ទើបដឹង តាមពិតយុវជនដែលស្លាប់ដោយសារផ្ទុះកាំជ្រួច មិនបានស្ថិតនៅក្បែរកន្លែងដុតកាំជ្រួចទេ
- 2014-10-30 21:00:04
- ចំនួនមតិ 0 | ចំនួនចែករំលែក 0
ទើបដឹង តាមពិតយុវជនដែលស្លាប់ដោយសារផ្ទុះកាំជ្រួច មិនបានស្ថិតនៅក្បែរកន្លែងដុតកាំជ្រួចទេ
ចន្លោះមិនឃើញ
ប្រភពច្បាស់ការពីប្រជាពលរដ្ឋនៅហ្នឹងកន្លែងកើតហេតុបានប្រាប់ Sabay ឲ្យដឹងថា តាមពិតយុវជន ណាគ្រី ដារ៉ូ ដែលបានស្លាប់យ៉ាងអាណោចអាធ័មដោយសារហេតុការណ៍ផ្ទុះកាំជ្រួចក្នុងកាលពីយប់មិញនេះ មិនបានមកឈរមើលគេដុតកាំជ្រួចជិតដោយផ្ទាល់នោះទេ គឺរូបគេនៅឆ្ងាយពីកន្លែងកើតហេតុដល់ទៅជាង ២០០ម៉ែត្រឯណោះ។
ប្រភពប្រាប់ថា មុនពេលស្លាប់ គេបានឃើញ យុវជន ដារ៉ូ បានមកអង្គុយទស្សនាកាំជ្រួច(កាំជ្រួចដែលបានបាញ់ឡើងទៅលើមេឃ) ជាមួយប្រជាពលរដ្ឋរាប់រយនាក់ទៀត នៅមាត់ទន្លេត្រើយម្ខាងប៉ែកខាងសណ្ឋាគារសុខា ដោយអង្គុយទ្រាប់ស្បែកផ្ទាល់ហ្នឹងដី។
ពេលឧប្បត្តិហេតុផ្ទុះគ្រាប់កាំជ្រួចកើតឡើង ប្រភព អះអាងទៀតថា គ្រាប់ទី១ បានហោះទៅបុកកញ្ចក់សណ្ឋាគារសុខាឯណោះ។ ប៉ុន្តែគ្រាប់ចុងក្រោយ មិនបានហោះទៅលើមេឃតាមការគ្រោងទេ បែរជាហោះចូលក្នុងហ្វូងមនុស្ស ហើយក៏បានហោះសំដៅយុវជនរងគ្រោះ ណាគ្រី ដារ៉ូ ធ្លាយពោះស្លាប់យ៉ាងអាណោចអាធ័មនៅហ្នឹងកន្លែងតែម្ដង។
ហេតុការណ៍ខាងលើ បានកើតឡើងនៅវេលាម៉ោងប្រមាណ ៧ និង ៣០នាទីយប់ថ្ងៃទី២៩ ជាវេលាបាញ់កាំជ្រួចអបអរសាទរ ព្រះរាជពិធីយាងគ្រងរាជ្យសម្បត្តិព្រះមហាក្សត្រខ្មែរ ព្រះករុណាព្រះបាទសម្តេចព្រះបរមនាថ នរោត្តម សីហមុនី។ ហេតុការណ៍បានបណ្ដាល មនុស្សម្នាក់ស្លាប់ និង៤ផ្សេងទៀតបានរងរបួស។ យុវជន ណាគ្រី ដារ៉ូ មានវ័យអាយុ២៣ឆ្នាំ មានស្រុកកំណើតនៅឃុំឈើខ្មៅ ស្រុកកោះធំ ខេត្តកណ្តាល។ រូបគេ ជានិស្សិតសាកលវិទ្យាល័យស៊ីតិក៕
មនុស្ស ១ នាក់ស្លាប់ និង ៤ នាក់រងរបួស ក្នុងករណីផ្ទុះកាំជ្រួច យប់មិញ (វីដេអូ)
ប្រជាពលរដ្ឋនៅតែមកមើលកន្លែងកើតហេតុនៅឡើយព្រឹកនេះ
អត្ថបទ៖ ទារិកា
រូបថត៖ ទូរសព្ទដៃ