Rooney ថាអង់គ្លេស មិនផ្ដោតអារម្មណ៍លើតែ Sigurdsson ទេយប់នេះ

2016-06-27 19:04:10
ចំនួនមតិ 0 | ចំនួនចែករំលែក 0

ចន្លោះមិនឃើញ

Wayne Rooney ប្រធានក្រុមជម្រើសជាតិអង់គ្លេស បានលើកឡើងមុនប៉ះក្រុមអ៊ីស្លង់ នៅ Euro 2016 វគ្គ១៦ក្រុមយប់នេះថា អង់គ្លេសមិនផ្ដោតអារម្មណ៍លើតែ តារាឆ្នើម Gylfi Sigurdsson របស់ក្រុមអ៊ីស្លង់តែម្នាក់នោះទេ តែត្រូវប្រយ័ត្នចំពោះកីឡាករគូប្រកួតទាំងអស់។

Wayne Rooney ប្រធានក្រុមជម្រើសជាតិអង់គ្លេស

Sigurdsson ខ្សែបម្រើក្រុម Swansea City ជាអ្នកស៊ុតបញ្ចូលទីឲ្យអ៊ីស្លង់ច្រើនជាងគេ កាលវគ្គជម្រុះ Euro 2016 ដោយស៊ុតបាន៦គ្រាប់ ហើយកាលវគ្គសន្សំពិន្ទុក្នុងពូលកីឡាករវ័យ២៦ឆ្នាំរូបនេះ ក៏ស៊ុតបាន១គ្រាប់ទៀត និងជាតួអង្គដ៏សំខាន់ជួយឲ្យអ៊ីស្លង់ បញ្ចប់ចំណាត់ថ្នាក់លេខ២ ក្នុងពូល F ផងដែរ។

យ៉ាងណាក្ដី Rooney បានលើកឡើងថាអង់គ្លេស នឹងផ្ដោតអារម្មណ៍លើក្រុមអ៊ីស្លង់ទាំងមូល ដោយមិនចាំបាច់ផ្ដោតលើតែកីឡាករណាម្នាក់នោះទេ។ ប្រធានក្រុម Manchester United រូបនេះ បាននិយាយថា៖ "ខ្ញុំមិនចង់និយាយច្រើនពីគាត់ (Sigurdsson) ទេ។ គាត់ជាកីឡាករអស្ចារ្យ និងលេងបានយ៉ាងល្អនៅប៉ុន្មានឆ្នាំចុងក្រោយនៅ Premier League”។

“គាត់ជាកីឡាករដែលគ្រោះថ្នាក់ម្នាក់។ គាត់អាចស៊ុតបញ្ចូលទីបានរហ័សទាំងបាល់ជិត និងបាល់ពីចម្ងាយ។ ប៉ុន្តែដូចខ្ញុំនិយាយកាលពីដើមចឹង គឺយើងនឹងផ្ដោតអារម្មណ៍ ទៅលើក្រុមអ៊ីស្លង់ទាំងមូល មិនមែនតែកីឡាករម្នាក់នោះទេ”។ ខ្សែប្រយុទ្ធក្រុមបិសាចក្រហម បន្ថែម។

ក្រុមតោកំណាចអង់គ្លេស នឹងប៉ះអ៊ីស្លង់នៅកីឡដ្ឋាន Allianz Riviera ទីក្រុង Nice នាវេលាម៉ោង០២:០០រំលងអាធ្រាត្រយប់នេះ ហើយក្រុមណាឈ្នះ នឹងឡើងទៅប៉ះម្ចាស់ផ្ទះបារាំង នៅវគ្គ៨ក្រុមចុងក្រោយជាបន្ត៕

ប្រែសម្រួល៖ វិន ជីវ័ន្ត ប្រភព៖ SkySports