ណាហ្គា ទម្លាក់ ការពារជាតិ ពីកំពូលតារាង ខណៈ បឹងកេត ឡើងឈរលេខ១
- 2016-06-26 00:30:19
- ចំនួនមតិ 0 | ចំនួនចែករំលែក 0
ណាហ្គា ទម្លាក់ ការពារជាតិ ពីកំពូលតារាង ខណៈ បឹងកេត ឡើងឈរលេខ១
ចន្លោះមិនឃើញ
ក្រុមខ្លាំងបឹងកេតអង្គរទទួលបានជ័យជម្នះលើក្រុមវេស្ទើនភ្នំពេញដោយលទ្ធផល ២-១ ដើម្បីឡើងទៅឈរលើកំពូលតារាង បន្ទាប់ពីណាហ្គាវើលបានទម្លាក់ក្រុមកំពូលតារាងក្រសួងការពារជាតិ តាមរយៈជ័យជម្នះ១-០ ក្នុងសប្តាហ៍ទី១១នៃលីគបាល់ទាត់កំពូលកម្ពុជា២០១៦។
ការប្រកួតនៅកីឡដ្ឋានវេស្ទើន ក្រុមបឹងកេតអង្គរត្រូវបានម្ចាស់ផ្ទះវេស្ទើនភ្នំពេញបានទម្លាយសំណាញ់ទីនាំមុខ១-០ នៅនាទីទី៧ដោយកីឡាករ រុន រ៉ានី។ ក្រុមភ្ញៀវបឹងកេតក៏បានព្យាយាមវាយសម្រុកយ៉ាងខ្លាំង ប៉ុន្តែមិនអាចបំប៉ោងសំណាញ់ទីរបស់វេស្ទើនបានឡើយ។ ចប់តង់ទី វេស្ទើន នាំមុខ បឹងកេត ១-០។ ទោះជាយ៉ាងណា ទម្លាប់ការវាយបកនៅតង់ទីពីររបស់បឹងកេតអង្គរនៅតែកើតមានដដែល ដោយបានព្យាយាមវាយបករហូតស៊ុតចូលទីរបស់វេស្ទើនភ្នំពេញ២គ្រាប់វិញដោយខ្សែប្រយុទ្ធ ឃួន ឡាបូរ៉ាវី ទាំង២គ្រាប់ក្នុងនាទី៦៣ និង៦៥។ ចប់ការប្រកួត បឹងកេត ឈ្នះ វេស្ទើន ២-១។
ចំណែកនៅទីលានស្តាតចាស់វិញ ក្រុមកំពូលតារាងក្រសួងការពារជាតិ និងភ្ញៀវណាហ្គាវើលមិនអាចទម្លាយសំណាញ់ទីគ្នាបានទេសម្រាប់ការវាយសម្រុកគ្នាទៅវិញទៅកនៅតង់ទី១។ ការប្រកួតនៅតង់ទីពីរ លទ្ធផលស្ទើរតែគ្នាទៅហើយ ប៉ុន្តែទីបំផុតនៅម៉ោងបន្ថែម៩០+៣ ខ្សែប្រយុទ្ធរបស់ណាហ្គាវើល Anderson បានតែតទម្លាយសំណាញ់ទីរបស់ក្រសួងការពារជាតិបានសម្រេច។ ចប់ការប្រកួត ទ័ព ចាញ់ ណាហ្គាវើល ១-០។
ដូច្នេះការប្រឹងប្រែងការពារតំណែងកំពូលរបស់ក្រសួងការពារជាតិបានធ្លាក់នៅក្នុងសប្តាហ៍នេះហើយ ខណៈបំណងប្រាថ្នាឡើងកំពូលតារាងរបស់បឹងកេតអង្គរបានសម្រេច។ ទោះជាយ៉ាងណា ការប្រកួតនៅច្រើនសប្តាហ៍ទៀតដែលក្រុមនីមួយៗត្រូវការប្រឹងប្រែងបន្ថែមទៀត៕
ក្រុមក្រសួងការពារជាតិ
អត្ថបទ៖ ជាន ចាន់រ៉ា