ភ្លៀងខ្លាំងថ្ងៃនេះ ដោយសាររងសម្ពាធទាបពីសមុទ្រវៀតណាម
- 2016-06-27 23:24:55
- ចំនួនមតិ 0 | ចំនួនចែករំលែក 0
ភ្លៀងខ្លាំងថ្ងៃនេះ ដោយសាររងសម្ពាធទាបពីសមុទ្រវៀតណាម
ចន្លោះមិនឃើញ
នៅរសៀលថ្ងៃចន្ទនេះ តំណក់ទឹកភ្លៀងបានធ្លាក់ចុះស្រោចស្រពទូទាំងរាជធានីភ្នំពេញ និងតំបន់ផ្សេងៗទៀតលាយឡំជាមួយខ្យល់កន្ត្រាក់ខ្លាំងៗ បណ្ដាលឲ្យរលំដើមឈើ និងដួលផ្ទាំងប៉ាណូមួយចំនួន។ អ្នកនាំពាក្យក្រសួងធនធានទឹក និងឧតុនិយមបានបញ្ជាក់ថា ភ្លៀងធ្លាក់លាយខ្យល់ខ្លាំងនៅថ្ងៃនេះ បណ្ដាលមកពីកម្ពុជារងវិសម្ពាធទាបនៅសមុទ្រវៀតណាម។
លោក អ៊ុំ រីណា ប្រធាននាយកដ្ឋានឧតុនិយមនៃក្រសួងធនធានទឹក បានប្រាប់ Sabay នៅប៉ុន្មាននាទីមុននេះថា កម្ពុជាកំពុងរងវិសម្ពាធទាបពីសមុទ្រវៀតណាម ទើបបណ្ដាលឲ្យមានភ្លៀងធ្លាក់ខ្លាំង លាយឡំជាមួយខ្យល់កន្ត្រាក់បែបនេះ ហើយស្ថានភាពខាងលើនឹងបន្តរហូតដល់ថ្ងៃទី៣ ខែកក្កដា។
“តាមពិតទៅ យើង Predict (ព្យាករ) ដំបូងថា វាអាចក្លាយជាកូនព្យុះ TD តែឥឡូវវាវិលវល់នៅសមុទ្រវៀតណាមហ្នឹង ហើយថយឥទ្ធិពលត្រឹមវិសម្ពាធទាប តែក៏ធ្វើឲ្យខាងយើងធ្លាក់ភ្លៀងខ្លាំងដែរ... យើងកំពុងតាមដានបន្តទៀត ថាវាយ៉ាងណា”។ លោក រីណា បញ្ជាក់។
កាលពីថ្ងៃទី២៤ ខែមិថុនា ក្រសួងធនធានទឹក និងឧតុនិយមបានចេញសេចក្ដីជូនដំណឹងបន្ថែមមួយស្ដីពីស្ថានភាពអាកាសធាតុនៅកម្ពុជា ដោយបញ្ជាក់ថាចាប់ពីថ្ងៃទី២៧ នេះ នឹងមានភ្លៀងធ្លាក់ច្រើន លាយឡំជាមួយខ្យល់បោកបក់ខ្លាំង ទាំងនៅតំបន់មាត់សមុទ្រ និងតំបន់វាលទំនាប។ ចំណែកឯបណ្ដាខេត្តមួយចំនួននៅតំបន់ខ្ពង់រាប ក៏មានស្ថានភាពដូចគ្នាដែរ។
ដោយសារស្ថានភាពមិនអំណោយផលបែបនេះ ក្រសួងធនធានទឹក និងឧតុនិយម បានអំពាវនាវឲ្យមានការប្រុងប្រយ័ត្នខ្ពស់ ចំពោះបាតុភូត ភ្លៀងលាយឡំផ្គរ រន្ទះ និងខ្យល់កន្ត្រាក់។ ចំពោះអ្នកចេញនេសាទតាមសមុទ្រ និងអ្នកទេសចរតាមកោះ គួរមានការប្រុងប្រយ័ត្នខ្ពស់ ចៀសវាងគ្រោះថ្នាក់ដែលអាចកើតឡើងជាយថាហេតុ៕
អត្ថបទ៖ គង់ វិសាល