គ្រួសារជនរងគ្រោះក្នុងការវាយប្រហារនៅប៉ារីស ដាក់ពាក្យប្ដឹង Facebook
- 2016-06-20 18:32:35
- ចំនួនមតិ 0 | ចំនួនចែករំលែក 0
គ្រួសារជនរងគ្រោះក្នុងការវាយប្រហារនៅប៉ារីស ដាក់ពាក្យប្ដឹង Facebook
ចន្លោះមិនឃើញ
ក្រុមគ្រួសារនៃជនរងគ្រោះនិស្សិតផ្នែកឌីហ្សាញ ដែលបានស្លាប់ក្នុងឧបទ្ទវហេតុវាយប្រហារដ៏ធំមួយនៅទីក្រុងប៉ារីស កាលពីខែវិច្ឆិកាឆ្នាំទៅ បានដាក់ពាក្យប្ដឹងក្រុមហ៊ុនបណ្ដាញសង្គមធំៗរួមមាន Facebook, Twitter និង Google ដោយចោទថាក្រុមហ៊ុនទាំងនេះផ្ដល់ជំនួយដល់ក្រុម ISIS។
តាមពាក្យបណ្ដឹងរបស់ក្រុមគ្រួសារនិស្សិតស្រីឈ្មោះ Nohemi Gonzalez បានស្នើឲ្យតុលាការដាក់ទោសក្រុមហ៊ុនខាងលើដែលបានបំពានច្បាប់នៃការហាមប្រាមអំពើភេរវកម្មរបស់សហរដ្ឋអាមេរិក។ មិនតែប៉ុណ្ណោះក៏បានទាមទារសំណងជំងឺចិត្ត ដែលទុកឲ្យខាងតុលាការជាអ្នកកំណត់ថែមទៀតផង។
ក្នុងពាក្យបណ្ដឹងបានសរសេរដូចនេះថា៖ "រាប់ឆ្នាំមកហើយ ដែលជនជាប់ចោទ (ក្រុមហ៊ុនទាំងបីខាងលើ) បានអនុញ្ញាតដោយចេតនាឲ្យក្រុម ISIS ប្រើប្រាស់បណ្ដាញទំនាក់ទំនងរបស់ពួកគេ ដើម្បីផ្សព្វផ្សាយការឃោសនាបែបជ្រុលនិយម សម្រាប់រៃអង្គាសប្រាក់ និងអូសទាញសមាជិកថ្មី ហើយអនុវត្តនូវការវាយប្រហារជាច្រើន រាប់បញ្ចូលទាំងការវាយប្រហារនៅប៉ារីសដែលសម្លាប់មនុស្សអស់ ១៣០ នាក់"។
ឆ្លើយតបនឹងពាក្យបណ្ដឹងខាងលើ ក្រុមហ៊ុន Google បានលើកឡើងថា ពួកគេមានគោលការណ៍ហាមឃាត់អំពើភេរវជនដែលបំផុសសកម្មភាពហិង្សា និងបានលុបចោលយ៉ាងលឿនជាទីបំផុតនូវវីដេអូណាដែលបំពានលើការហាមឃាត់របស់ក្រុមហ៊ុន។
ចំណែកឯ Facebook ក៏បានឲ្យលើកឡើងថា នៅលើបណ្ដាញរបស់ខ្លួនគ្មានកន្លែងសម្រាប់ភេរវជនទំនាក់ទំនងគ្នា និងគ្មានជាព័ត៌មានដែលផ្សព្វផ្សាយ ឬ គាំទ្រអំពើភេរវកម្មនោះឡើយ។ ដោយឡែកខាង Twitter ឯណោះវិញនៅមិនទាន់មានប្រតិកម្មចំពោះពាក្យបណ្ដឹងខាងលើឡើយ៕
ចុចអាន៖ Facebook បដិសេធលុបវីដេអូបុរសម្នាក់ ដែលត្រូវគេបាញ់ស្លាប់ពេលកំពុង Live
ប្រែសម្រួល៖ ហៃ សុខហេង ប្រភព៖ HuffingtonPost