កម្ពុជានឹងនាំចូលរថយន្តទំនើប ២គ្រឿង ចល័តធ្វើឆៀកដល់ខេត្តតែម្ដង

2016-06-15 22:19:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងសាធារណការ និងដឹកជញ្ជូន កំពុងពិភាក្សាជាមួយក្រុមហ៊ុនដ៏ធំមួយនៅប្រទេសកូរ៉េ ដើម្បីនាំយករថយន្តទំនើប ២គ្រឿង មកធ្វើឆៀកជូនប្រជាពលរដ្ឋដល់ខេត្តតែម្ដង ដោយមិនចាំបាច់ចំណាយពេលឡើងមកភ្នំពេញទៀតឡើយ។

“ឥឡូវយើងកំពុងពិភាក្សាជាមួយក្រុមហ៊ុនកូរ៉េមួយ ដើម្បីគេអាចយកឡានធំមក... ឡានហ្នឹងបើកទៅណាក៏បានដែរ គ្រប់ទីកន្លែងទាំងអស់ ហើយឡាននោះអាចទៅឆៀកនៅទីនោះតែម្ដង ដោយមិនបាច់ឲ្យបងប្អូនដែលនៅជនបទ បើកឡានឆ្ងាយមកឆៀកទេ... យើងយកសេវាទៅជូនគាត់ ដល់ផ្ទះគាត់តែម្ដង"។ នេះបើតាមការថ្លែងបញ្ជាក់របស់ ឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងឱកាសបើកសម្ពោធមណ្ឌលប្ដូរ និងពន្យារបណ្ណបើកបររថយន្តផ្សារទំនើបអ៊ីអនកាលពីព្រឹកមិញ។

ឯកឧត្តម ស៊ុន ចាន់ថុល បានបញ្ជាក់ទៀតថា រថយន្តទំនើបនោះមានឧបករណ៍គ្រប់ទាំងអស់ប្រៀបដូចជា Robot ហើយអាចត្រួតពិនិត្យលក្ខណៈបច្ចេកទេសរបស់រថយន្តគ្រប់ផ្នែក។ ក្រសួងសាធារណការ គ្រោងនាំចូល ២គ្រឿងសិនប៉ុណ្ណោះ ព្រោះក្នុងមួយគ្រឿង តម្លៃរហូតដល់ទៅកន្លះលានដុល្លារ។ រថយន្តទាំងនោះ អាចមកដល់កម្ពុជា ២ខែទៀត បន្ទាប់ពីដំឡើងរួចរាល់នៅប្រទេសកូរ៉េ៕