Fans អេស្ប៉ាញ ចង់ឲ្យ Iniesta ជាអ្នកទាត់ប៉េណាល់ទីលើកក្រោយ

2016-06-24 18:49:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយ Sergio Ramos ប្រធានក្រុមជម្រើសជាតិអេស្ប៉ាញ ទាត់បាល់ពិន័យ១១ម៉ែត្រមិនបានសម្រេច អំឡុងការប្រកួតចាញ់ក្រូអាត ២-១ កាលពីថ្ងៃពុធ អ្នកគាំទ្រអេស្ប៉ាញជាច្រើន ចង់ឲ្យខ្សែបម្រើ Andres Iniesta ជាអ្នករ៉ាប់រងតួនាទីនេះជំនួសវិញ នៅឱកាសក្រោយៗទៀត។ នេះបើតាមការស្ទង់មតិលើវិបសាយអេស្ប៉ាញមួយ។

បើតាមការស្ទង់មតិលើវិបសាយ Marca បានឲ្យដឹងថា អ្នកគាំទ្រអេស្ប៉ាញ បានបោះឆ្នោតឲ្យខ្សែបម្រើក្រុម FC Barcelona (Iniesta) ជាអ្នកទាត់បាល់ពិន័យ១១ម៉ែត្រ សម្រាប់ក្រុមអេស្ប៉ាញនៅលើកក្រោយ មានចំនួន៤០,៥២% ខណៈដែល Cesc Fabregas របស់ក្រុម Chelsea នៅលេខរៀងទី២ បាន១៨,៥៤%។ រីឯខ្សែការពារ Ramos របស់ក្រុម Real Madrid បានត្រឹម៩,៨៤% ប៉ុណ្ណោះ។

Ramos ស៊ុតអត់ចូលបាល់ពិន័យ១១ម៉ែត្រ ទល់នឹងក្រូអាត ពិតជាប៉ះពាល់ខ្លាំង ដែលជាលទ្ធផលធ្វើឲ្យអេស្ប៉ាញ ត្រូវប៉ះអ៊ីតាលី ដែលជាគូប្រកួតដ៏តានតឹងនៅវគ្គ១៦ក្រុម។

ចំណែកខ្សែបម្រើឆ្នើម (Playmaker) Iniesta ធ្លាប់ទាត់បាល់ពិន័យ១១ម៉ែត្រឲ្យក្រុមជម្រើសជាតិអេស្ប៉ាញលើកចុងក្រោយ កាលខែកញ្ញា ឆ្នាំ២០១៥ ពេលប៉ះស្លូវ៉ាគី ហើយពេលនោះ កីឡាករវ័យ៣២ឆ្នាំរូបនេះ ស៊ុតបញ្ចូលទីដាច់ចង្កេះអ្នកចាំទីបានយ៉ាងល្អ៕

ប្រែសម្រួល៖ វិន ជីវ័ន្ត ប្រភព៖ marca