបទៅតុលាការ រឿងចោទប្រកាន់គេចពន្ធ
- 2016-06-03 16:59:06
- ចំនួនមតិ 0 | ចំនួនចែករំលែក 0
Messi ឆ្លើយតបទៅតុលាការ រឿងចោទប្រកាន់គេចពន្ធ
ចន្លោះមិនឃើញ
Lionel Messi តារាឆ្នើមក្រុម FC Barcelona បានឆ្លើយតបទៅកាន់តុលាការនៅទីក្រុង Barcelona កាលពីថ្ងៃព្រហស្បតិ៍ម្សិលមិញថា ខ្លួនពិតជាមិនបានដឹងរឿងអ្វីទាំងអស់ ទាក់ទងនឹងរឿងបង់ពន្ធ ដោយគិតតែរឿងលេងបាល់ទាត់តែប៉ុណ្ណោះ។
Messi នៅក្នុងតុលាការជិត៤ម៉ោងម្សិលមិញ
Messi និងឪពុក Jorge ត្រូវបានរដ្ឋាភិបាលអេស្ប៉ាញចោទប្រកាន់ថា បានគេចពន្ធប្រាក់ចំនួន ៤,៦លានដុល្លារ នៅចន្លោះឆ្នាំ២០០៧-២០០៩ ទាក់ទងទៅនឹងសិទ្ធរូបថតរបស់គេ ដែលក្រុមហ៊ុននៅប្រទេសមួយចំនួន យកទៅប្រើប្រាស់ ដោយគ្មានការអនុញ្ញាតបង់ពន្ធត្រឹមត្រូវ។ ចំពោះបញ្ហានេះ ព្រះរាជអាជ្ញាអេស្ប៉ាញ តម្រូវឲ្យមានការដាក់ពិន័យប្រធានក្រុមអាហ្សង់ទីនរូបនេះធ្ងន់ធ្ងរ ឬអាចជាប់ពន្ធនាគារដល់ទៅ ២២ខែ។
ខ្សែប្រយុទ្ធវ័យ២៨ឆ្នាំ តម្រូវឲ្យឡើងតុលាការស្រាយបំភ្លឺ រយៈពេល៣ថ្ងៃ តាំងពីថ្ងៃអង្គារ រហូតដល់ថ្ងៃព្រហស្បតិ៍ម្សិលមិញ។
Messi បានបកស្រាយដល់តុលាការថា៖ "ខ្ញុំមិនដែលសួរនាំរឿងពន្ធអ្វីទាំងអស់ជាមួយឪពុករបស់ខ្ញុំ ព្រោះខ្ញុំទុកចិត្តគាត់ និងមេធាវីរបស់ខ្ញុំ។ ខ្ញុំមិនបានដឹងរឿងអ្វីទាំងអស់ ទាក់ទងនឹងរឿងនោះ ខ្ញុំគ្រាន់តែលេងបាល់ទាត់តែប៉ុណ្ណោះ”។
Enrique Bacigalupo មេធាវីរបស់ Messi ក៏បានលើកឡើងផងដែរថា ខ្សែប្រយុទ្ធរូបនេះ ពុំដែលចំណាយពេលសូម្បី១នាទី ដើម្បីអាន សិក្សា ឬស្វែងយល់ពីរឿងពន្ធនេះទេ។ រីឯចំពោះលទ្ធផលសម្រេចរបស់តុលាការយ៉ាងណា ពុំទាន់ដឹងឡើយ៕
ប្រែសម្រួល៖ វិន ជីវ័ន្ត ប្រភព៖ bbc | goal