ក្មេងប្រុសមានស្បែកបែកស្រកាខ្លាំង ត្រូវមើលថែងូតទឹកជាប្រចាំដើម្បីសង្គ្រោះជីវិត

2016-06-07 19:03:34
ចំនួនមតិ 0 | ចំនួនចែករំលែក 0

ចន្លោះមិនឃើញ

កុមារាអាយុ៥ឆ្នាំ Evan Fasciano មកពីរដ្ឋ Connecticut សហរដ្ឋអាមេរិកបានកើតមកជាប់ជាមួយលក្ខខណ្ឌជំងឺបញ្ហាស្បែកតពូជម្យ៉ាងឈ្មោះ Harlequin Ichthyosis ដែលតម្រូវចាំបាច់ត្រូវតែមានការងូតទឹក ធ្វើអនាម័យសម្អាតខ្លួនប្រាណជាប់ជាប្រចាំ។

Evan និងម្តាយ

ម្ដាយរបស់ កុមារា Evan អ្នកស្រី De De បានរៀបរាប់ប្រាប់សារព័ត៌មានអង់គ្លេស Daily Mail ថា រៀងរាល់ថ្ងៃ លោកស្រីត្រូវងូតទឹកឲ្យ Evan ដើម្បីដុសសម្អាតស្បែកដែលរបកចេញ ពីរដងក្នុងមួយថ្ងៃ។ បើសិនមិនលាងសម្អាតស្បែកទាំងនោះចេញទេ វានឹងបែកស្រកា លូតលាស់ឡើងក្រាស់និងលឿនខុសពីធម្មតា ។

ម្ដាយរបស់ Evan បន្ថែមទៀតថា អ្នកស្រីអាចប្រើស្បៃសម្រាប់ដុសខ្លួន Evan បានផងដែរ។ ក្រោយពីងូតទឹកឲ្យកូនប្រុសរួច អ្នកស្រីឬស្វាមីអ្នកស្រីតែងប្រើក្រែមផ្ដល់សំណើមលាបឲ្យ Evan ដើម្បីកុំឲ្យស្បែកឆាប់ស្ងួតប្រេះ។

ចំពោះបញ្ហាជំងឺកើតឡើងលើកូនប្រុស លោក Joe Fasciano បានឲ្យដឹងថា៖ "ពិតណាស់មនុស្សមួយចំនួនបានមើលទៅ Evan គឺគេមានរូបរាងចម្លែក ហើយអ្នកដែលមិនធ្លាប់ស្គាល់ Evan ប្រាកដជាឆ្ងល់។ ម្ដាយរបស់គេមិនចង់ឲ្យមនុស្សជាច្រើននិយាយមិនល្អពី Evanទេ ដូចនេះពួកយើងតែងបង្រៀនឲ្យ Evan និយាយសួស្ដីជាការរាក់ទាក់មុនដល់មនុស្សគ្រប់គ្នា"។

គួរបញ្ជាក់ជំងឺ Harlequin Ichthyosis ជាករណីជំងឺហ្សែនកម្រមួយ ដែលអាចកើតឡើងលើទារកមួយក្នុងចំណោមកូន៤នាក់។ ទារកដែលកើតមកជាមួយលក្ខខណ្ឌជំងឺនេះមានស្បែកលូតលាស់លឿនជាងទារកមានស្បែកធម្មតា៧ដងបង្កឲ្យស្បែកក្រាស់ប្រេះស្រកា ដែលត្រូវការចាំបាច់សម្អាតនិងអនាម័យជាប្រចាំ៕