KMH Champions យកប្រាក់ជាង១ម៉ឺនដុល្លារជូនគន្ធបុប្ផា
- 2016-06-24 20:29:56
- ចំនួនមតិ 0 | ចំនួនចែករំលែក 0
KMH Champions យកប្រាក់ជាង១ម៉ឺនដុល្លារជូនគន្ធបុប្ផា
ចន្លោះមិនឃើញ
លោក កាំង សេន អ្នកដឹកនាំការប្រកួតពានរង្វាន់ KMH Champions League និង KMH Cup បាននាំយកប្រាក់ចំនួន ១៦ ០០០ដុល្លារអាមេរិកជូនដល់មន្ទីរពេទ្យគន្ធបុប្ផាកាលពីព្រឹកមិញនេះ ដោយប្រាក់ទាំងនេះទទួលបានពី Sponsors នានា ក៏ដូចជាក្លឹបដែលចូលរួមប្រកួតផ្ទាល់។
លោក កាំង សេន បាននិយាយថា៖ “ប្រាក់ទាំងអស់ដែលយើងមាននេះ គឺបានមកពីអ្នកឧបត្ថម្ភនានា ក៏ដូចជាក្លឹបចូលរួមប្រកួតជួយគ្នាមួយដៃមួយជើង។ ថវិកាមិនជាច្រើន ប៉ុន្តែវាជាចំណែកមួយដែលអាចជួយដល់សង្គម។ ខ្ញុំសង្ឃឹមថានៅឆ្នាំក្រោយៗទៀត យើងនឹងអាចប្រមូលប្រាក់បានច្រើនជាងនេះជូនមន្ទីរពេទ្យ"។
អ្នករៀបចំកម្មវិធីប្រកួតខាងលើបានបន្ថែមថានៅខែសីហាខាងមុខនេះ លោកនឹងយកថវិកាមកជួយគន្ធបុប្ផាម្ដងទៀតដែលអាចមានចំនួន ១៤ ០០០ដុល្លារអាមេរិក ដែលមានការចូលរួមពីក្រុម KMH All Stars និងក្រុមជម្រើសជាតិកម្ពុជា ព្រោះនៅខែសីហានេះ ក្រុមទាំងពីរនឹងមានប្រកួតសប្បុរសធម៌មួយ ក្នុងន័យប្រមូលប្រាក់ជូនគន្ធបុប្ផាដូចគ្នា។
មូលហេតុដែលធ្វើឱ្យមានការបែងចែកប្រាក់ជាពីរដំណាក់កាលយ៉ាងនេះ គឺត្រូវបានលោក កាំង សេន ពន្យល់ថាដោយសារតែក្រុមការងាររបស់លោកទទួលបាន ប្រភពចំណូលពីការរៀបចំពានពីរគឺ KMH Champions League និង KMH Cup ។ ខណៈដែលពេលខាងមុខមានការប្រកួតមួយទៀត អីចឹងហើយទើបតម្រូវឱ្យមានការផ្ដល់ជូន២ដងតែម្ដង ក្រែងលើកទី២នេះអាចបានច្រើនជាងលើកទីមួយ។
លោក កាំង សេន អាវខៀវ
នេះជាឆ្នាំទី២ ហើយដែលក្រុមការងាររបស់លោក កាំង សេន បាននាំយកថវិកាមកជូនមន្ទីរពេទ្យគន្ធបុប្ផា ដោយកាលពីឆ្នាំមុនប្រមូលគ្នាបានជិត២ម៉ឺនដុល្លារ។ បុរសវ័យក្មេងស្រលាញ់កីឡារូបនេះ រំពឹងថាលោកនឹងអាចរៀបចំការប្រកួត KMH Champions បានបន្ដទៀតនៅឆ្នាំក្រោយ ដើម្បីប្រមូលប្រាក់បានកាន់តែច្រើនជួយដល់មន្ទីរពេទ្យដែលសង្គ្រោះជីវិតកុមារនៅកម្ពុជារាប់ម៉ឺននាក់៕
អត្ថបទ៖ មុន្នី រម្យ
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
