យន្តហោះសិង្ហបុរីមួយគ្រឿង ត្រូវភ្លើងឆេះពេលចុះចតនៅព្រលាន
- 2016-06-27 16:11:11
- ចំនួនមតិ 0 | ចំនួនចែករំលែក 0
យន្តហោះសិង្ហបុរីមួយគ្រឿង ត្រូវភ្លើងឆេះពេលចុះចតនៅព្រលាន
ចន្លោះមិនឃើញ
ជើងហោះហើរលេខ SQ368 មួយគ្រឿងរបស់ប្រទេសសិង្ហបុរី Singapore Airlines(SIA)ដែលធ្វើដំណើរទៅកាន់ទីក្រុង Milan ប្រទេសអ៊ីតាលីថ្មីៗនេះ បានចុះចតភ្លាមៗក្រោយជួបហេតុការណ៍លេចធ្លាយប្រេងយន្តហោះ។ នេះបើយោងតាម Channel News Asia។
យន្តហោះធុន Boeing 777-300 បានចេញដំណើរពីព្រលាន Changi ប្រទេសសិង្ហបុរីទៅក្រុង Milan នាម៉ោង២:០៥នាទីយប់ចូលថ្ងៃច័ន្ទនេះ (ត្រូវនឹងម៉ោង ១:០៥នាទីយប់នៅកម្ពុជា) ។ រយៈពេលពីរម៉ោងកន្លះក្នុងការចេញដំណើរ ជើងហោះហើរបានហោះត្រលប់មកសិង្ហបុរីវិញភ្លាមដោយសារការធ្លាយសាំងយន្តហោះ។ នេះបើតាមអ្នកដំណើរលើយន្តហោះប្រាប់ទៅសារព័ត៌មាន។
តាមការឲ្យដឹងពីក្រុមហ៊ុនជើងហោះហើរ Singapore Airlines(SIA)ផ្ទាល់ បានឲ្យដឹងថា គឺមានលោតសញ្ញាព្រមានបង្ហាញពីបញ្ហាម៉ាស៊ីនប្រេងសាំង ដូចនោះអ្នកបើកយន្តហោះបានសម្រេចចិត្តវិលត្រលប់ទៅចុះចតនៅសិង្ហបុរីវិញភ្លាម។
ក្រោយពេលចុះចតភ្លាមនៅព្រលានយន្តហោះ Changi នាវេលាម៉ោង៦:៥០នាទីព្រឹក ម៉ាស៊ីនផ្នែកខាងស្ដាំនៃយន្តហោះបានឆេះចេញជាអណ្ដាតភ្លើង។ យ៉ាងណាក្ដី ក្រុមអ្នកសង្គ្រោះបន្ទាន់ប្រចាំព្រលានយន្តហោះបានពន្លត់ភ្លើងទាន់ពេលវេលា និងបានជម្លៀសអ្នកដំណើរ ២២២នាក់ និងបុគ្គលិកបម្រើការលើយន្តហោះ១៩នាក់ ចេញពីយន្តហោះដោយសុវត្ថិភាព៕
ចុចអាន៖ បញ្ហាធំៗដែលកើតឡើងក្រោយអង់គ្លេសចាកចេញពីអឺរ៉ុប
ប្រែសម្រួល៖ មាន រតនា ប្រភព៖ channelnewsasia