កូន Jack Ma គ្មានភាពកក់ក្ដៅ ១០ ឆ្នាំព្រោះឪពុកម្ដាយវក់នឹងការងារ

2016-06-09 13:10:40
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សភាគច្រើនស្គាល់លោក Jack Ma ជាមហាសេដ្ឋីដ៏ល្បីឈ្មោះមួយរូប ដែលជាម្ចាស់ក្រុមហ៊ុនលក់ទំនិញ Alibaba។ មុននឹងមានថ្ងៃនេះលោកបានស៊ូជម្នះឧបសគ្គជាច្រើន ហើយដោយសាររវល់វក់ការងារពេកធ្វើឲ្យលោកភ្លេចគិតពីកូនប្រុស ដែលមិនទទួលបានភាពកក់ក្ដៅពីឪពុកម្ដាយ។

អ្នកស្រី Zhang Ying ដែលជាភរិយារបស់លោក Jack Ma ធ្លាប់បានលើកឡើងពីពេលមួយដែលប្ដីប្រពន្ធអ្នកស្រី បានពលីកម្មកូនប្រុសដែលកើតនៅឆ្នាំ ១៩៩២។ ដោយគិតគូផលប្រយោជន៍ក្រុមហ៊ុនជាធំ អ្នកស្រី Zhang និងស្វាមីបានបញ្ជូនកូនរបស់ខ្លួនទៅមណ្ឌលមើលថែក្មេងចំនួនប្រាំថ្ងៃក្នុងមួយសប្ដាហ៍ ដោយជួបមុខកូនតែថ្ងៃចុងសប្ដាហ៍ប៉ុណ្ណោះ។

នៅឆ្នាំ ២០០២ ពេលដែលអ្នកស្រី Zhang កាន់តំណែងជាអ្នកចាត់ការទូទៅនៅទីស្នាក់ការក្រុមហ៊ុន Alibaba ក្នុងប្រទេសចិន កូនដែលមានអាយុ ១០ ឆ្នាំរបស់អ្នកស្រីបានញៀននឹងការលេងហ្គេមអនឡាញ ដោយចំណាយពេលជាច្រើននៅហាងអ៊ីនធឺណិតកាហ្វេ។ កូនប្រុសនេះនិយាយថា ការទៅផ្ទះគ្មានន័យអីនោះទេ បើឪពុកម្ដាយមិននៅផងនោះ។

Ma Yuankun កូនប្រុសរបស់ Jack Ma

ដោយមានចិត្តព្រួយបារម្ភពីកូន Jack Ma បានឲ្យប្រពន្ធរបស់ខ្លួនលាចេញពីតំណែងចាត់ការទូទៅ ដើម្បីធ្វើជាមេផ្ទះពេញម៉ោងវិញ។ Jack Ma បាននិយាយទៅកាន់ភរិយាខ្លួនថា៖ "ក្រុមគ្រួសាររបស់យើងត្រូវការអូនច្រើនជាង ក្រុមហ៊ុនត្រូវការអូន ហើយដែលត្រូវជ្រើសរើសរវាងលុយ និង កូនប្រុស។

ដំបូងអ្នកស្រី Zhang មិនពេញចិត្តនឹងការស្នើសុំនេះដោយយល់ថាលោក Jack Ma ចាត់ទុកគាត់ដូចជាកូនអុក ពេលរៀបការដំបូងអ្នកស្រីបានត្រៀមចិត្តធ្វើជាមេផ្ទះរួចហើយ ប៉ុន្តែក្រោយមកក៏ត្រូវអូសទាញចូលក្រុមហ៊ុន Alibaba ហើយពេលក្រុមហ៊ុនជោគជ័យហើយបែរជាចង់ឲ្យអ្នកស្រីត្រឡប់ធ្វើជាមេផ្ទះវិញ។ យ៉ាងណាក្ដីចុងក្រោយអ្នកស្រីនៅតែសម្រេចជ្រើសយកតួនាទីជាមេផ្ទះ ដើម្បីបំពេញភាពកក់ក្ដៅឲ្យកូនប្រុសរបស់ខ្លួនវិញ។

លោក Jack Ma ស្ងប់ស្ញែងនឹងការលះបង់របស់ភរិយា ហើយបានផ្ដល់នូវភាពជោគជ័យរបស់ខ្លួនទាំងក្រុមហ៊ុន និង គ្រួសារទៅកាន់អ្នកស្រី Zhang។ បច្ចុប្បន្ននេះលោក Jack Ma ជាមហាសេដ្ឋីមានជាងគេលំដាប់ទីពីរក្នុងប្រទេសចិន ដោយមានទ្រព្យសម្បត្តិសរុប ២៣,១ ពាន់លានដុល្លារ៕

ចុចអាន៖ ពីក្នុងផ្ទះតម្លៃ ៧ លានដុល្លាររបស់សេដ្ឋីវ័យក្មេង Mark Zuckerberg

ប្រែសម្រួល៖ ហៃ សុខហេង ប្រភព៖ wantchinatimes