CR7 ស៊ុត២ Assist ១ ជួយព័រទុយហ្គាល់ ឡើងវគ្គ១៦ក្រុមទាំងបុកពោះ

2016-06-23 11:56:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិព័រទុយហ្គាល់ បានឡើងទៅវគ្គ១៦ក្រុមចុងក្រោយ នៃពាន Euro 2016 ប៉ះក្រូអាតជាបន្ត បន្ទាប់ពីស្មើ ៣-៣ ទល់នឹងហុងគ្រី ទាំងភ័យបុកពោះ ក្នុងការប្រកួតសន្សំពិន្ទុចុងក្រោយក្នុងពូល F យប់មិញ។

៣គ្រាប់របស់ហុងគ្រី ស៊ុតដោយ Zoltan Gera នាទី១៩ និងប្រធានក្រុម Balazs Dzsudzsak ២គ្រាប់នៅនាទី៤៧ និង៥៥។ រីឯ៣គ្រាប់របស់ព័រទុយហ្គាល់ ដែលស៊ុតតាមស្មើពីក្រោយរហូតនោះ រកបានដោយ Nani នៅនាទី៤២ បន្ទាប់ពី Cristiano Ronaldo ជួយ Assist ឲ្យ ខណៈដែល CR7 រកបាន២គ្រាប់ស៊ុតវាយកែងយ៉ាងស្អាតនៅនាទី៥០ និងតែតនៅនាទី៦២។

ព័រទុយហ្គាល់ ដែលអាចនឹងធ្លាក់ហាលអាវ បើចាញ់ហុងគ្រីយប់មិញនោះ បានបញ្ចប់ចំណាត់ថ្នាក់លេខ៣ មាន៣ពិន្ទុ ហើយពួកគេបានឡើងទៅវគ្គខ្វែងទាំង៧ដង តាំងពីបង្ហាញខ្លួន៧ដង នៅ Euro។

ចំណែកឯហុងគ្រី បានឈរកំពូលតារាងពូល F មាន៥ពិន្ទុ និងឡើងប៉ះបែលហ្សិក នៅវគ្គ១៦ក្រុម។ រីឯ១គូទៀតក្នុងពូល F នេះដែរ អ៊ីស្លង់បានចំណាត់ថ្នាក់លេខ២ មាន៥ពិន្ទុ បន្ទាប់ពីស៊ីអូទ្រីស ២-១ នៅចុងម៉ោង៕